အင်းစိန်အကျဉ်းထောင် ပြုပြင်ပြောင်းလဲချိန်တန်ပြီလား

အင်းစိန်အကျဉ်းထောင်နှင့်ပတ်သက်လျှင် ပြုပြင်ပြောင်းလဲရန် လိုအပ်နေသေးသည့် နေရာဌာနများစွာရှိသည့်ကြားက ကိုလိုနီခေတ်ကတည်းက ဆောက်လုပ်ထားသည့် ထောင်အဆောက်အအုံများ၏ ကြံ့ခိုင်မှု၊ လုံခြုံစိတ်ချရမှုကို ပြန်ဆန်းစစ်ကြည့်ရန်လိုပေမည်။

အပေါ်ယံအားဖြင့် ၂ နှစ်တစ်ကြိမ် သို့မဟုတ် သုံးလေးနှစ်တစ်ကြိမ် ထောင်ဗူးဝရှိ ပင်မအဆောက်အအုံအပြင်ပိုင်းကို ဆေးသုတ်လေ့ရှိသော်လည်း အဆောက်အအုံ၏ ကြံ့ခိုင်မှု၊ မိုးလေလုံခြုံမှုကိုမူ ပြင်ဆင်မွမ်းမံရန် မေ့လျော့နေပုံရသည်။ ထို့ကြောင့် အဆောက်အအုံကို အနီးကပ်ကြည့်လျှင် ညောင်ပင်နှင့် အခြားအပင်ငယ်များ နံရံတစ်လျှောက် တွယ်ကပ်ပေါက် ရောက်နေပြီး တံခါးအချို့၊ ကြမ်းခင်းအချို့မှာ ဆွေးမြည့်စပြုနေပေပြီ။

ကိုလိုနီခေတ်ကပင် ဆောက်လုပ်ထားသော ပင်မအဆောက်အအုံ၏ ကြံ့ခိုင်မှုထက် ပိုဆိုးနေသည်မှာ ယင်းအဆောက်အအုံနောက်ကျော အကျဉ်းထောင်အတွင်းပိုင်းမှ တွဲကပ်ဆောက်လုပ်ထားသော ထောင်ဝင်စာ လက်ခံတွေ့ဆုံသည့် အဆောင်နှစ်ဆောင်ဖြစ်သည်။ ယင်းအဆောင်နှစ်ခုမှာ နောက်ပိုင်းမှ ဆောက်လုပ်ထားခြင်းဖြစ်သော်လည်း ကိုလိုနီခေတ် ပင်မအဆောက်အအုံကြီးလောက် ကြံ့ခိုင်လုံခြုံမှုမရှိပေ။

မှန်ခြား၍ ထောင်ဝင်စာတွေ့ရသော အခန်းငယ်ဆိုလျှင် မိုးမလုံသောကြောင့် မျက်နှာကြက်များ ယိုယွင်းပျက်စီးနေသည့်အပြင် အလူမီနီယံတံခါးမှာလည်း အသံလုံစေရန် ပိတ်ထား၍မရပေ။ အတွင်းတွင် အကျဉ်းသားထိုင်ရန်ထားသော ပလတ်စတစ်ခုံများမှာလည်း အကောင်းပကတိတစ်လုံးမျှရှိမနေပေ။ ရံဖန်ရံခါ ခုံမရှိသဖြင့် ထောင်ဝင်စာ လက်ခံတွေ့သည့် အကျဉ်းသားပြောဆိုသမျှ လိုက်လံမှတ်သားသူ အကျဉ်းထောင်ဝန်ထမ်းက မတ်တတ်ရပ်နေရသည်။ မိုးရွာသော နေ့များဆိုလျှင် သီးသန့်ခန်းအတွင်းရှိ အကျဉ်းသားရော၊ ဝန်ထမ်းပါ ခမောက်ဆောင်း၊ မိုးကာခြုံထားရသည်။

