ပရော်ဖက်ရှင်နယ်… လိုအပ်ချက်

လက်ရှိမြန်မာ့နိုင်ငံရေးအခြေအနေကို သေချာစွာလေ့လာကြည့်လိုက်လျှင် လိုအပ်ချက်တစ်ခုကို ထင်ထင်ရှားရှား တွေ့နိုင်သည်။ ယင်းမှာ ပရော်ဖက်ရှင်နယ်လိုအပ်ချက်ပင်ဖြစ်သည်။ အစိုးရသစ်တက်လာပြီးချိန်မှစ၍ ယနေ့ထိ နိုင်ငံရေး၊ စီးပွားရေးအခြေအနေများ၊ ရလဒ်များကိုကြည့်လျှင် ပရော်ဖက်ရှင်နယ်ဟာကွက် ကြီးကြီးမားမားရှိနေသည်ကို တွေ့နိုင်သည်။

ပရော်ဖက်ရှင်နယ် ဆိုသည်မှာ …

ပရော်ဖက်ရှင်နယ် (Professional ) ဆိုသော ဝေါဟာရမှာ ပညာရပ်နယ်ပယ်၏အသုံးအနှုန်းအနေဖြင့် အလွန်ကျယ်ပြန့်သော စကားလုံးဖြစ်သည်။ လူမှုဗေဒ (Sociology) ဘာသာရပ်၏ ဖွင့်ဆိုမှုက ‘အသိပညာ အတတ်ပညာနှင့်ဆိုင်သော လုပ်ငန်းပိုင်းကျွမ်းကျင်မှု’ ဟု အဓိပ္ပာယ်ဖွင့်သည်။

ပရော်ဖက်ရှင်နယ်ပီသမှုကို ယေဘုယျအားဖြင့် အချက်ငါးချက်ဖြင့် သရုပ်ခွဲသည်။

၁။ စွမ်းရည်ရှိမှု (Competency)
၂။ တာဝန်ယူမှု – တာဝန်ခံမှု (Accountability and Responsibility)
၃။ အထူးပြုလေ့လာမှု နှင့် ကျွမ်းကျင်မှု (Specialize Study and Skill)
၎။ ရိုးသားဖြောင့်မတ်မှု (Integrity)
၅။ မိမိကိုယ်ကိုယ် ယုံကြည်မှုရှိခြင်း (Self – Confident)

စွမ်းရည်ရှိမှု

ပရော်ဖက်ရှင်နယ်များသည် ၎င်းတို့နှင့် သက်ဆိုင်ရာနယ်ပယ်တိုင်းအတွက် အဓိကအားကိုးအားထား ပြုထိုက်သူများဖြစ်သည်။ ပြဿနာဖြေရှင်းမှုပုံစံနှင့် နည်းလမ်းကို ရှာနိုင်သည်။ ဘေးလူကို အပြစ်ပြောခြင်းမှာ ပရော်ဖက်ရှင်နယ်တို့၏ အလုပ်မဟုတ်။ အခြေအနေအချိန်အခါနှင့် ကိုက်ညီသောအဖြေကို ထုတ်နိုင်စွမ်းရှိကြသည်။

တာဝန်ယူမှု – တာဝန်ခံမှု

ပရော်ဖက်ရှင်နယ်များသည် မိမိတို့လုပ်ရပ်၊ ဆုံးဖြတ်ချက်များနှင့်ပတ်သက်ပြီး ဖြစ်ပေါ်လာသော အကျိုးသက်ရောက်မှု အကောင်းအဆိုးများကို တာဝန်ယူရဲ တာဝန်ခံရဲကြသည်။ ခေါင်းမရှောင်တတ်။ ထွက်မပြေးတတ်ပေ။ ပြီးလျှင် အကောင်းဆုံးဖြစ်အောင် ပြန်လည်ပြင်ဆင်နိုင်ကြသူများလည်း ဖြစ်သည်။

အထူးပြုလေ့လာမှုနှင့် ကျွမ်းကျင်မှု

ပရော်ဖက်ရှင်နယ်များအနေနှင့် ၎င်းတို့၏ သက်ဆိုင်ရာပညာရပ်နယ်ပယ်၊ လုပ်ငန်းနယ်ပယ်များနှင့် ပတ်သက်၍ အထူးပြုလေ့လာထားသူများဖြစ်သလို သူမတူအောင် ကျွမ်းကျင်မှုမျိုးလည်း ရှိကြသည်။

