အင်းစိန်အကျဉ်းထောင် ပြုပြင်ပြောင်းလဲချိန်တန်ပြီလား

 

အင်းစိန်အကျဉ်းထောင်အတွင်းရှိ ဌာနအသီးသီး သို့မဟုတ် အကျဉ်းဆောင်အသီးသီးတွင် လောကနိယာမအရ အဆိုး၊ အကောင်း နှစ်မျိုးတွဲနေသည်။ ယင်းတို့အနက် အချုပ်ဆောင်မှာ အချုပ်သူ၊ အချုပ်သားများနှင့် ထောင်အရာထမ်း၊ ဝန်ထမ်းများအတွက် အဆိုး၊ အကောင်း ခြားနားမှု အများဆုံးဟု ဆိုနိုင်သည်။ မည်သည့် ပြစ်မှုနှင့်မဆို တရားရုံးကိစ္စ မပြီးပြတ်သေး၍ အချုပ်ကျသူများအားလုံး အချုပ်ဆောင်သို့ ဝင်ဝင်ချင်း ရှေးယခင်ကတည်းက ပုံစံအမျိုးမျိုးဖြင့် ရှိနေခဲ့ပြီး ထုံးစံကဲ့သို့ ဖြစ်နေသော အစဉ်အလာများကို လိုက်နာကြရသည်။ မလိုက်နာ၍လည်းမရ။ လိုက်နာသူများ မည်သို့၊ မလိုက်နာနိုင်သူများ မည်ပုံခံစားရကြောင်း အတော်များများ သိရှိပြီးဖြစ်ပေမည်။ ထောင်တာဝန်ရှိသူများ မျက်စိတစ်ဖက်ပိတ် ပေးထားသော နိစ္စဓူဝ အမှုကိစ္စကလေးများကြောင့် အချုပ်သားများ အနေအစား ချောင်ခြင်း၊ ကျပ်ခြင်း၊ သက်သောင့်သက်သာဖြစ်ခြင်း၊ ခက်ခဲပင်ပန်းခြင်းတို့ ရှိတတ်သည်။

တစ်ဆင့်ခံ အုပ်ချုပ်သူများ သို့မဟုတ် တန်းစီးများ၊ တန်းစီးတို့၏ လက်ထောက်များက အချုပ်ဆောင်များတွင် အခရာကျလှသည်။ ၎င်းတို့မှာ အချုပ်ကျသူများတော့မဟုတ်။ များသောအားဖြင့် ပြစ်မှုကြီးများဖြင့် နှစ်ရှည်ထောင်ဒဏ်ကျခံနေရသူများသာ။ ၎င်းတို့သည် ထောင်တာဝန်ရှိသူများ မျက်နှာမပျက်စေရန် သို့မဟုတ် မျက်နှာရစေရန် စွမ်းဆောင်နိုင်သူများလည်းဖြစ်ကြသည်။ ထို့ကြောင့် ၎င်းတို့ကို ထောင်မှူးများသာမက ထောင်ပိုင်ကြီးအဆင့်မျိုးကပင် ထိုက်သင့်သော မျက်နှာသာပေးမှုများ၊ သင့်တင့်သည့် လိုက်လျောမှုများဖြင့် ဆက်ဆံရေးကောင်းအောင် တည်ဆောက်ထားကြရသည်။ အချို့ဆိုလျှင် ထောင်မှူးများကပင် အထူးမျက်နှာပေးထားကြရသည်အထိ စွမ်းဆောင်နိုင်ကြသည်။ ထိုသို့ စွမ်းဆောင်နိုင်စေရန် နေ့စဉ်အကြောင်းကိစ္စအမျိုးမျိုး၊ ပုဒ်မအမျိုးမျိုးဖြင့် ယာယီ သို့မဟုတ် ကာလတစ်ခုစာ အပြစ်ဒဏ်မကျမီ ခေတ္တရောက်ရှိလာသူများက ပံ့ပိုးပေးကြရသည်။ ထို့ကြောင့် တန်းစီးအချို့ဆိုလျှင် အခြားထောင်သားများကဲ့သို့ မိမိတို့အိမ်မှအလာကို မျှော်ရသော ပုံမှန်ထောင်ဝင်စာမျိုးထက် မိမိထံမှ အိမ်ကလာယူစရာရှိသော ပြောင်းပြန်ထောင်ဝင်စာသဘောမျိုးပင် ဖြစ်နေသည်။

