တက္ကသိုလ် ဘယ်ဘဝကို ရွေးမလဲ

 

 

တက္ကသိုလ်ဝင်တန်း အောင်စာရင်းများထွက်ပြီ။ ဘယ်ကျောင်းတက်မလဲ ရွေးကြရတော့မည်။ စင်စစ် ကိုယ်တက်သောကျောင်းသည် ကိုယ့်ဘဝကို အဆုံးအဖြတ်ပေးမည်ဖြစ်ရာ ကျောင်းရွေးခြင်းသည် ဘဝရွေးခြင်းပင် ဖြစ်သည်။ သတင်းများကို ဖတ်ရသည့်အတိုင်း ဆိုလျှင် တက္ကသိုလ်ဝင်တန်း အောင်မြင်သူ နှစ်သိန်းလေးသောင်းကျော် ရှိသည့်အတွက် ဘဝပေါင်း နှစ်သိန်းခွဲခန့်၊ ဆက်စပ်မိသားစုပေါင်း နှစ်သိန်းခွဲခန့်။ မြန်မာပြည် အနာဂတ်အတွက် အရေးကြီးလှသော အင်အားစုကြီး။ သူတို့၏ ယနေ့အဆုံးအဖြတ်သည် မြန်မာ့မနက်ဖြန်အပေါ် ကြီးမားစွာ သက်ရောက်မည်။

ယခုဆောင်းပါးသည် တက္ကသိုလ်ဝင်တန်းအောင်များကို အဓိက ရည်ရွယ်သော်လည်း အသက်အရွယ်အသီးသီး၊ ဘဝအဆင့် အသီးသီးနှင့်လည်း ဆိုင်သည်။ ဘယ်ဘဝကို သွားမလဲ။ ကိုယ်ရွေးချင်တိုင်း ရွေးလို့မရ အမှတ်စာရင်းပေါ် မူတည်သည်ဟု ဆိုကြမည်။ စင်စစ်အမှတ်စာရင်းသည် လူ့ဘဝတွင် ကြုံရလေ့ရှိသည့် အကန့်အသတ်တစ်မျိုးသာ ဖြစ်သည်။ အကန့်အသတ် အမျိုးအစားသာ ကွာချင်ကွာမည် ဘဝတွင် မည်သူမဆို အကန့်အသတ်နှင့် ကြုံရသည်ချည်း။ ချမ်းသာဆင်းရဲ၊ ကျားမ၊ လူနေမှု အဆင့်အတန်း၊ နေသည့်ဒေသ စသည့် အချက်များစွာပေါ် မူတည်ပြီး အကန့်အသတ်များ ကွာခြားသွားသော်လည်း အကန့်အသတ်မူ မည်သူမဆိုအပေါ် ရှိနေသည်။ နောက်ဆုံးတွင် ရွေးချယ်မှုက စကားပြောသွားသည်။ ဥပမာ – ဥရောပနှင့် အာရှရှိ ဘုရင့်မိသားစုအချို့သည် အရာရာ ပြည့်စုံနေသည့်သဘော ရှိသော်လည်း အိမ်ထောင်ပြုလျှင် အပြင်မိသားစုနှင့် လက်မထပ်ရ၊ လက်ထပ်လျှင် နန်းတော်မှ ခွာရမည် ဟူသော အကန့်အသတ်များ ရှိသည်။ ချမ်းသာသည့်နိုင်ငံတွင် မွေးဖွားလာသူသည် ဆင်းရဲနိုင်ငံတွင် မွေးဖွားသူထက် အကန့်အသတ်နည်းသည်ဆိုသော်လည်း နိုင်ငံတကာပညာသင်ဆု လျှောက်မည်ဆိုလျှင် ဆင်းရဲနိုင်ငံတွင် မွေးသူက အခွင့်အလမ်း ပိုသာသည်။

