ကျူးရှင်းလင်းရေး စစ်မျက်နှာအသစ်

မန္တလေးတိုင်းအစိုးရက ကျူးကျော်တို့ကို စစ်မျက်နှာသစ်ဖွင့်လှစ်လိုက်ပြန်ပြီ။

အစိုးရအဆက်ဆက် မလုပ်ဆောင်နိုင်ခဲ့သေးသည့် ကျူးကျော်စာရင်းကောက်ယူရန်နှင့် ယင်းကျူးကျော်တို့ကို မှတ်ပုံတင် ရန် မန္တလေးမြို့တော်စည်ပင်သာယာရေး ကော်မတီက ကြံရွယ်နေခြင်းဖြစ်သည်။

မည်သို့ မှတ်ပုံတင်မည်နည်း။ စာရင်းကောက်ယူ၍ လက်ဗွေအမှတ်အသားရယူခြင်း၊ မျက်နှာဖတ်စက်တို့ဖြင့် မှတ်တမ်းတင်ခြင်းများ ပြုလုပ်ကာ ကျူးကျော်များကို မှတ်ပုံတင်သွားမည်ဟု မန္တလေးမြို့တော်ဝန် ဒေါက်တာရဲလွင်က ရှင်းပြသည်။

မန္တလေးတိုင်းအတွင်းရှိ မြို့အသီးသီးတွင် ကျူးကျော်များ ရှိကြသည်။ လူမနေသည့် ခြံဝင်းအလွတ်များအနီးတွင် ဖြစ်စေ၊ မြေကွက်လပ်များ၊ လမ်းမြေများကို ကျူး၍ လည်းကောင်း တဲထိုး၍ နေထိုင်တတ်ကြသည်။

ထိုမျှမက လျှပ်စစ်သွယ်တန်းသည့် တာဝါတိုင်အောက်တွင်ဖြစ်စေ၊ ရေဆိုးပစ်ချောင်းမြောင်းများအနီးတွင် ဖြစ်စေရသည့်ပုံစံဖြင့် ကျူးကျော်နေထိုင်ကြလေသည်။

အနယ်နယ်အရပ်ရပ်မှ လာရောက်ကာ ကျူးကျော်နေထိုင်မှုမျာများပြားလာသဖြင့် မြို့တော်ဖွံ့ဖြိုးရေးနှင့် သန့်ရှင်းသာယာလှပရေးကို ထိခိုက်စေသည်ဟု ခံစားနေရသူက ပြည်ကြီးတံခွန်မြို့နယ်မှ အထက်တန်းရှေ့နေလည်းဖြစ်၊ လွှတ်တော်ကိုယ်စားလှယ်လည်းဖြစ်သည့် ဦးဇော်မောင်မောင် ဖြစ်သည်။

ကျူးကျော်စာရင်းဇယား အတိအကျမရှိသည့်အတွက် ဒုစရိုက်မှုကျူးလွန်သူများ၊ မူးယစ်ဆေး ရောင်းဝယ်သုံးစွဲသူများ၏ ခိုအောင်းနေထိုင်ရာ နေရာတစ်ခုသဖွယ်လည်းဖြစ်နေသည်ဟု ၎င်းက ဆိုသည်။

မန္တလေးမြို့တော်စည်ပင်သာယာရေးနယ်နိမိတ်အတွင်း ပြည်ကြီးတံခွန် မြို့နယ်သည် ကျူးကျော်များ အများဆုံးရှိသည့် မြို့နယ်တစ်ခုဖြစ်သည်။ စက်မှုလုပ်ငန်းကို အဓိကလုပ်ကိုင်နေသည့် မြို့နယ်ဖြစ်သည့်အားလျော်စွာ အနယ်နယ် အရပ်ရပ်မှ အလုပ်လာရောက်လုပ်ကိုင်သူ များရှိပြီး နေအိမ်ငှားရမ်းနေထိုင်ရန် ဈေးနှုန်းကြီးမြင့်ခြင်းက ကျူးကျော်များ ဖြစ်ပေါ်စေရန် အခွင့်အလမ်းကောင်းဟု ဦးဇော်မောင်မောင်က သုံးသပ်သည်။

ပြည်ကြီးတံခွန်မြို့နယ်တွင် အိမ်ခြေ သုံးသောင်းနီးပါးနှင့် လူဦးရေတစ်သိန်းခွဲကျော်နေထိုင်သည်။ ယင်းအနက် ကျူးကျော် နေထိုင်သူများမှာ နေအိမ် ရှစ်ထောင်နီးပါးနှင့် လူဦးရေ သုံးသောင်းကျော်ရှိသည်ဟု ၂၀၁၆ ခုနှစ်တွင် အစိုးရကကောက်ခံခဲ့သည့် တရားဝင်စာရင်းအရ သိရှိရသည်။