တန်းစီးနှင့် တန်းစီးအဖွဲ့ဝင်အဖြစ် လွယ်လွယ်ကူကူတော့ ရောက်လာကြခြင်းတော့မဟုတ်။ လမ်းကြောင်းအဖုံဖုံ၊ ဆရာ၊ တပည့် ဆက်ဆံရေးပုံစံ သို့မဟုတ် အခြားအဆက်အသွယ်အမျိုးမျိုးဖြင့် လမ်းကြောင်းဖောက် ချိတ်ဆက်ပြီးမှသာ ဖြစ်လာကြသည်။ အတိတ်ကတော့ ဖိနှိပ်၊ ရက်စက်သော ထောင်ပိုင်များအကြိုက် ခိုင်းစေသမျှ နောက်မတွန့်၊ လက်မရွံ့ ဦးလည်မသုန် ထမ်းရွက်ပေးနိုင်သူများသာ တန်းစီးနေရာကို အပိုင်စားရကြသည်။ မည်သည့်ခေတ်ရောက်ရောက်၊ မည်သို့သော အပြောင်းအလဲမျိုးကြုံကြုံ တန်းစီးများ၏ အခန်းကဏ္ဍကမူ ပြောင်းမသွားသေး။ အခြားထောင်သားများနှင့်မတူ ထောင်ဝင်စာ ပြောင်းပြန်ဖြစ်နေဆဲ။ မိသားစုကို ထောင်အတွင်းမှ ပြန်စောင့်ရှောက်နေကြဆဲ။ ထို့ကြောင့် သတ်မှတ် ပြစ်ဒဏ်စေ့၍ လွတ်မြောက်သွားသည့်တိုင် အပြင်တွင်သိပ်မကြာ။ ပြစ်မှုတစ်ခုခုဖြင့် ထောင်အတွင်း ပြန်ရောက်လာတတ်သည်။ ထိုအခါ ၎င်းမရှိစဉ် တန်းစီးတာဝန် အစားယူထားသူက သူ့ရာထူးကို ချက်ချင်းပြန်လွှဲပေးရသည်အထိ တန်ခိုးထွားကြသည်။ တန်းစီးမပြောနှင့် တန်းစီး၏ လက်ထောက်နှင့် အဖွဲ့ဝင်များဖြစ်လျှင် ယုတ်စွအဆုံး တန်းစီးအဖွဲ့ဝင်တစ်ဦးဦး၏ အသိမိတ်ဆွေဖြစ်လျှင်ပင် အခြားအချုပ်သားများထက်တော့ သက်သာသွားရသည်။ ထို့ကြောင့် တန်းစီးရာထူးသည် တရားဝင်မဟုတ်သော်ငြား နှစ်ရှည်ကျသော ထောင်သားအများစု လိုချင်မက်မောသော ရာထူးဖြစ်နေသည်။ နိုင်ငံရေးနှင့်နွှယ်သော ဖောက်ခွဲမှုပုဒ်မဖြင့် နှစ်ရှည်တိုက်တွင် သေဒဏ်ကျကာ သေဒဏ်မှ တစ်သက်တစ်ကျွန်းပြစ်ဒဏ် ပြောင်းလဲသွားသူတစ်ဦးကမူ ၎င်းကို တန်းစီးလုပ်လိုက လုပ်နိုင်ကြောင်း ကမ်းလှမ်းမှုကို ပယ်ချခဲ့ဖူးသည်။ သူပယ်ချရသော အကြောင်းအရင်းက ရှင်းသည်။ အကြောင်းအမျိုးမျိုးဖြင့် အချုပ်ကျ၊ ထောင်ကျလာသူများထံမှ မိုက်ကြေးခွဲ စီးပွားမရှာလိုသောကြောင့်ဟူ၏။

