နိုင်ငံရေး အကဲဆတ်ချိန်

 

ယနေ့ နိုင်ငံရေးသည် ‘အကဲဆတ်ချိန်’ ရောက်ပြီဖြစ်ရာ အရေးကြီးသော Player များ၊ အဖွဲ့အစည်းကို ဦးဆောင်သူ များအနေနှင့် ကိုယ်၊ နှုတ်၊ နှလုံးသုံးပါးလုံး ထိန်းထိန်းသိမ်းသိမ်း ဆောင်ရွက်သင့်သည်။

ဒီမိုကရေစီနည်းဖြင့် ရွေးကောက်တင်မြှောက်သော အစိုးရတက်သည်မှာ တစ်နှစ်ကျော်ကြာပြီဖြစ်သည့်အတွက် အဖွဲ့အစည်းများ Player များတစ်ဖွဲ့နှင့်တစ်ဖွဲ့၊ တစ်ဦးနှင့်တစ်ဦး အကဲဖြတ်ချိန်၊ စောင့်စည်းထိန်းသိမ်းချိန် ပျားရည်ဆမ်းကာလ ကျော်လွန်ပြီဖြစ်သည်။ ‘မင်းဘာလဲ၊ ငါဘာလဲ’ ကာလကျော်လွန်ပြီး အကဲဖြတ်ပြီးချိန်ဖြစ်ရာ အဖွဲ့အစည်းအသီးသီးတွင် တင်းမာမှုများ၊ စိတ်မရှည်မှုများကို ပြန်လည်မြင်တွေ့ရချိန် ဖြစ်သည်။

မြန်မာနိုင်ငံကဲ့သို့ နိုင်ငံတည်ဆောက်ရေး ပြဿနာမျိုးစုံကို တစ်နိုင်ငံတည်းတွင် တွေ့ကြုံနေရသည့်နိုင်ငံများ များများစားစားမရှိလှပါ။ အမျိုးသားရင်ကြားစေ့ရေးကို ဒီမိုကရေစီ ဖွားမြင်စ အခြားနိုင်ငံအများစုကဲ့သို့ ဘက်နှစ်ဘက်ကြား တည်ဆောက်ရသည်မဟုတ်ဘဲ ဘက်လေးငါးခြောက်ဘက်အကြား တည်ဆောက်နေရသည်ဖြစ်ရာ ‘အကဲဆတ်ချိန်’ သည် ရှေ့မှသွားသည့် နောင်တော်နိုင်ငံများကြုံတွေ့ရသည့် ‘အကဲဆတ်ချိန်’ ထက်ပင် များစွာအကဲဆတ်ကြောင်း အလွယ်တကူမြင်နိုင်သည်။

‘အကဲဆတ်ချိန်’ တွင် တင်းမာမှုများ ကြီးစိုးလာတတ်ရာ အကူးအပြောင်းကာလကို ဖြစ်ပေါ်စေခဲ့သည့် ‘အလယ်အလတ် သမားများ’ နောက်ရောက်ပြီး ‘သဘောထားတင်းမာသူများ’ သည် သက်ဆိုင်ရာအဖွဲ့အစည်းအသီးသီးတွင် ရှေ့ရောက်လာတတ်သည်။ အဖွဲ့အစည်းများကိုကျော်လွန်သည့် သက်ဆိုင်ရာ လူ့အသိုင်းအဝိုင်းများတွင်လည်း သဘောထားတင်းမာသူများ၏ သဘောထားတို့က ပျံ့နှံ့လွှမ်းမိုးလာတတ်ကြသည်။ အဖွဲ့အစည်းတစ်ရပ်တွင် သဘောထားတင်းမာသူများ ရှေ့ရောက်လာလျှင် ယင်းနှင့်ပြိုင်ဘက် သို့မဟုတ် ဆွေးနွေးဖက် အဖွဲ့အစည်းတွင်လည်း သဘောထားတင်းမာသူများ ရှေ့ရောက်လာကြသည်ကို သတိပြုဖွယ်ရာဖြစ်သည်။

အဆုံးတွင် အဖွဲ့အစည်းအသီးသီးတွင် သဘောထားတင်းမာသူများ ကြီးစိုးသွားပြီး အသွင်ကူးပြောင်းရေးကာလ နောက်ပြန်ဆုတ်သွားနိုင်သည်မှာ လက်တွေ့အန္တရာယ်ပင် ဖြစ်သည်။

မြန်မာ့အရေးတွင် တာဝန်ရှိကြသည့် အဖွဲ့အစည်းအသီးသီး၏ ခေါင်းဆောင်နေရာတွင် ရှိနေသူများအနေနှင့် ‘အကဲ ဆတ်ချိန်’ ကို ဦးနှောက်ထက်ထက် နှလုံးသားကြီးကြီးဖြင့် ကျော်ဖြတ်ပါမည့်အကြောင်း The Voice Journal က မေတ္တာရပ်ခံပါသည်။

အယ်ဒီတာ
၁၂.၇.၂၀၁၇

You may also like...

Leave a Reply

Your email address will not be published. Required fields are marked *