ရိုးသားဖြောင့်မတ်မှု

ပရော်ဖက်ရှင်နယ်များသည် ၎င်းတို့၏ပညာနှင့်ပတ်သက်၍ အလွန်တန်ဖိုးထားတတ်ကြသည်။ ပညာနှင့်ယှဉ်သော ဂုဏ်သိက္ခာကို ထိပါးမခံ။ ပညာ ‘စံ’ ကို သိသလို ပညာ ‘မာန်’ လည်း ရှိတတ်ကြသည်။ ပညာနှင့် ကျင့်ဝတ်ကို အလေးအနက်ထားကြသည်။ ထို့ကြောင့်ပင် ၎င်းတို့ထံ၌ ရိုးသားဖြောင့်မတ်မှုကို တွေ့ရသည်။ ထိုရိုးသားဖြောင့်မတ်မှုသည်ပင် ၎င်းတို့၏ ဂုဏ်သိက္ခာလည်း ဖြစ်နေသည်။

မိမိကိုယ်ကိုယ် ယုံကြည်မှု

ပရော်ဖက်ရှင်နယ်များသည် ၎င်းတို့ကျွမ်းကျင်ရာ ပညာရပ်နယ်ပယ်တိုင်းအတွက် မိမိတို့ကိုယ်ကိုယ် မိမိတို့ ယုံကြည်မှုရှိကြသည်။ ထို့ကြောင့် ၎င်းတို့နယ်ပယ်အတွင်း ဝင်ရောက်စွက်ဖက်မှုကို မကြိုက်ကြသလို မလိုအပ်သော အမိန့်အာဏာနှင့် ထိန်းချုပ်မှုတို့ကိုလည်း လက်မခံလိုကြပေ။ သူတို့နယ်ပယ်တွင် လွတ်လပ်စွာလုပ်ကိုင်လိုကြသည်။ ယုံကြည်မှုအပြည့်အဝရှိသူများဖြစ်သောကြောင့် မည်သည့်အခက်အခဲမျိုးကိုမဆို ရင်ဆိုင် ဖြတ်ကျော်နိုင်ကြသည်။

မြန်မာ့နိုင်ငံရေးနယ်ပယ်နှင့် ပရော်ဖက်ရှင်နယ်ပီသမှု

ဒီမိုကရေစီနိုင်ငံတစ်ခုတွင် နိုင်ငံရေးနယ်ပယ်အတွင်းမှ အင်စတီကျူးရှင်းအသီးသီးအနေနှင့် ပရော်ဖက်ရှင်နယ်ဖြစ်နေဖို့လိုသည်။ အစိုးရ၊ လွှတ်တော်၊ တရားစီရင်ရေးမဏ္ဍိုင်အပါအဝင် နိုင်ငံရေးနှင့် သက်ဆိုင်သော အဖွဲ့အစည်းများအားလုံးသည် ပရော်ဖက်ရှင်နယ်ဖြစ်အောင် ပရော်ဖက်ရှင်နယ်ပီသအောင် ကြိုးပမ်းသင့်သည်။

အာဏာရှင်စနစ်တွင် ပြည်သူများသည် အုပ်ချုပ်သူအစိုးရအဖွဲ့ကို စိတ်ကြိုက်ရွေးချယ်ခွင့်မရှိသဖြင့် အစိုးရများ၏ ပရော်ဖက်ရှင်နယ်ဖြစ်ခြင်း မဖြစ်ခြင်းကို စွက်ဖက်ပိုင်ခွင့်မရှိပေ။ ဒီမိုကရေစီအစိုးရတစ်ရပ်ဟူ၍ဖြစ်လာလျှင်တော့ အစိုးရ၏ ပရော်ဖက်ရှင်နယ် ပီသခြင်း ရှိ မရှိကို ပြည်သူက ထောက်ပြခွင့်ရှိလာသည်။ ထို့အတွက် နိုင်ငံရေးနယ်ပယ်အတွင်းမှ အဖွဲ့အစည်းများ ပရော်ဖက်ရှင်နယ်ပီသမှု ရှိခြင်း မရှိခြင်းကို ပြည်သူက နားလည်ကြဖို့ လိုအပ်လာပါသည်။