ယခင်က တန်းစီးဟုခေါ်သော တစ်ဆင့်ခံအုပ်ချုပ်သူများကို ယခုနောက်ပိုင်း သူကြီးဟုပြောင်းခေါ်လာသည်။ နှစ်ရှည်တိုက်များ၊ အထူးဆောင်များမှအပ ကျန်အချုပ်ဆောင်၊ နှစ်တိုဆောင်အားလုံးအပါအဝင် ဆေးရုံတွင်ပါ သူကြီးကိုယ်စီရှိကြသည်။ သူ့နေရာနှင့်သူ သူကြီးနေရာအတွက် ပေါက်ဈေးအမျိုးမျိုးရှိသည်။ များသောအားဖြင့် ထိုသူကြီးနေရာကို ထောင်ပိုင်ကြီးများ သို့မဟုတ် ထောင်ပိုင်ကြီးထံ ဆက်သွယ်အာမခံပေးသူ ထောင်မှူးများ၏ လုပ်ပိုင်ခွင့်ဖြင့် ခန့်ထားပေးသည်။ ထောင်ဝန်ထမ်းအင်အား မလုံလောက်ခြင်းက ထိုတစ်ဆင့်ခံအုပ်ချုပ်သူ သို့မဟုတ် တန်းစီး (ဝါ) သူကြီးများ တရားဝင်တာဝန်ပေးပိုင်ခွင့်ရှိသကဲ့သို့ဖြစ်နေသည်။ ထိုသို့ ခန့်ထားတာဝန်ပေးနေရခြင်းကို အထက်အဆင့်ဆင့်က သိနေလင့်ကစား မတားမြစ်ခြင်းမှာ ထောင်ဝန်ထမ်းနှင့် ထောင်သားအချိုးမမျှခြင်းက အဓိကအချက်ဖြစ်သည်။ ထိုသို့ မခန့်ထားပြန်လျှင်လည်း ထောင်သားများကို လက်ရှိထောင်ဝန်ထမ်းများဖြင့် မည်သို့မျှ နိုင်နင်းစွာ စီမံခန့်ခွဲအုပ်ချုပ်နိုင်မည်မဟုတ်။ ထို့ကြောင့် အကျဉ်းထောင်ဥပဒေ၊ နည်းဥပဒေ၊ လက်စွဲ၊ လုပ်ထုံး၊ လုပ်နည်းများအရ မှန်ကန်သော ထောင်အုပ်ချုပ်မှုပုံစံ မဟုတ်သော်ငြား လက်ခံထားရသည့်သဘောဖြစ်သည်။