ယနေ့ခေတ်သည် ပြောင်းသွားပြီ၊ ပွင့်သွားပြီ။ အလုပ်အကိုင် အမျိုးအစား စုံသွားပြီ။ ဆရာဝန်၊ အင်ဂျင်နီယာဖြစ်မှ ဝင်ငွေအဆင်ပြေ တင့်တောင့်တင့်တယ် နေရမည် မဟုတ်ဘဲ ယခင်က မရှိခဲ့သော အလုပ်အမျိုးအစားများ ( ဥပမာ – DJ) ဖြင့်လည်း ဘဝရပ်တည်နိုင်ပြီ။ သက်ဆိုင်ရာနယ်ပယ်တွင် အောင်မြင်ရန်သာ လိုသည်။ အောင်မြင်သူတို့ နောက်သို့ ငွေကြေးလိုက်လာမည် ဖြစ်သလို အောင်မြင်ကျော်ကြားမှုတို့လည်း ပါလာနိုင်သည်။

မည်သည့်လမ်းကြောင်းရွေးရွေး ထွန်းပေါက်ရန်သာလိုသည်။ မည်သည့်နယ်ပယ်မှသာ နောင်ရေးစိတ်အေးရမည်ဆိုသည့် သဘောတရားသည် ယနေ့ခေတ်ကြီးတွင် ခေတ်မမီတော့။

ထွန်းပေါက်ရန်ဆေးနည်းမှာ မြန်မာတို့နှင့် ရင်းနှီးပြီးသား။ ဝါသနာ၊ စေတနာ၊ အနစ်နာ ထိုသုံးဖြာနှင့် ပြည့်စုံလျှင် ဘယ်အလုပ်လုပ် ထွန်းပေါက်မည်။ ယင်းသုံးဖြာတွင်လည်း ဝါသနာသည် အခေါင်အချုပ်။ ဝါသနာပါသော အလုပ်၊ ပညာရပ်၊ နယ်ပယ်သာဆိုလျှင် စေတနာပိုမည်။ စေတနာပိုလျှင် အနစ်နာခံနိုင်သည်။ မည်မျှပင်ပန်းပင်ပန်း သည်းခံနိုင်သည်။ အလုပ်အရည်အသွေး ပိုကောင်းရန် ကာယအား၊ ဉာဏအား ပိုထည့်မည်၊ အချိန်ကုန်သည်ကို သိပင်သိလိုက်မည် မဟုတ်။ ထို့ကြောင့် ကျောင်းရွေးရမည်ဆိုလျှင် ဝါသနာပါရာကို ဦးစားပေး ရွေးစေလိုသည်။

ဝါသနာပါရာ ရွေးပါဟု ပြောရသည်မှာ လွယ်သည်။ မလွယ်သော အကြောင်းများ ရှိသည်။ ကိုယ်ဝါသနာပါသည်ကို အသက် ၂၀ မပြည့်မီ သိရန်မလွယ်။ အချို့ဆိုလျှင် အောင်မြင်သည်ဟု လူအများက သတ်မှတ်ကြသော်လည်း ကိုယ်ဘာလုပ်ချင်သည်ကို သေသည်အထိ သိမသွား။ သိသောသူများသည် ကံကောင်းသောသူများ ဖြစ်သည်။ မသိသောသူ များသည်လည်း စိတ်ပျက်ရန်မလို။ ကိုယ်ဝါသနာပါသည်ကို မသိသူသည် ပုံမှန်ဖြစ်သည်။ ကိုယ့်ဝါသနာကို သိလိုလျှင် အောက်ပါမေးခွန်းများ မေးနိုင်သည်။ ငွေအတွက် ပူစရာမလိုလျှင် ကိုယ်ဘာလုပ်ချင်လဲ။ ဘာလုပ်ရလျှင် ကိုယ်ပျော်လဲ။ ထိုမျှနှင့် မရှင်းသေးလျှင် နောက်ထပ်မေးခွန်းများ မေးနိုင်သည်။ နောက်ဆယ်နှစ်နေလျှင် ကိုယ်သေမည် ဆိုပါက ဘာတွေလုပ်သွားချင်လဲ။ နောက်ခြောက်လနေလျှင် သေမည်ဆိုပါက ဘာလုပ်ချင်လဲ။ နောက်တစ်မျိုး ရှိသေးသည်။ ဘာလုပ်ချင်လဲကို စဉ်းစားရခက်လျှင် ပြောင်းပြန်စဉ်းစားနိုင်သည်။ ဘာလုပ်ရမှာ ကိုယ်မုန်းလဲ။ ကြိုက်သည့်အရာ တိတိပပမရှိသူများ အတွက် ယင်းမေးခွန်းသည် ထိရောက်သည်။ မကြိုက်သည့်နယ်ပယ်ကို ရှောင်လိုက်လျှင် ကျန်သည့်အထဲက ဘာရွေးရွေး။

