မအူပင်အမတ်ကို ပါတီမှထွက်ခွင့်မပြုဟု ဦးဝင်းထိန်ဆိုမအူပင်အမတ်ကို ပါတီမှထွက်ခွင့်မပြုဟု ဦးဝင်းထိန်ဆို

နေပြည်တော်၊ ဇူလိုင် ၂၁

အမျိုးသားဒီမိုကရေစီအဖွဲ့ချုပ် (NLD) ပါတီမှနုတ်ထွက်ပြီး တစ်သီးပုဂ္ဂလအဖြစ် ရပ်တည်တော့မည်ဟု ပြောဆိုနေသော မအူပင်မြို့နယ် ပြည်သူ့လွှတ်တော် ကိုယ်စားလှယ် ဦးစိန်ဝင်းကို ပါတီမှ  ထွက်ခွင့်မပြုကြောင်း ယင်းပါတီ ဗဟိုအလုပ်အမှုဆောင် အတွင်းရေးမှူးအဖွဲ့ဝင်  ဦးဝင်းထိန်က ပြောကြားသည်။

ပြည်သူ့လွှတ်တော်ကိုယ်စားလှယ်  ဦးစိန်ဝင်းသည် ပါတီမှ တရားဝင်နုတ်ထွက် ခွင့်ပြုရန် ဇူလိုင်လ ၁၄ ရက်နေ့က တင်ပြ ခဲ့ပြီး နုတ်ထွက်ခွင့်ပြုကြောင်းကို ပြည်ထောင်စုရွေးကောက်ပွဲ ကော်မရှင်က  ဇူလိုင်လ ၂၀ ရက်နေ့တွင် အကြောင်းကြားလာကြောင်း ကာယကံရှင်ကိုယ်တိုင်  ပြောဆိုထားသည်။

“နုတ်ထွက်စာ လက်မခံဘူးကွ။  အဲဒီကောင်ညာတာ” ဟု ဦးစိန်ဝင်း၏ နုတ်ထွက်ခွင့်ရကြောင်း ပြောဆိုမှုကို ဦးဝင်းထိန်က ပြန်လည်ရှင်းလင်းပြောကြားသည်။
မအူပင်မဲဆန္ဒနယ်မှ NLD ပါတီ ဝင်လေးဦးနှင့် လုပ်ငန်းရှင်တစ်ဦးကို  ဦးစိန်ဝင်းက တရားစွဲရန် ပြင်ဆင်ခဲ့ဖူးပြီး  ပါတီအကြီးအကဲများက တားမြစ်ခဲ့ကြောင်း၊ ယင်းနောက် ပြည်သူ့လွှတ်တော်  တောင်သူလယ်သမားနှင့် အလုပ်သမား ရေးရာဥက္ကဋ္ဌတာဝန်မှ ထုတ်ပယ်ခြင်းခံရပြန်သဖြင့် ပါတီမှနုတ်ထွက်ရန် ဆုံးဖြတ်ခဲ့ ကြောင်း ဦးစိန်ဝင်းက ရှင်းပြသည်။

“ပါတီက နုတ်ထွက်ခွင့်ပြုလိုက်ပြီ ဆိုတာကို သူတို့ဆီရောက်ပြီဆိုတဲ့ အကြောင်း UEC (ပြည်ထောင်စုရွေးကောက်ပွဲကော်မရှင်) က ဖုန်းနဲ့အကြောင်း ကြားပါတယ်” ဟု နုတ်ထွက်ခွင့်ရသည်ဆိုခြင်းကို ပြည်သူ့လွှတ်တော်ကိုယ်စားလှယ် ဦးစိန်ဝင်းက ပြောဆိုသည်။

ပါတီဝင်လေးဦးနှင့် လုပ်ငန်းရှင်ကို  တရားစွဲရန် ပြင်ဆင်ခဲ့သော်လည်း ပါတီဝင်အချင်းချင်း တရားမစွဲရန် ဗဟိုက ညွှန်ကြားခဲ့ကြောင်း၊ ပါတီဂုဏ်သိက္ခာမထိခိုက်စေရန်အတွက် ငြိမ်ခံခဲ့သော်လည်း ဗဟို၏လုပ်ရပ် မှားယွင်းသည်ဟု  ယူဆသလို လက်ရှိအနေအထားကိုလည်း  အားရကျေနပ်မှုမရှိကြောင်း ဦးစိန်ဝင်းက  ထပ်လောင်းပြောဆိုသည်။

ပြည်သူ့လွှတ်တော်ကိုယ်စားလှယ်  ဦးစိန်ဝင်းသည် ၂၀၁၂ ခုနှစ် ကြားဖြတ် ရွေးကောက်ပွဲနှင့် ၂၀၁၅ ခုနှစ် အထွေထွေ ရွေးကောက်ပွဲများတွင် မအူပင်မဲဆန္ဒနယ် မှ ပြည်သူ့လွှတ်တော်ကိုယ်စားလှယ် အဖြစ် နှစ်ကြိမ်ဆက်ရွေးချယ်ခံခဲ့ရသူ ဖြစ်သည်။

You may also like...

Leave a Reply

Your email address will not be published. Required fields are marked *