ဆက်သွယ်ရေးဥပဒေကို ပြင်ဆင်သည့် ဥပဒေ (မူကြမ်း) အများပြည်သူ ပါဝင်အကြံပြုခွင့်မရဟုဆို

ရန်ကုန်၊ ဇူလိုင် ၁၃

နာမည်ကျော် ပုဒ်မ ၆၆(ဃ) အပါအဝင် ဆက်သွယ်ရေးဥပဒေကို ပြင်ဆင်သည့်ဥပဒေ (မူကြမ်း) သည် အများပြည်သူ ပါဝင်ပြီး အကြံပြုဆွေးနွေးခွင့်မရရှိကြောင်း ၎င်းဥပဒေဖျက်သိမ်းရေးလှုပ်ရှား မှုပူးပေါင်းအဖွဲ့ထံမှ သိရသည်။

ယင်းဥပဒေ (မူကြမ်း) တွင် အများ ပြည်သူ ပါဝင်အကြံပြုဆွေးနွေးမှုများ လုံလောက်စွာခေါ်ယူကျင်းပပြီးမှသာ ပြဋ္ဌာန်းရန် ဇူလိုင်လ ၁၃ ရက် ရန်ကုန် မြို့၊ ကုန်သည်လမ်း MAC Tower၊ ၁၁ လွှာတွင်ပြုလုပ်သော သတင်းစာရှင်း လင်းပွဲ၌ အရပ်ဘက်အဖွဲ့အစည်းများက တောင်းဆိုထားသည်။

“ဥပဒေပြင်ဆင်တဲ့နေရာမှာ အများ ပြည်သူရဲ့အသံတွေပါဖို့။ ဘာဖြစ်လို့လဲဆိုတော့ သူတို့က ပြည်သူ့အသံ လွှတ်တော်အသံလို့ သူတို့ ပြောထားတာရှိတယ်။  ဒါပေမဲ့ သက်ဆိုင်ရာဝန်ကြီးဌာနရဲ့ ဝက်ဘ်ဆိုက်တွေကနေ တရားဝင်ခေါ်တာမျိုး မတွေ့ဘူး။ အစိုးရသတင်းစာကနေ ခေါ်ယူတာမျိုးတွေမတွေ့ဘူး” ဟု ဆက်သွယ်ရေး ဥပဒေပြင်ဆင်ရေးနှင့် ပုဒ်မ ၆၆(ဃ) ဖျက်သိမ်းရေးလှုပ်ရှားမှု ပူးပေါင်းအဖွဲ့မှ ဦးဇေယျာလှိုင်က ပြောကြားသည်။

ဆက်သွယ်ရေးဥပဒေကို ပြင်ဆင်သည့် (မူကြမ်း) ကို ပြည်ထောင်စုလွှတ်တော် အင်တာနက်စာမျက်နှာတွင် ဇူလိုင် ၇ ရက်က ထုတ်ပြန်ခဲ့ပြီး ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး  ဦးကျော်မျိုးက အမျိုးသားလွှတ်တော်သို့ ဇူလိုင်လ ၁၃ ရက်နေ့တွင် တင်သွင်းဆွေး နွေးခဲ့သည်။

ဆက်သွယ်ရေးဥပဒေပြင်ဆင်ခြင်းဆိုင်ရာ အကြံပြုချက်များကို ယင်းဥပဒေ ပြင်ဆင်ရေးပူးပေါင်းအဖွဲ့က ဇွန်လ ၂၂  ရက်နေ့တွင် အမျိုးသားလွှတ်တော်ဥပဒေ ကြမ်းကော်မတီသို့ သွားရောက်အကြံပြုခဲ့သော်လည်း ဥပဒေမူကြမ်းမရောက်ရှိသေးသောကြောင့် ကြားနာလက်ခံ၍ မရသေးကြောင်း၊ ဥပဒေကြမ်းရောက်ရှိလာမှသာ လူထုအကြံပြုချက် ရယူမည်ဖြစ်ကြောင်း အမျိုးသားလွှတ်တော်ဥပဒေ ကြမ်းကော်မတီအတွင်းရေးမှူး ဒေါက်တာ မြတ်ဉာဏစိုးက ပြောကြားခဲ့သည်ဟု ဥပဒေပြင်ဆင်ရေးပူးပေါင်းအဖွဲ့ထံမှ သိရသည်။