ထို့အပြင် အင်းစိန်အကျဉ်းထောင်အတွင်းသို့ သက်ဆိုင်ရာ ရဲစခန်းအသီးသီးမှ ဖမ်းဆီးခေါ်ဆောင်လာသူများ ဝင်လာချိန်၊ မြို့နယ်အသီးသီးရှိ တရားရုံးများသို့ အမှုရင်ဆိုင်ရန် သွားရောက်သူများ ပြန်လည်ရောက်ရှိလာချိန်တွင် မိုးရွာပါက အကျဉ်းသားအားလုံး မိုးမိခံကြရသည်။ ယင်းသို့ အသစ်ဝင်၊ ရုံးချိန်းပြန်လာသူများကို အချုပ်ရုံးက ထောင်စာရင်းသွင်းကာ သက်ဆိုင်ရာအချုပ်ဆောင်အသီးသီးသို့ နေရာချပို့ဆောင်သည့်အခါတွင်လည်း အကျဉ်းသားအားလုံး မိုးမိကြသည်။ အကျဉ်းသားများ ဖျားနာလျှင် ကုသပေးသည့် ဆေးရုံနှင့် ဆေးဝန်ထမ်းများရှိသော်လည်း အကျဉ်းထောင်အတွက် တာဝန်ပိုသည့်အပြင် ပြင်ပရှိ သက်ဆိုင်ရာအကျဉ်းသား ဆွေမျိုးသားချင်းများ စိတ်ပူပန်သောကရောက်ကြရသည်။ ထိုအတွက် ထောင်ဗူးဝ ပင်မအဆောင်မှ မိန်းဂျေးအထိ၊ မိန်းဂျေးမှ အချုပ်ဆောင်များအထိ အမိုးပါသော စင်္ကြံလမ်းများ ဆောက်လုပ်ပေးခြင်းမျိုး လတ်တလော မလုပ်နိုင်သေးလျှင်ပင် မိုးစဲသည့်အချိန်၊ နေကျဲသည့်အချိန်မျိုးမှ သက်ဆိုင်ရာအဆောင်အသီးသီးသို့ သွားရောက်စေခြင်းဖြင့် လတ်တလော ဖြေရှင်းနိုင်သည်။

အင်းစိန်အကျဉ်းထောင်တစ်ခုလုံးကို ခြုံကြည့်လျှင် ယခုဆောင်းပါး မူလအစက ပြောခဲ့သလို ယခင့်ယခင် အတိတ်ကာလနှင့် နှိုင်းယှဉ်ပါက များစွာပြောင်းလဲတိုးတက်လာသော်ငြား အကျဉ်းထောင်၏ သာမန်ဘတ်ဂျက်နှင့်ပင် နှစ်စဉ်ပုံမှန်ဖြည့်ဆည်းသွားနိုင်သည့် အရာအချို့ ယနေ့ အထိ ရှိနေသေးသည်။ ယင်းသို့ အကျဉ်းထောင်က ဖြည့်ဆည်းရမည့် ကိစ္စများအချို့ကို အကျဉ်းသားများက ကိုယ်ထူကိုယ်ထ ပံ့ပိုးနေကြရသည်။ နိုင်ငံရေးနွှယ်သော ပုဒ်မများဖြင့် အကျဉ်းကျလာသူများနှင့် ပြစ်မှုကြီးများဖြင့် သေဒဏ်၊ တစ်သက်တစ်ကျွန်း နှစ်ရှည်ကျခံရသော အကျဉ်းသားများထားရှိရာ တိုက်ဆောင်များတွင် ထိုကဲ့သို့ ကိုယ်ထူ၊ ကိုယ်ထ ပံ့ပိုးမှုမျိုး တွေ့ရသည်။