ယင်းကျူးကျော်များကို အမျိုးအစားခွဲခြားကြည့်လျှင် လမ်းကျူး၊ တာဝါတိုင်ကျူး၊ ချောင်းကျူး၊ သံလမ်းကျူး၊ မြောင်းကျူး၊ ထရန်စဖော်မာဝင်းကျူး၊ ဝင်းခြံကျူးဟူ၍ ပုံစံမျိုးစုံ ရှိသည်။

“ဒေသအသီးသီးကနေ စားဝတ်နေထိုင်ရေး၊ စီးပွားရေးအခက်အခဲတွေကြောင့် မြို့ပေါ်ကို ရောက်လာပြီးမှ နေစရာမရှိလို့ ကျူးကျော်နေထိုင်တဲ့သူက နည်းပါတယ်။ အများစုက အုပ်စုဖွဲ့ကျူးကျော်ကြတဲ့ စီးပွားဖြစ်ကျူးတွေပေါ့” ဟု ဦးဇော်မောင်မောင်က ရှင်းပြသည်။

စီးပွားဖြစ်ကျူးကျော်များအတွက်ကလည်း မက်လောက်စရာဖြစ်သည်။ မြေဈေးနှုန်း ကြီးမြင့်သည့် စီးပွားရေး မြို့တော်မန္တလေးတွင် အုပ်စုဖွဲ့ကျူးကျော် နေထိုင်ကာ ယင်းနေရာများကို ပေနှစ်ဆယ်ပတ်လည် တစ်ကွက်လျှင် ငွေကျပ်ဆယ်သိန်းမှ သိန်းသုံးဆယ်ခန့်အထိဖြင့် ရောင်းချနေကြသည်။

လိုအပ်သည့် စာရွက်စာတမ်းအထောက်အထားများကို အဂတိလိုက်စားသည့် တာဝန်ရှိသူအချို့ထံမှ ရရှိကြပြီး ဝယ်ယူသူ ယုံကြည်အောင် ပြောဆိုရောင်းချကြသည်။ ယင်းအထဲတွင် ပြည်သူနှင့် အနီးစပ်ဆုံးဖြစ်သည့် ရပ်ကွက်အုပ်ချုပ်ရေးမှူးအချို့လည်း ပါဝင်နေသည်ဟု နီးစပ် သူများထံမှ သိရှိရသည်။

နောက်တစ်မျိုးက ထိုထက် အဆင့်မြင့်သည်ဟု ပြောရမည်။ ပိုင်ရှင်ရှိသော်လည်း မနေထိုင်သည့် ခြံဝင်းများတွင် ခပ်တည်တည်ဖြင့် ကျူးကျော်နေထိုင်ကြသည်။ ပိုင်ရှင်ပေါ်လာလျှင် ပြဿနာရှာ၍ လျော်ကြေးတောင်းတတ်သည့် ကျူးအမျိုး အစားဖြစ်သည်။ လျော်ကြေးကလည်း မက်လောက်စရာပင်။

ကျပ်သိန်း ငါးဆယ်ခန့်မှ ကျပ်သိန်း သုံးရာဝန်းကျင်အထိ တောင်းဆိုတတ်ကြပြီး ပေးလိုက်ရသူများလည်း ရှိသည်။ ထို့သို့ ငွေကြေးရရှိလျှင် ၎င်းတို့၏ ကျူးကျော် သံသရာချုပ်ငြိမ်းသွားပြီ မထင်ပါနှင့်။ အခြား တစ်နေရာထပ်ရှာကာ ကျူးကျော်ရင်း ခွင်ကောင်းကောင်း စောင့်ဆိုင်းနေကြသည်။ ဤသို့ဖြင့် ကျူးကျော်များ သံသရာလည်ပတ်နေခြင်းဖြစ်သည်။

နောက်ထပ် ရှိသေးသည်။ ထိုကျူးကျော်ကျတော့ တစ်မျိုး။ မြေကွက်လပ်တွေ့လျှင် ကျူးကျော်နေအိမ်များ ဆောက်လုပ်၍ ငှားစားခြင်းဖြစ်သည်။ တစ်လလျှင် ကျပ်နှစ်သောင်းမှစ၍ ကျပ်ငါးသောင်းခန့် အထိ သက်သာသည့်နှုန်းထားဖြင့် ငှားရမ်းသဖြင့် လစာနည်းသည့် ကုမ္ပဏီဝန်ထမ်း ငယ်များ၊ ဝင်ငွေနည်း မိသားစုများက ငှားရမ်းနေထိုင်တတ်ကြသည်။