အစိုးရ

အစိုးရတစ်ရပ်ကို ပရော်ဖက်ရှင်နယ်ပေတံဖြင့် တိုင်းတာရာတွင် အုပ်ချုပ်မှုစွမ်းရည်၊ မူဝါဒချမှတ်ဖော်ဆောင်မှုများ အောင်မြင်မှု ရှိ မရှိ၊ ပြည်သူလူထု၏ လူမှုစီးပွားဘ၀များ တိုးတက်မှုအခြေအနေ၊ အစိုးရ၏ လုပ်ကိုင်ဆောင်ရွက်မှုများအပေါ် တာဝန်ယူမှု – တာဝန်ခံမှု ရှိ မရှိ၊ အဂတိလိုက်စားမှုအနေအထား၊ တိုင်းပြည်ဖွံ့ဖြိုးတိုးတက်မှု အနိမ့်အမြင့် အစရှိသည့်အနေအထားများဖြင့် တိုင်းတာတွက်ချက်နိုင်ပါသည်။

လွှတ်တော်

ဥပဒေပြုရေးကဏ္ဍမှ လွှတ်တော်ကိုယ်စားလှယ်များ၏ ပရော်ဖက်ရှင်နယ်ပီသမှုကိုလည်း တိုင်းတာနိုင်သည်။ လွှတ်တော်ကိုယ်စားလှယ် တစ်ယောက်၏ အဓိကလိုအပ်ချက်မှာ ‘ရွေးကောက်ခံ’ ဖြစ်မှုပင်ဖြစ်သည်။ မိမိကို မဲပေးလိုက်သော ပြည်သူတို့အပေါ် တာဝန်ခံမှုရှိရမည်။ ပါတီအကျိုးစီးပွားနှင့်ယှဉ်လာလျှင် ပြည်သူ့အကျိုးစီးပွားကိုသာ ဦးစားပေးရမည်။ လွှတ်တော်ဆိုင်ရာ လုပ်ငန်းစဉ်များကို နားလည်ကျွမ်းကျင်ရမည်။ အဆိုတင်သွင်းခြင်း၊ ထောက်ခံခြင်း ကန့်ကွက်ခြင်းများနှင့်ပတ်သက်၍ သက်ဆိုင်ရာအကြောင်းအရာများအပေါ် ထဲထဲဝင်ဝင် သိရှိနားလည်ရမည်။ ဥပဒေကိုလေးစားလိုက်နာပြီး ကျင့်ဝတ်၊ သိက္ခာ၊ ပညာနှင့် ပြည့်စုံရမည်။ အစိုးရများအပေါ် ကောင်းစွာထိန်းကျောင်းမောင်းနှင်နိုင်သူများ ဖြစ်ရမည်။

တရားစီရင်ရေး

တရားစီရင်ရေးနယ်ပယ်ကို အများပြည်သူက ယုံကြည်အားကိုးမှု ရှိနေကြပြီလားဆိုသည့် မေးခွန်း၏အဖြေမှန်မှာ ထိုနယ်ပယ်အတွက် ဂုဏ်သိက္ခာဖြစ်ပါလိမ့်မည်။ တရားစီရင်ရေးနယ်ပယ်မှ တရားသူကြီးများ၊ ဥပဒေအရာရှိများအနေဖြင့် မှန်ကန်သော တရားစီရင်မှု၊ ဥပဒေနှင့်အညီ တရားစီရင်မှု၊ ဆန္ဒဂတိ ဘယာဂတိ စသော အဂတိတရားများ ကင်းရှင်းစွာ တရားစီရင်မှုများ ရှိ မရှိကို လေ့လာဆန်းစစ်ခြင်းအားဖြင့် ယင်းနယ်ပယ်၏ ပရော်ဖက်ရှင်နယ်ပီသမှုကို တိုင်းတာနိုင်ပေလိမ့်မည်။ ဥပဒေကို လက်တစ်လုံးခြားပြုသော၊ လှည့်ပတ်ကွေ့ဝိုက်သော၊ အထက်အမိန့်အာဏာနှင့် ဖိအားများ၊ ဘက်လိုက်စီရင်မှုများ၊ စိတ်ခံစားမှုရှေ့တန်းတင်သော သာစေနာစေ အဂတိတရားများ ရှိနေသေးလျှင် ပရော်ဖက်ရှင်နယ် မပီသနိုင်သေးဟု သတ်မှတ်ရပေမည်။