အကျဉ်းထောင် ဒုတိယညွှန်ကြားရေးမှူး သို့မဟုတ် ထောင်ပိုင်ကြီးသည် ပုံမှန်အားဖြင့် တစ်ပတ်လျှင် တနင်္ဂနွေနေ့တိုင်း အကျဉ်းဆောင်များကို လှည့်လည်စစ်ဆေးလေ့ရှိသည်။ သက်ဆိုင်ရာ အချုပ်ဆောင်၊ တိုက်ဆောင်မှူးများကမူ တစ်ရက်လျှင် အနည်းဆုံးတစ်ကြိမ် မိမိတာဝန်ကျရာ တိုက်၊ အဆောင်များကို လှည့်စစ်ပေးရသည်။ နေ့ဆိုင်း၊ ညဆိုင်း တာဝန်ကျ ထောင်ဝန်ထမ်းများမှာမူ သက်ဆိုင်ရာထောင်မှူးများ၏ အခါအားလျော်စွာ စေခိုင်းချက်အရ မကြာခဏ လှည့်လည်စစ်ဆေးပေးရန် တာဝန်ရှိသည်။ အင်းစိန်အကျဉ်းထောင်အတွင်းရှိ တိုက်ဆောင်၊ အချုပ်ဆောင်များအားလုံးသည် နာရီလက်တံပုံစံအတိုင်း မိန်းဂျေးအဆောက်အအုံကို ဗဟိုပြု၍ မြေကြီးပေါ်တွင် အစီအရီဆောက်လုပ်ထားခြင်းဖြစ်သည်။ ထို့ကြောင့် အဆောင်တစ်ခုနှင့်တစ်ခုအကြား၊ သက်ဆိုင်ရာ တိုက်၊ အဆောင်ရုံးနှင့် အဆောင်များ၊ တိုက်များအကြား ကူးသန်းသွားလာသည့်အခါ သီးသန့်ဖောက်ထား၊ ခင်းထားသောလမ်း၊ စင်္ကြံမရှိဘဲ သည်အတိုင်း မြေကြီးပေါ်မှသာ သွားကြရသည်။ တိုက်ဆောင်တွင် အကျဉ်းကျနေသော နှစ်ရှည်အကျဉ်းသားအချို့က ၎င်းတို့ သွားလာရလွယ်ကူစေရန်၊ ထောင်ပိုင်ကြီးနှင့် ထောင်မှူး၊ ထောင်ဝန်ထမ်းများ လှည့်လည်စစ်ဆေးရ လွယ်ကူစေရန် ၎င်းတို့ ကိုယ်ပိုင်ငွေဖြင့် အုတ်စီကွန်ကရစ်ခင်း လျှောက်လမ်းများ ဖောက်လုပ်ထားကြသည်။

အတိတ်က နာမည်ကျော် နိုင်ငံရေးအကျဉ်းသားအများစုကို ချုပ်နှောင်ထားလေ့ရှိခဲ့သည့် (၁) တိုက်ဆောင်တွင် ယခင်နိုင်ငံရေးအကျဉ်းသားများက လှူဒါန်းထားခဲ့သော ရုပ်မြင်သံကြားစက်တစ်လုံးရှိနေသည်။ မကြာသေးခင်ကပင် နောက်ထပ်တစ်လုံးကို ပုဒ်မ ၆၆(ဃ) ဖြင့် ဖမ်းဆီးခံခဲ့ရသူ အကျဉ်းသားတစ်ဦးက လှူဒါန်းသွားခဲ့သည်။ ထို့အပြင် (၂) တိုက်တွင် သွယ်တန်းထားသော လျှပ်စစ်မီးကြိုးများ ဆွေးမြည့်ပေါက်ပြဲကာ ဓာတ်လိုက်မည့် အန္တရာယ်ရှိနေသောကြောင့် ယင်းအကျဉ်းသားကပင် မီးကြိုးအသစ်များနှင့် ဒါနပြု လဲလှယ်ပေးသွားခဲ့သည်။ ထို့အပြင် မိန်းဂျေးတွင် တပ်ဆင်ထားသော ရုပ်သံဖမ်းစက်အင်တင်နာ မိုးကြိုးလျှပ်စီးထိပြီး ပျက်စီးသွားသောကြောင့် ယင်းအကျဉ်းသားကပင် အသစ်ဝယ်ယူ တပ်ဆင်ပေးသွားခဲ့သည်။

