ငလျင်အန္တရာယ် ကြိုတင်ကာကွယ်ရန် ယူရို ရှစ်သိန်း အီးယူထောက်ပံ့မည်

ရန်ကုန်၊ ဇူလိုင် ၇

အင်အားပြင်းငလျင်အန္တရာယ်ဖြစ်ပွားမှုများ ကြိုတင်ကာကွယ်နိုင်ရန် ဥရောပ သမဂ္ဂအဖွဲ့ဝင်နိုင်ငံများ (အီးယူ) က မြန်မာ နိုင်ငံကို ယူရိုငွေ ရှစ်သိန်း ထောက်ပံ့သွားမည်ဖြစ်ကြောင်း ကုလသမဂ္ဂဖွံ့ဖြိုးမှု အစီအစဉ် (UNDP) က ဇူလိုင် ၇ ရက် တွင် သတင်းထုတ်ပြန်သည်။

အဆိုပါ ငွေကြေးအကူအညီကို မြန်မာနိုင်ငံဆိုင်ရာ UNDP က လက်ခံရယူပြီး ငလျင်အန္တရာယ်ထိခိုက်ခံစားရမှု လျော့ပါးသက်သာရန် ကြိုတင်ပြင်ဆင်သည့် စီမံကိန်းကို ပဲခူး၊ မန္တလေး၊ စစ်ကိုင်း၊ ရန်ကုန်တိုင်းဒေသကြီး၊ ချင်းနှင့် ကချင် ပြည်နယ်တို့တွင် အကောင်အထည်ဖော်  ဆောင်ရွက်မည်ဖြစ်သည်။

စီမံကိန်းကာလ တစ်နှစ်ခွဲ(၁၈ လ) ကြာမြင့်မည့် အဆိုပါစီမံကိန်းတွင် ငလျင် ဖြစ်ပွားမှုနှင့်ပတ်သက်၍ အစိုးရဌာန များ စွမ်းဆောင်ရည်မြှင့်တင်ခြင်း၊ သဘာဝဘေးအန္တရာယ် တုံ့ပြန်မှုဆိုင်ရာ အသိပညာပေးခြင်းလုပ်ငန်းများ ဆောင်ရွက်မည်ဖြစ်ကြောင်း ထုတ်ပြန်ချက်တွင် ဖော်ပြသည်။

“ဒါက အစိုးရအဖွဲ့အစည်းတွေနဲ့ လူမှုအသိုင်းအဝိုင်းအတွက် အရေးပါတဲ့ ကြိုတင်ပြင်ဆင်မှုတွေ၊ ထိရောက်တဲ့ တုန့်ပြန်မှုတွေ စနစ်ကျဆောင်ရွက်ဖို့မှာ အထောက်အကူဖြစ်စေမှာပါ။ အီးယူထံမှ ဒီအရေးပါတဲ့ရန်ပုံငွေ ထောက်ပံမှုအတွက်လည်း အထူးကျေးဇူးတင်ပါ တယ်” ဟု ကုလသမဂ္ဂဖွံ့ဖြိုးမှုအစီအစဉ် (UNDP) မြန်မာနိုင်ငံဆိုင်ရာဒါရိုက်တာ Peter Batchelor ကပြောကြားသည်။

အဆိုပါစီမံကိန်းသည် သဘာဝဘေးအန္တရာယ်ထိခိုက်မှု လျှော့ချနိုင်မည့် စွမ်းဆောင်ရည်များမြှင့်တင်နိုင်ပြီး မြန်မာအစိုးရနှင့် ပြည်တွင်းပြည်ပဆက်စပ်အဖွဲ့ အစည်းများကို ဖွံ့ဖြိုးတိုးတက်ရေးအကြံ ဉာဏ်အကူအညီများ ပေးနိုင်မည်ဖြစ်သည်ဟု UNDP ထံမှ သိရသည်။

You may also like...

Leave a Reply

Your email address will not be published. Required fields are marked *