မလေးရှား စီးပွားရေး ထိခိုက်စေရန် မမှန်မကန်သတင်း ထုတ်လွှင့်မှုရှိဟု ဝန်ကြီးချုပ် သတိပေး

ကွာလာလန်ပူ၊ ဇူလိုင် ၂၅

မလေးရှားနိုင်ငံ၏ စီးပွားရေး ထိခိုက်စေရန် ပြည်ပသို့ မမှန်မကန်သတင်းများ ထုတ်လွှင့်မှုများ ရှိနေသည်ကို သတိပြုရန် ဝန်ကြီးချုပ် နာဂျစ်ရာဇတ်က သတိပေးလိုက်ကြောင်း Reuters သတင်းတွင် ဖော်ပြထားသည်။

“ အတ္တကြီးတဲ့နိုင်ငံရေးရည်ရွယ်ချက် ပြည့်စေဖို့ ပင်လယ်ရပ်ခြားဒေသကို သတင်းမှားတွေ ထုတ်လွှင့် ပြီး မလေးရှား စီးပွားရေး ထိခိုက်အောင် လုပ်ဆောင်တဲ့ လုပ်ငန်းစဉ်တွေ ရှိနေပါတယ်” ဟု ၂၀၁၇ မလေးရှားရင်းနှီးမြှပ်နှံရေးဖိုရမ်တွင် ဝန်ကြီးချုပ်နာဂျစ်က အတိုက်အခံများကို သွယ်ဝိုက် ရည်ညွန်း ပြောကြားခဲ့သည်။

ထို့အပြင် အတိုက်အခံများ၏ ခေါင်းဆောင်သစ်စုဖွဲ့မှုသည် နိုင်ငံရေး ပင်စင်စားလူအိုများ အလုပ်ပြန် လုပ်ခိုင်းသည့် ပုံစံဖြစ်နေကြောင်း မလေးရှားစီးပွားရေး ထိခိုက်စေရန် အတိုက်အခံများက မျက်နှာပြောင်တိုက်ကာ လိမ်ညာမှုများထုတ်လွှင့်နေကြောင်း ၎င်းက ဆက်လက် ပြောကြားထားသည်။

သို့ သော်လည်း နာဂျစ်၏ အုပ်ချုပ်ရေးအဖွဲ့သည် ပွင့်လင်းမြင်သာမှု မရှိခြင်း၊ 1MDB နိုင်ငံပိုင် ရင်းနှီးမြှပ်နှံမှုအဖွဲ့ နှင့် ဆက်နွှယ်နေသော အကျင့်ပျက်လာဘ်စားမှု စွပ်စွဲချက်များပေါ်ပေါက် နေခြင်းတို့ကြောင့် အတိုက်အခံများ၏ အပြင်းအထန် တိုက်ခိုက်မှုအောက်ရောက်ရှိလျက်ရှိသည်။

မလေးရှားနိုင်ငံပိုင် 1MDB လုပ်ငန်းနှင့် ဆက်နွှယ်နေသည့် စုံစမ်းစစ်ဆေးမှုများကို အမေရိကန် ပြည်ထောင်စု အပါအဝင် နိုင်ငံ ခြောက်ခုထက် မနည်းတွင် လုပ်ဆောင်လျက်ရှိသည်။

ဖက်ဒရယ် အတိုက်အခံအုပ်စုကို အားပျော့အောင် မည်သည့်နည်းလမ်းဖြင့်မဆို လုပ်ဆောင်မည်ကို ရင်းနှီးမြှပ်နှံမှု ဖိုရမ်၌ ဝန်ကြီးချုပ်နာဂျစ် ပြောကြားမှုက ဖော်ပြနေကြောင်း မလေးရှား ဒုတိယ ဝန်ကြီးချုပ်ဟောင်း အီဘရာဟင်၏ ဇနီးက ထုတ်ပြန်ထားသည်။

ထို့အပြင် ဝန်ကြီးချုပ်နာဂျစ် အနေနှင့် ဖုံးကွယ်ရန် မည်သည့်အရာမျှမရှိပါက ၎င်း၏ အကြီးအကဲ ဟောင်းနှင့် အတိုက်အခံညွန့်ပေါင်းအုပ်စု၏ လက်ရှိဥက္ကဋ္ဌဖြစ်သူ ဒေါက်တာမဟာသီ နှင့် စကားစစ်ထိုး ပြောကြားရန် အတိုက်အခံ ခေါင်းဆောင်များက တောင်းဆိုထားသည်။

 

You may also like...

Leave a Reply

Your email address will not be published. Required fields are marked *