ယခင်ကတော့ တန်းစီးဟုဆိုလိုက်သည်နှင့် ထောင်ပိုင်၏ မျက်နှာသာပေးမှုဖြင့် ဘ၀တူ အကျဉ်းသားများအပေါ် အုပ်စုအားကိုး နှိပ်စက်၊ အနိုင်ကျင့်၊ ဗိုလ်ကျ၊ အခွင့်အရေးယူ၊ ငွေညှစ်နေသူ ငရဲသားလက်ထောက်များဟု ဆိုရလောက်အောင် အော့နှလုံးနာစရာကောင်းသူများဖြစ်သည်။ ထောင်ပိုင်၏ အကျင့်စရိုက်အပေါ်မူတည်ကာ တန်းစီးများ၏ ဆိုးသွမ်း၊ ယုတ်မာမှု အတိုင်းအဆ ကွာခြားတတ်သည်။ ပြစ်မှုကျူးလွန်ကြောင်း ထင်ရှားခြင်းမရှိသေးခင် တရားရင်ဆိုင်ဆဲကာလ အင်းစိန်အကျဉ်းထောင် အချုပ်ဆောင်အတွင်း ရောက်လာပါက တန်းစီးများကို လာဘ်ထိုးရန်အသင့်ပြင်လာကြရသည်။ ဘာမျှပါမလာပါက နည်းမျိုးစုံဖြင့် ဒုက္ခပေးခံရသည်။ တန်းစီးကို လာဘ်ပေးနိုင်ခြင်းမရှိပါက အိပ်စရာ တစ်နေရာပင်လျှင် မလွယ်ကူတော့။ အနိမ့်ဆုံး ကျောအပြည့်ချ၍ အိပ်ဖို့ပင် မမျှော်လင့်နိုင်။ ပေးသည့်လာဘ်ပမာဏအပေါ်မူတည်၍ ပန်ကာနှင့် နီးသော အနံ့အသက်မဆိုးသည့်နေရာ၊ အိမ်သာနှင့်ကပ်လျက် သေးနံ့ ချေးနံ့ ထွေးဟောင်သော နေရာ စသဖြင့် ကွာခြားသွားတတ်သည်။ အခန့်မသင့်လျှင် အရိုက်အနှက်၊ အကန်အကျောက် ခံရနိုင်သည်။ အချုပ်ခန်းတွင် တန်းစီးကို တည့်အောင် မပေါင်းနိုင်ပါက ဒုက္ခတွေ့တတ်ကြောင်း အချုပ်ကျ၊ ထောင်ကျဖူးသူတိုင်း သိထားကြသည်။ သို့သော် အမှုရှာနေသော ရဲဖြင့်တွေ့ကာ မအူမလည်ဖြင့် အချုပ်ထဲရောက်ရသူများ၊ နောက်ပိုင်း ပေါ်လာသော တစ်လင်တစ်မယား ဥပဒေအရ မျှော်လင့်မထားဘဲ အချုပ်ကျလာသူ တစ်နည်းအားဖြင့် ပထမဦးဆုံး အချုပ်ကျဖူးသူအများစုကမူ အကြောင်းမသိကြ။ ထို့ကြောင့် များသောအားဖြင့် ထိုအမျိုးအစား အချုပ်ကျလာသူများသာ တန်းစီးဒဏ်ကို ပိုခံကြရသည်။

တန်းစီးများမှာလည်း စင်စစ် သက်ဆိုင်ရာတာဝန်မှူး သို့မဟုတ် ထောင်မှူးကို တစ်ဖက်တစ်လမ်းက အလုပ်အကျွေးပြုနေကြသူများဖြစ်သည်။ ထို့ကြောင့် တန်းစီးများ၏ အပြုအမူ၊ ဆောင်ရွက်ချက်များသည် သက်ဆိုင်ရာအချုပ်၊ ထောင်တို့၏ တာဝန်ရှိသူများ၏ သဘောထားနှင့် စိတ်အခံကို သွယ်ဝိုက်ဖော်ညွှန်းသည်။ သည်အချက်က လက်ရှိအချိန်အထိ တန်းစီးများဖြင့် တစ်ဆင့်ခံအုပ်ချုပ်သော စနစ်တည်မြဲနေရခြင်း၏ အဓိကအကြောင်းတရားလည်းဖြစ်သည်။ အကျဉ်းထောင် အုပ်ချုပ်မှုပုံစံများပြောင်းလဲသွားပြီး ထောင်သားများအတွင်း အခွင့်အရေးများ တိုးတက်လာသော်ငြား တန်းစီးဖြင့် တစ်ဆင့်ခံ အုပ်ချုပ်မှုရှိနေဆဲဖြစ်သည်။ သို့သော် ယခင်အတိတ်ကာလများလောက်တော့ ရက်ရက်စက်စက်၊ ယုတ်ယုတ်မာမာ ပုံစံမျိုးမဟုတ်တော့။ ကြမ်းကြမ်းတမ်းတမ်း၊ ဟိန်းဟောက်၊ ရိုက်ပုတ် ချုပ်ကိုင်ခြင်းပုံစံမျိုးထက် လေသံအေးအေး ချော့မော့သည့်ပုံစံဖြင့် မသိမသာ ခြိမ်းခြောက်၊ အကျပ်ကိုင်သည့်ပုံစံမျိုးပြောင်းသွားသည်။ သို့သော် လိုအပ်လျှင်လိုအပ်သလို ခပ်ကြမ်းကြမ်းပွဲကလေးများကမူ မကြာခဏဆိုသလို ရှိနေတတ်သည်။ တစ်ခါတစ်ရံ ထောင်ဝန်ထမ်းများ၏ အကူအညီပါ ယူ၍ဆုံးမခံရသူများလည်း ရှိသည်။ ယခုနောက်ပိုင်းတွင် တန်းစီးက ပွဲကြမ်းပြနေစရာပင် မလိုတော့လောက်အောင်ပင် အချုပ်ကြေးသဘောမျိုးနှုန်းထားတစ်ခု ပေါက်သွားသည်အထိ ထုံးတမ်းစဉ်လာသဘောမျိုး ဖြစ်သွားသည်ဟုလည်း ဆိုကြသည်။