အကျဉ်းထောင်အတွင်းရှိ လျှပ်စစ်မီး၊ ဆက်သွယ်ရေး၊ ရုပ်သံစက် အစရှိသည်တို့အတွက် တရားဝင်ဝန်ထမ်းများ ခန့်အပ်ထားသော်လည်း အကျဉ်းသားဦးရေနှင့် ဝန်ထမ်းမမျှသောကြောင့် အကျဉ်းသားများထဲကပင် သက်ဆိုင်ရာနယ်ပယ်အလိုက် ကျွမ်းကျင်သူ တစ်ဦး၊ နှစ်ဦးက အလွတ်သဘော တာဝန်ယူဖြေရှင်းပေးနေကြရသည်။ ယုတ်စွအဆုံး အကျဉ်းသားများကို ကျွေးမွေးမည့် တာလပေါဟင်းကိုပင် အကျဉ်းထောင်အတွင်း အကျဉ်းသားများ စိုက်ပျိုးထားသော သီးပင်၊ စားပင်များဖြင့် ပေါင်းစပ်ချက်ပြုတ်နေသည်မှာ ယနေ့အချိန်အထိပင်။ သို့သော် ထိုသို့ချက်ပြုတ်နေသည်မှာ အကျဉ်းထောင်ပရဝုဏ်အတွင်း သဘာဝမြေဩဇာနှင့် သဘာဝအတိုင်း စိုက်ပျိုးထားသည့် သီးပင်၊ စားပင်များဖြစ်သောကြောင့် အကျဉ်းသားများအတွက် အကျိုးရှိပြီး အကျဉ်းထောင်အတွက် မီးဖိုချောင်စရိတ်ကို တစ်ဖက်တစ်လမ်းမှ ကူညီပေးရာရောက်သည်။

အတိတ်အချိန်ကမူ ထို သီးပင်၊ စားပင်များကို မြေကြီးအတွင်းမှ သည်အတိုင်း နုတ်ယူကာ ရေမဆေးဘဲ လက်ဖြင့်ဆိတ်ဖြတ်ကာ ဆီမပါဘဲ ပြုတ်ကျွေးခဲ့သည်။ အကျဉ်းသားများမှာ မြေကြီးအနယ်အမှုန်များ အနည်ထိုင်သွားအောင်စောင့်ပြီး အပေါ်ယံကြည်သွားသည့်အခါမှ ယင်းတာလပေါဟင်းကို စားခဲ့ရသည်။ ယနေ့မူ ထိုအခြေအနေနှင့် လုံးဝနီးပါး ခြားနားသွားပေပြီ။ တစ်ပတ်လျှင် အသားဟင်း နှစ်ကြိမ်မှ သုံးကြိမ်အထိ ကျွေးနေပေပြီ။ တွေ့သမျှ ထမင်းသိုးဟင်းသိုး၊ အပုပ်အစပ်ပင်မရှောင် အစားသောင်းကျန်းသည့် ဝက်သတ္တဝါပင်လျှင် ခေါင်းရမ်းပြီး ငြင်းပယ်ရလောက်သည်အထိ ဆိုးရွားခဲ့သောအတိတ်က ထောင်ထမင်းအစား အစာအိမ်ရောဂါရှိသူနှင့် သက်ကြီးရွယ်အိုများ၊ လူနာများမှအပ မည်သူမဆို အချိန်မရွေးစားနိုင်သည့် ထောင်ထမင်းဖြစ်နေပေပြီ။ အခြားတစ်ဖက်တွင်လည်း အကျဉ်းသားများက ဖြည့်ဆည်းပံ့ပိုးနေရသည်များ လျှော့တန်သလောက် လျှော့သင့်ပေပြီ။

စင်စစ်အားဖြင့် အထက်ဖော်ပြပါ အကျဉ်းသားများ ပြန်လည်ပံ့ပိုးနေရသည့် ကိစ္စရပ်များသည် သက်ဆိုင်ရာထောင်မှူးများ၏ တင်ပြမှုနှင့် အကျဉ်းထောင်က ဖြည့်ဆည်းပေးရမည်ဖြစ်သော်လည်း ထောင်အရာရှိ၊ ဝန်ထမ်းများ၏ တာဝန်ယူမှု၊ တာဝန်ခံမှု အားနည်းချက်ကြောင့် အကျဉ်းသားများက စိုက်ထုတ်ကျခံပေးနေကြခြင်းဖြစ်သည်။ အကျဉ်းဦးစီးဌာနက ပုံမှန်ချပေးသော ဘတ်ဂျက်နှင့် မလုံလောက်ပါက အထောက်အထားနှင့်တကွ ပြင်ဆင်စရိတ် တင်ပြတောင်းခံလျှင် ရနိုင် ပါလျက် ယနေ့အချိန်အထိ အကျဉ်းသားများက ပြန်လည်ပံ့ပိုးနေရခြင်းမှာ ပြုပြင်သင့်လှသည်။

 

(ဆက်လက်ဖော်ပြပါမည်)
ကျော်မင်းဆွေ

You may also like...

Leave a Reply

Your email address will not be published. Required fields are marked *