“ဒီလိုကိစ္စမျိုးတွေကို စနစ်တကျ သိမ်သိမ်မွေ့မွေ့ကိုင်တွယ်ဖြေရှင်းဖို့ လိုအပ်ပါတယ်။ ပိုင်ဆိုင်မှု မပြသနိုင်ဘဲ ကျူးကျော်ဆောက်လုပ်မှုတွေ အများကြီးရှိတယ်” ဟု ဦးဇော်ဇော်မောင်က ပြောသည်။

ကျူးကျော်အမျိုးမျိုးရှိသော်လည်း သူဌေးကျူး၊ စီးပွားဖြစ်ကျူးနှင့် အခြေခံကျူး ဟူ၍သုံးမျိုးကို ခွဲခြားသိထားရမည်ဖြစ် သည်။ ယင်းအနက် ခေတ်အဆက်ဆက် မြစ်ပွားနာကဲ့သို့ ဖြစ်နေသည်က သူဌေးကျူးနှင့် စီးပွားဖြစ်ကျူးဖြစ်သည်။ နေထိုင်စရာမရှိသဖြင့် ကျူးကျော်သည့် အခြေခံ လူတန်းစားများက နေထိုင်ရန်နေရာ သတ်မှတ်ပေးလိုက်လျှင် ပပျောက်သွားနိုင်သော်လည်း စီးပွားဖြစ်ကျူးနှင့် သူဌေး ကျူးများကတော့ ဖယ်ရှားရန် မလွယ်ကူဟု ဆိုရမည်ဖြစ်သည်။

မန္တလေးမြို့တော်အတွင်း အမှန်တကယ် နေထိုင်စရာမရှိသဖြင့် ဝမ်းရေးကို ဖြေရှင်းရန် ကြုံရာကျပန်း လုပ်ကိုင်ရင်း အဆင်ပြေသည့် မြေကွက်လွတ်များတွင် ဝင်ရောက်နေထိုင်သည့် အခြေခံလူတန်းစားကျူးများကို ကမ်းနားလမ်းတစ်လျှောက်နှင့် မြို့သစ်ဘက်ရှိ ရပ်ကွက်အချို့တွင် တွေ့မြင်နိုင်သည်။ 

စီးပွားဖြစ်ကျူးသူများကျတော့ ရပ်ကွက်အတွင်းပိုင်းများအထိ ဝင်ရောက်ကာ ဥပဒေကို သိလျက်နှင့် ကျူးကျော်ကြသူများဖြစ်သည်။ ၎င်းတို့က အဆင်ပြေလျှင် ယင်းမြေများကို အရောင်းအဝယ်ပြုလုပ်ကြမည် ဖြစ်သည်။

အထက်ပါ ကျူးနှစ်မျိုးကို အရေးယူဖြေရှင်းရန် လွယ်ကူသေးသော်လည်း သူဌေးကျူးကိုကျတော့ ဖြေရှင်းရန် မလွယ်ကူသလို အရေးယူရန်လည်း ခက်ခဲမှုရှိနေသည်။ ငွေကြေးတတ်နိုင်သည့် သူဌေးများက ဥပဒေကိုချောင်ထိုး၍ သက်ဆိုင်ရာသို့ ငွေပေးကာ တရားဝင်ကျူးသည့် သူဌေးကျူးဖြစ်သည်။

“ကျွန်တော်တို့ ပြင်ဦးလွင်မြို့နယ်မှာလည်း ရှိတယ်။ မြို့စည်ပင်နယ်နိမိတ်ထဲမှာကို ကျူးကျော်တဲ့သူ သုံးထောင်ကျော် ရှိနေတယ်။ အဲဒီထက်က ၇၀ ရာခိုင်နှုန်း လောက်က ဝမ်းရေးကို ခက်ခက်ခဲခဲ ဖြေရှင်းနေကြရတဲ့ ကျူးတွေ ဖြစ်တယ်။ သူတို့ကို ဖြေရှင်းဖို့ကျတော့ စေတနာကို တလွဲမြင် ပြီး အစိုးရရဲ့ ပုံရိပ်ကို ထိခိုက်မှုတွေ ဖြစ်နိုင်လို့ သေချာလုပ်ဖို့ လိုအပ်တယ်” ဟု ပြင်ဦးလွင် မြို့နယ် တိုင်းဒေသကြီး လွှတ်တော်ကိုယ်စားလှယ် ဦးအောင်မင်းက ပြောသည်။