အဆိုပါ ဥပဒေပြင်ဆင်ချက်သည်  ပြင်ပမှ တောင်းဆိုအကြံပြုချက်များကို ထည့်သွင်းစဉ်းစားခြင်းမရှိဘဲ အာဇာနည်နေ့မတိုင်ခင် အတည်ပြုမည်ဟု သတင်းများထွက်ပေါ်နေသောကြောင့် အရပ်ဘက် အဖွဲ့အစည်းများက စိုးရိမ်လျက်ရှိသည်။

ဥပဒေမူကြမ်းပါ ပြင်ဆင်ချက်များတွင် ပုဒ်မ ၆၆(ဃ) ပါ ပြစ်မှုများအား ပုဒ်မ ၈၀ (ဂ) အရ အာမခံပေးနိုင်သည့် ပြစ်မှုများဟုဆိုထားရာ အာမခံပေးနိုင်သည့် ပြစ်မှုများအဖြစ် သတ်မှတ်ချက်ပါရှိသော်လည်း အာမခံရ၊ မရ သေချာခြင်း မရှိဘဲ ဖမ်းဆီးမှုကို တားဆီးနိုင်ခြင်းမရှိကြောင်း၊ ပြစ်မှုဆိုင်ရာကျင့်ထုံးဥပဒေ  နောက်ဆက်တွဲဇယား (၂) အရ တရားသူကြီး၏ ဆင်ခြင်တုံတရားအရသာ အာမခံပေးနိုင်ကြောင်း ဖော်ပြထားသည်။

“အာမခံပေးနိုင်တယ်လို့ပဲပြောထားတယ် ပေးရမယ်လို့မပြောထားဘူး  အဲဒီတော့ အာမခံပေးချင်ရင်ပေးနိုင်တယ်။  မပေးချင်ရင် မပေးနိုင်ဘူး တရားသူကြီးရဲ့  ဆင်ခြင်တုံတရားမှာပဲ မူတည်သည်ဆိုတော့ ဒီနိုင်သည်ဆိုတဲ့ အချက်ကလေးကို တော်တော်စိုးရိမ်ပါတယ်” ဟု အဆိုပါ ဥပဒေဖျက်သိမ်းရေး ပူးပေါင်းအဖွဲ့ဝင်  Pen Myanmar မှ ဒေါ်ဇာခြည်ဦးက  ပြောသည်။

ဥပဒေတွင် အာမခံပေးနိုင်သည် ဆိုသည့်ကိစ္စနှင့် ပတ်သက်၍ ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဦးကျော်မျိုးက “တချို့အမှုတွေ မှာတော့ Serious တော်တော်လေးဖြစ်တဲ့ အမှုမျိုးဆို တရားသူကြီးက ဥပဒေနဲ့  အညီသုံးသပ်ပြီးတော့ ဆောင်ရွက်နိုင်ဖို့အတွက် တရားသူကြီးအနေနဲ့ အာမခံပေးနိုင်သည်လို့ ထည့်ထားတာဖြစ်ပါတယ်” ဟု ဇူလိုင်လ ၁၃ ရက်နေ့ အမျိုးသား လွှတ်တော် အစည်းအဝေးအပြီးတွင် မီဒီယာများသို့ ပြောကြားသည်။

ဥပဒေမူကြမ်းတွင် ဆက်သွယ်ရေး  ဥပဒေပါပြစ်မှုများကို ရဲအရေးပိုင်သော ပြစ်မှုများအဖြစ် သတ်မှတ်ရန်၊ ပုဒ်မ ၆၆(ဂ)၊ (ဃ) နှင့် ၆၆ (က) တို့မှတစ်ပါး ကျန်ပြစ်မှုများကို တရားစွဲဆိုရာတွင် ဝန်ကြီးဌာန၏ ကြိုတင်ခွင့်ပြုချက်ရယူရန်၊ မည်သည့်တရားရုံးကမျှ ပုဒ်မ ၆၆(ဃ) ပါ ဆက်သွယ်ရေးကွန်ရက်တစ်ခုခုကို အသုံးပြု၍ ပုဂ္ဂိုလ်တစ်ဦးဦးအား အသရေဖျက်ခြင်းပြုကြောင်း သက်ဆိုင်ရာနစ်နာသူ ကိုယ်တိုင်ကဖြစ်စေ၊ ထိုသူ၏ကိုယ်စား  လွှဲအပ်ခြင်းခံရသူကဖြစ်စေ၊ တိုင်တန်းချက်အရမဟုတ်ပါက အရေးယူခြင်း မပြုစေရဟု ဖော်ပြထားသည်။ 

You may also like...

Leave a Reply

Your email address will not be published. Required fields are marked *