မြန်မာများကို တရားဝင်အထောက်အထားပေးရန် ထိုင်းအလုပ်သမားဝန်ကြီး သဘောတူ

ရန်ကုန်၊ ဇူလိုင် ၇

 

ထိုင်းနှင့် မြန်မာ နှစ်နိုင်ငံ အလုပ် သမားဝန်ကြီးတို့သည် ဇူလိုင်လ ၇ ရက်နေ့က နေပြည်တော်တွင် တွေ့ဆုံခဲ့ပြီး ထိုင်း ရောက် မြန်မာအလုပ်သမားများကို ဖမ်းဆီးခြင်းမပြုဘဲ အထောက်အထား ထုတ်ပေးရန် သဘောတူခဲ့ကြကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနမှ သိရသည်။

အထောက်အထားမရှိသူများ၊ အထောက်အထားရှိပြီး သက်တမ်းလွန်နေသူများ၊ မည်သူမည်ဝါ ဖြစ်ကြောင်း လက်မှတ် (CI) စာအုပ်ရှိပြီး အလုပ်လုပ်ခွင့်ပါမစ်မရှိသူများ၊ အလုပ်ရှင်၊ လုပ်ငန်း အမျိုးအစား၊ လုပ်ငန်းနေရာလွှဲနေသူများကို ဇူလိုင်လ ၂၄ ရက်နေ့မှ ဩဂုတ်လ ၇ ရက်နေ့အထိ ထိုင်းနိုင်ငံတွင် စာရင်း ကောက်ယူရေးစင်တာများဖွင့်လှစ်၍ စာရင်းကောက်ယူကာ စိစစ်၍ အထောက်အထားထုတ်ပေးမည်ဖြစ်ကြောင်း အဆိုပါ ဌာနမှ သိရသည်။

“ဟို (ထိုင်း) မှာ ရှိနေတဲ့သူတွေကို အထောက်အထားထုတ်ပေးမှာပါ” ဟု အလုပ်သမားရေးရာ ဆက်ဆံရေးဦးစီးဌာနမှ ညွှန်ကြားရေးမှူးချုပ်ဦးမောင်မောင်ကျော်က ပြောကြားသည်။

နိုင်ငံအစိုးရအချင်းချင်း သဘောတူညီမှုဖြင့် မြန်မာရေလုပ်သားများကို ခေါ်ယူမည့်ကိစ္စ၊ ထိုင်းနိုင်ငံတွင် ဗီဇာနှင့် အလုပ်လုပ်ခွင့်ပါမစ်များ ဆက်လက်ထုတ်ပေးရေးကိစ္စ၊ မြန်မာနိုင်ငံဘက်က စာရင်း ကောက်ယူရရှိသည့် လုပ်သား အင်အားအခြေအနေပေါ်မူတည်၍ CI ထုတ်ပေးရေးစခန်းများ တိုးချဲ့ဖွင့်လှစ်ရေးကိစ္စများကို နှစ်နိုင်ငံ ဝန်ကြီးများဆွေးနွေးခဲ့ကြောင်း အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာနမှ သိရသည်။

နိုင်ငံခြားသားအလုပ်သမားများကို ထောင်ဒဏ်ငါးနှစ်အထိ ချမှတ်နိုင်သည့် နိုင်ငံခြားသား အလုပ်သမားစီမံခန့်ခွဲမှု ဥပဒေကို ပြဋ္ဌာန်းပြီး အထောက်အထားမဲ့၊ အထောက်အထားမစုံ၊ အထောက်အထားလွဲ နိုင်ငံခြားသားအလုပ်သမား ဖမ်းဆီးမှု ကို ထိုင်းအစိုးရက ခြောက်လကြာ ဆိုင်းငံ့ထားသည်။

ယင်းကာလအတွင်း မြန်မာအလုပ်သမားများသည် အထောက်အထားမှန်ကန်အောင် လုပ်ဆောင်ပေးရမည်ဖြစ်ပြီး အထောက်အထားမရှိသူများကိုလည်း အထောက်အထား ထုတ်ပေးမည်ဖြစ်ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ ပြည်ထောင်စုဝန်ကြီးက ပြောဆိုထားသည်။

 

You may also like...

Leave a Reply

Your email address will not be published. Required fields are marked *