နောက်ထပ် ရွေးနည်းတစ်နည်းမှာ စက်ဝိုင်းသုံးဝိုင်းစနစ်ဖြင့် ရွေးနည်း။ ကိုယ်ဝါသနာပါသည့် နယ်ပယ်က စက်ဝိုင်းတစ်ဝိုင်း၊ ဝင်ငွေကောင်းရန် သေချာသည့်နယ်ပယ်က စက်ဝိုင်းတစ်ဝိုင်း၊ အများအကျိုးပြုသည့်နယ်ပယ်က စက်ဝိုင်းတစ်ဝိုင်း။ ထိုသုံးဝိုင်းကို ချဆွဲပြီး သုံးဝိုင်းလုံး ဆုံသည့်နယ်ပယ်ကို ရွေးခြင်းမျိုး။ ဝါသနာပါရုံနှင့်မပြီး၊ စားဝတ်နေရေးကလည်း အရေးကြီးသည်။ စားဝတ်နေရေးလည်း အဆင်ပြေ၊ ဝါသနာနှင့်လည်းကိုက်လျှင် အများကို အကျိုးပြုနိုင်လေ ကောင်းလေလေ။

အများကို အကျိုးပြုနိုင်ခြေ မြင့်မားသော ဘာသာရပ်များသည် နိုင်ငံခြား ပညာရည်ချွန်ဆုများများ ပေးသော ဘာသာရပ်များဖြစ်လေ့ ရှိသည်။ ဥပမာ – နိုင်ငံဖွံ့ဖြိုးရေး၊ ပြည်သူ့ရေးရာမူဝါဒ၊ ပြည်သူ့ကျန်းမာရေး၊ ဘောဂဗေဒတို့သည် နိုင်ငံခြားပညာရည်ချွန်ဆုများများ ပေးတတ်သည်။

မြန်မာနိုင်ငံသည် နယ်ပယ်စုံတွင် ထူးချွန်ထက်မြက်သောသူများ လိုအပ်နေရာ နယ်ပယ်များစွာသို့ ဉာဏ်ရည်ကောင်းသူများ၊ ကြိုးစားအားထုတ်သူများ ပျံ့နှံ့သွားလျှင် အကောင်းဆုံး။
ဉာဏ်ရည်ကောင်းသူ၊ ကြိုးစားသူတို့သည် မည်သည့်နေရာရောက်ရောက် အောင်မြင်မည်သာ။ သူတို့အောင်မြင်လျှင် နယ်ပယ်လည်း အောင်မြင်မည် ဖြစ်သလို နိုင်ငံလည်း အကျိုးရှိမည်။ နိုင်ငံရေးသိပ္ပံ၊ မနုဿဗေဒတို့ကဲ့သို့ ဘာသာရပ်များသည် မြန်မာနိုင်ငံတွင် အဆက်ပြတ်ခဲ့သဖြင့် ယင်းနေရာတွင် လူသားရင်းမြစ်များ လိုအပ်သည်။

အချို့ဘာသာရပ်များသည် တူသလိုလိုနှင့်ကွဲသည်။ သိပ္ပံပညာ စိတ်ဝင်စားသူသည် Pure Science ဖြစ်သည့် ဓာတုဗေဒ၊ ရူပဗေဒတို့ကို စိတ်ဝင်စားသလား၊ စက်မှုအင်ဂျင်နီယာ၊ ဓာတုအင်ဂျင်နီယာ၊ လေကြောင်း အင်ဂျင်နီယာစသော အင်ဂျင်နီယာ ပညာရပ်များကို စိတ်ဝင်စားသလားကို ဆုံးဖြတ်ရန် လိုသည်။

