အခွန်လျှော့ပေးရန်မပြောဘဲ တွက်ခြေမကိုက်က လုပ်ငန်းပြောင်းလုပ်ရန် ပလတ်စတစ်လုပ်ငန်းများသို့ စီမံ/ဘဏ္ဍာ ဝန်ကြီးဆို

Voice Logo

ရန်ကုန်၊ ဇူလိုင် ၂၁

 

စီးပွားရေးလုပ်ငန်းရှင်များ အစိုးရကို အခွန်လျှော့ပေးရန်မပြောဘဲ လုပ်ငန်းတွက်ခြေမကိုက်လျှင် အခြားလုပ်ငန်း ပြောင်းလုပ်ရန် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပလတ်စတစ် လုပ်ငန်းများနှင့် ပတ်သက်ပြောကြားသည်။

ဇူလိုင်လ ၂၀ ရက်က UMFCCI ၌ပြုလုပ်သော ဒုတိယသမ္မတ (၁) နှင့် လုပ်ငန်းရှင်များတွေ့ဆုံပွဲတွင် ပြည်တွင်း ပလတ်စတစ်လုပ်ငန်းများသည် ပြည်ပက တင်သွင်းသည့် ပလတ်စတစ်ပစ္စည်းများနှင့် ဈေးကွက် မယှဉ်ပြိုင်နိုင်သောကြောင့် အခွန်လျှော့ချပေးရန် မြန်မာနိုင်ငံ ပလတ်စတစ်လုပ်ငန်းရှင်များအသင်း ဒုတိယ ဥက္ကဌ ဦးသိန်းဟန်က အဆိုပါတွေ့ဆုံပွဲ၌ အကြံပြုတင်ပြခြင်းကို ဝန်ကြီးက ပြန်လည်ပြောကြားခြင်းဖြစ်သည်။

“တံဆိပ်ခေါင်းခွန်ကလည်း ၇ က နေ ၂ ရောက်သွားပြီ။ အဲဒါကိုထပ်လျှော့စရာအကြောင်းမရှိတော့ဘူး။ လျှော့အောင်လုပ်နေတယ်ဆိုရင်တော့ ဘယ်လိုမှ မလုပ်နိုင်တော့ဘူး။ Beyond Limited ဖြစ်နေပြီ။ အဲဒါဆိုရင် တခြားလုပ်ငန်း ပြောင်းရင်ပြောင်း ဒါပဲရှိတော့တယ်” ဟု စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စု ဝန်ကြီး ဦးကျော်ဝင်းက ဆိုသည်။

စီးပွားရေးလုပ်ငန်းရှင်များ တောင်းဆိုသည့်အတိုင်းသာ အခွန်များလျှော့ချပေးနေပါက ကျောင်း၊ လမ်း၊ တံတားများနှင့် လျှပ်စစ်မီးလိုအပ်ချက်များကို ဖြည့်ဆည်းပေးနိုင်မည်မဟုတ်ဟုလည်း ၎င်းက ဆက်လက် ပြောဆိုသည်။

အစိုးရမဟုတ်သော NGO နှင့် INGO အဖွဲ့စည်းများသည် ပြည်တွင်းမှ အခွန်မဆောင်ဘဲ ထောက်ပံ့လည်ပတ် သော အဖွဲ့အစည်းများဖြစ်သောကြောင့် ပြည်တွင်းထုတ်ကုန်များကိုသာ သုံးစွဲကြရေး အစိုးရက ညွှန်ကြားချက် ထုတ်ပေးရန် ဦးသိန်းဟန်က ပြောကြားခဲ့သည်။

“ Marketing လုပ်ပေးပါလို့ ပြောထားတယ်။ တော်တော်အံ့ဩဖို့ ကောင်းတဲ့ကိစ္စ၊ နို့သက်ခံစို့လွန်းအားကြီးတယ်” ဟု စီမံကိန်းနှင့် ဘဏ္ဍာရေးဝန်ကြီးဌာနပြည်ထောင်စုဝန်ကြီးဦးကျော်ဝင်းက အထက်ပါကိစ္စနှင့် ပတ်သက်၍ ပြောကြားသည်။

ပလတ်စတစ်လုပ်ငန်းရှင်များ ကိုယ်တိုင် NGO (အစိုးရမဟုတ်သော အဖွဲ့စည်း) များထံသွားရောက်ပြီး မိမိတို့ ထုတ်လုပ်သည့်ပစ္စည်းကို အသုံးပြုရန် ဦးစွာဆောင်ရွက်ရမည်ဖြစ်ကာ ယင်းကို တင်ပြပြီးမှ ဝန်ကြီးဌာနဘက်က ကူညီပေးမည်ဖြစ်ကြောင်း ၎င်းကပြောကြားသည်။

ပို့ပို့

You may also like...

Leave a Reply

Your email address will not be published. Required fields are marked *