နိုင်ငံရေးနယ်ပယ်အတွင်းမှ ပလေယာများ ပရော်ဖက်ရှင်နယ်ပီသခြင်း ရှိ မရှိကို ပြည်သူက ခွဲခြားတတ်ဖို့လိုသည်။ ပရော်ဖက်ရှင်နယ် မပီသမှုများကို ပြည်သူက ဖိအားပေး၍ ပြုပြင်ခိုင်းနိုင်ရမည်။ အဓိကတာဝန်ရှိသူများမှာ ပြည်သူ၏ဆန္ဒမဲဖြင့်တက်လာသော နိုင်ငံရေးအဖွဲ့အစည်းများပင်ဖြစ်သည်။ အထူးသဖြင့် အုပ်ချုပ်ရေးဥပဒေပြုရေးနယ်ပယ်များသည် ပို၍ ပရော်ဖက်ရှင်နယ်ဆန်ဖို့လိုသည်။

 

လူတော်မွေး – လူတော်ခိုင်း

လူမွေး မတော် – လူတော်ကို မွေး
လူခိုင်း မတတ် – လူတတ်ကို ခိုင်း

အစိုးရအပါအဝင် နိုင်ငံရေးအဖွဲ့အစည်းများသည် မိမိတို့ မွေးထားသောသူများက လူတော်များဖြစ်မလာခဲ့လျှင် တော်ပြီးသားလူများ (လူတော်) ကို ရှာဖွေမွေးမြူနိုင်ရမည်။

မိမိတို့သည် စနစ်တကျမူဝါဒချမှတ်ပြီး နည်းလမ်းတကျခိုင်းစေတတ်သူများမဟုတ်လျှင် တတ်ပြီးသားလူ (လူတတ်) များကို ရှာဖွေခိုင်းစေ တာဝန်ပေးရမည်ဖြစ်သည်။ လူတတ်များသည် အထက်က တာဝန်ပေးသူများ အသုံးမကျခဲ့သည့်တိုင် သူတို့ဘာသာ အသိတရားဖြင့် ပြီးပြည့်စုံအောင် လုပ်ကိုင်ဆောင်ရွက်နိုင်ကြသည်။

× × × × ×

ဤမျှဆိုလျှင် မြန်မာ့နိုင်ငံရေးနယ်ပယ်၌ ပရော်ဖက်ရှင်နယ် လိုအပ်ချက် ရှိ မရှိကို စာရှုသူများ ဆဝါးနိုင်ကြလိမ့်မည်ထင်သည်။ နိုင်ငံရေးတွင် ချိန်သားကိုက်ဖြစ်မှုက အရေးကြီးသည်။ အထူးသဖြင့် ငါးနှစ်သာအချိန်ရသော ဒီမိုကရေစီအစိုးရအတွက် အချိန်သည် အသက်ပင်ဖြစ်သည်။ လက်ရှိရလဒ်များကိုကြည့်ပြီး လူပြောင်းမလား၊ မူပြောင်းမလား၊ လူရော မူရော ပြောင်းမလား၊ ဘာမှမပြောင်းဘဲ သည်အတိုင်း ဆက်သွားမလားဆိုတာ အချိန်မီဆုံးဖြတ်ရမည်။ လက်ရှိပရော်ဖက်ရှင်နယ် မဖြစ်သူတွေနေရာမှာ ပရော်ဖက်ရှင်နယ်စစ်စစ်တွေကို အချိန်မီအစားထိုး နိုင်ခဲ့မည်ဆိုပါလျှင် တာထွက်မကောင်းခဲ့သည့်တိုင် အစိုးရ၏ လက်ကျန် သုံးနှစ်ကတော့ ပန်းဝင်လှသွားနိုင်သည်။

ပရော်ဖက်ရှင်နယ်လိုအပ်ချက်ကို သတိပြုမိဖို့နှင့် ပရော်ဖက်ရှင်နယ်တွေကို အချိန်မီဆွဲယူအသုံးချနိုင်ဖို့ လိုအပ်လှပါကြောင်း သတိထောက်လိုရင်းသာဖြစ်ပါသည်။

ဝင်းကို

You may also like...

Leave a Reply

Your email address will not be published. Required fields are marked *