အချို့ဘာသာရပ်များသည် တက္ကသိုလ်တက်ရန်ပင် မလိုဘဲ ပြင်ပတွင် သင်တန်းများတက်ပြီးသော် လည်းကောင်း၊ ကိုယ့်ဘာသာလေ့လာခြင်းဖြင့်သော် လည်းကောင်း လေ့လာနိုင်သော ဘာသာရပ်များဖြစ်ရာ ဝါသနာပါသလိုလို ဖြစ်နေလျှင် တက္ကသိုလ်တွင်တက်လျှင် ပိုသင့်တော်ပြီး ပိုဝါသနာပါသော ဘာသာရပ်များကို ရွေးချယ်နိုင်သည်။ သဘောအားဖြင့် ဆရာဝန် ပညာရပ်ကို ကိုယ့်ဘာသာ လေ့လာရန်၊ အပြင်သင်တန်းတက်ခြင်းဖြင့် လေ့လာရန်မလွယ်။

အင်္ဂလိပ်စာ၊ ကိုရီးယားစာနှင့် စီးပွားရေး Business ပညာရပ်ကို အပြင်တွင် လေ့လာနုိုင်သည်။

အင်္ဂလိပ်စာကိုမူကား တက္ကသိုလ်ဝင်တန်းအောင် မည်သူမဆို တတ်အောင်လုပ်ရမည်သာ။ အင်္ဂလိပ်စာသည် မိမိတို့ မည်သည့်နယ်ပယ်သို့ ဝင်သည်ဖြစ်စေ တံခါးများကို ပွင့်စေမည့် သော့လိမ္မာ Smart Key ဖြစ်သည်။ ဆရာဝန် အင်္ဂလိပ်စာတတ်ရန် လိုသလို စိုက်ပျိုးရေးသမားလည်း အင်္ဂလိပ်စာ လိုအပ်သည်။ နယ်ပယ်အသီးသီးတွင် နေ့စဉ်ထွက်ပေါ်နေသော နောက်ဆုံးပေါ် ပညာများသည် အင်္ဂလိပ်ဘာသာဖြင့် ရေးသားပြုစုထားကြသည်ဖြစ်ပြီး နှီးနှောဖလှယ်ကြရာတွင်လည်း အင်္ဂလိပ်ဘာသာကို သုံးစွဲကြသည်။

တက္ကသိုလ်တက်ကြရင်းနှင့် ကိုယ့်အကြောင်းကိုယ် ပိုသိလာနိုင်သည်။ ထိုအခါတွင် ဘဝကို ဘယ်လိုဆက်ကျောင်းသင့်သည်ကို နားလည်လာပြီး လိုင်းပြောင်းသွားနိုင်သည်။ လျှောက်မိသောလမ်းကိုပင် ဆုံးခန်းတိုင် ဆက်လျှောက်ချင်လည်း လျှောက်ဖြစ်မည်။ မည်သို့ပင်ဖြစ်စေ တက္ကသိုလ်ကာလသည် ဆယ်ကျော်သက်မှ လူကြီးဘဝ အကူးအပြောင်းကာလ ဖြစ်သည့်အတွက် အဖိုးတန်ကာလ ဖြစ်သည်။ တက္ကသိုလ်နေ့ရက်များသည် မိမိတို့ဘဝကို အဆုံးအဖြတ်များစွာ ပေးမည်။ သူငယ်ချင်း၊ မိဘတို့သည် မိမိတို့ကို ချစ်မြတ်နိုးသောကြောင့် အကြံဉာဏ်ကောင်းများပေးမည် ဖြစ်သော်လည်း တက္ကသိုလ်ဘဝသည် ပြန်မရသော ကိုယ့်ဘဝ ဖြစ်သည့်အတွက် အချိန်ယူစဉ်းစားပြီး ကိုယ်တိုင်ဆုံးဖြတ်ရမည်။

မြန်မာ့အနာဂတ်၊ ကိုယ့်အနာဂတ်အတွက် မှန်မှန်ကန်ကန် ကျောင်းရွေးကြပါစို့။

မိုးညွန့်လုလင်

 

You may also like...

Leave a Reply

Your email address will not be published. Required fields are marked *