များသောအားဖြင့် အင်းစိန်အကျဉ်းထောင်အတွင်းရှိ အချုပ်ဆောင်မှ တန်းစီးများကို မည်သည့်ထောင်သားမျှ မလှန်ရဲ။ အုပ်စုလိုက်၊ အတွဲလိုက်အမှုကြီးဖြင့် ထောင်ကျလာသူများရှိမှသာ တန်းစီးဟောင်းများကို ဖြုတ်ချလေ့ရှိသည်။ အချို့အမှုကြီး၊ နှစ်ကြီး၊ မိုက်လုံးကြီး သွေးအေးအေးဖြင့် အင်မတန်ရက်စက်တတ်သော ထောင်သားကြီးအချို့ကိုမူ တန်းစီးများကပင် ကြောက်ရွံ့ရတတ်သည်။ ၎င်းတို့မှာ ကျူးလွန်ထားသော ပြစ်မှုများအရ ထောင်အတွင်းမှာပင် ဘ၀ကို ကုန်ဆုံးရမည့် သေမထူး၊ နေမထူးများဖြစ်သည်။ မည်သူ့ကိုမဆို၊ မည်သည့်ကိစ္စ၊ ပြဿနာကိုမဆို ၎င်းတို့စိတ်အခန့်မသင့်ပါက သေမထူး၊ နေမထူး ပြုမူနိုင်သည်။ ထို့ကြောင့် ၎င်းတို့ကိုမူ ထောင်သားများမဆိုထားနှင့် တန်းစီးများ၊ ထောင်ဝန်ထမ်းများ၊ ထောင်မှူးများကပါ သတိထားဆက်ဆံရသည်။ ဆိုရလျှင် နှစ်ပေါင်းများစွာ တင်းကျပ်၊ ပြင်းထန်သော အုပ်ချုပ်စီမံခန့်ခွဲမှုများနှင့် နှစ်များစွာ ဖြတ်သန်းလာခဲ့သောကြောင့် မည်သို့သော ခေတ်ပြောင်း၊ စနစ်ပြောင်း ကာလ ရောက်နေစေကာမူ တစ်ဆစ်ချိုးတော့ပြောင်းမသွားသေး။ နေရာအချို့တွင် ယခင်ပုံစံဟောင်းနှင့် မယိုးမယိမ်း ရှိနေသေးသည်။ တဖြည်းဖြည်းနှင့်တော့ ပြုပြင်ပြောင်းလဲနေသည်ဆိုသော်ငြား အရိုးစွဲလာခဲ့သော နှစ်ဖက်အမြင်ရှုထောင့်များ၊ ခံယူချက်၊ ရပ်တည်ချက်များ သည့်ထက်ပိုပြောင်းလဲဖို့ လိုနေသေးသည်။

 

(ဆက်လက်ဖော်ပြပါမည်)

ကျော်မင်းဆွေ

ယခင်အပတ်များတွင် ဖော်ပြခဲ့သည့် “အင်းစိန်အကျဉ်းထောင် ပြုပြင်ပြောင်းလဲချိန်တန်ပြီလား” ဆောင်းပါးများ

http://voicejournalmm.com/archives/6038

http://voicejournalmm.com/archives/6158

You may also like...

Leave a Reply

Your email address will not be published. Required fields are marked *