ကျူးကျော်ကိစ္စသည် ရင်းနေသည့် အနာလည်း ဖြစ်သည်။ ယင်းအနာကို ကုသရန်အတွက် ပထမဆုံးမှာ ကျူးကျော်စာရင်းအမှန် ကောက်ယူနိုင်ရန် ဖြစ်သည်။ အစိုးရသစ်တက်လာပြီး ရက် ၁၀၀ စီမံကိန်းတွင် ယင်းကျူးကျော်စာရင်းကောက် ယူရန် ၂၀၁၆ ခုနှစ်က ကြိုးပမ်းခဲ့သော်လည်း အဆင်မပြေသည့် မြို့နယ်များရှိခဲ့သည်။

စာရင်းကောက်ယူရန် ပြင်ဆင်ချိန် ယင်းကျူးများက မထူးဇာတ်ခင်း၍ ရန်ပြုမည့်ဟန်ရှိသဖြင့် ကောက်ယူခြင်း မပြုနိုင်ခဲ့ကြောင်း၊ အမရပူရမြို့၏ အထင်ကရ ဦးပိန်တံတားပေါ်တွင်ပင် အမြဲတမ်းကျောက်ချ၍ ဈေးရောင်းချနေသည့် ကျူးကျော်များ ရှိနေကြောင်း၊ တံတားအနောက်ဘက် တောင်မင်းကြီးဘုရားအနီးတွင်လည်း ဂေါပကနှင့် ဆရာတော်တို့ကို ခုတုံးလုပ်ကာ ကျူးကျော်နေထိုင်နေသူများ ရှိနေကြောင်း အမရပူရမြို့နယ် တိုင်းဒေသကြီး လွှတ်တော်ကိုယ်စားလှယ် ဦးမြင့်ဆွေက ရင်ဖွင့်သည်။

“စာရင်းကောက်တဲ့အချိန်မှာ အပြောမတတ်တဲ့ ဝန်ထမ်းအချို့က မင်းတို့ အစိုးရသစ်က ကောက်ခိုင်းလို့ဆိုပြီး ပြောဆိုတာတွေကိုလည်း ကြားခဲ့ရတယ်။ တကယ်ဆို ချက်ချင်းဖျက်မှာ မဟုတ်ပါဘူး။ ကျူးဘ၀ကနေ ပြောင်းလဲနိုင်ဖို့ ပူးပေါင်းပေးကြပါဆိုပြီး ပြောဆိုလို့လည်း အဆင်ပြတာပဲ” ဟု ဦးမြင့်ဆွေက ဆိုသည်။

စစ်ကိုင်းဘက်မှ အမရပူရမြို့သို့ အဝင်လမ်းနံဘေးများတွင် ကျူးကျော်နေထိုင်သူတို့၏ တဲအိမ်ငယ် ဘုစုခရုများက မြင်မကောင်းအောင်ပင် ရှိနေပြီး လမ်းအန္တရာယ်၊ ယာဉ်အန္တရာယ်ပင် စိုးရိမ်ဖွယ် ဖြစ်နေသည်။

ကျူးစာရင်းကောက်ယူနိုင်ရန်ဆိုလျှင် ရပ်ကွက်၊ ကျေးရွာအုပ်ချုပ်ရေးမှူးတို့၏ အခန်းကဏ္ဍက အရေးပါလှသည်။ သူတို့သည် အဓိကအကျဆုံးပုဂ္ဂိုလ်များ ဖြစ်ပြီး တာဝန်သိမှု၊ တာဝန်ကျေမှုအပေါ် များစွာ မူတည်နေပေသည်။

သို့သော် ကျူးကျော်များရှိနေခြင်းသည် အာဏာမက်မောသည့် အုပ်ချုပ်ရေး တာဝန်ရှိသူတို့၏ မဲအင်အား စုဆောင်းရာ နေရာတစ်ခုသဖွယ်လည်း ဖြစ်နေသည့်အတွက် စနစ်တကျ ဖြေရှင်းရန် လိုအပ်လှကြောင်း ဦးဇော်မောင်မောင်က သတိပေးသည်။

ရပ်/ကျေး အုပ်ချုပ်ရေးမှူးဥပဒေ နှင့် နည်းဥပဒေများတွင် ယင်းကဲ့သို့ အစိုးရပိုင်မြေများကို ကျူးကျော်သူများရှိလျှင် တားမြစ်ရန်နှင့် မလိုက်နာပါက အရေးယူရန် အကြောင်းကြားရမည်ဟု ပြဌာန်းထားသည်။ သို့သော် လိုက်နာသည့်သူက မရှိသလောက် နည်းပါးနေသည်။

“အစိုးရမြေပေါ်မှာ ကျူးနေရင် အစိုးရက အချိန်မရွေး နှင်ထုတ်လို့ရတယ်” ဟု ပြောလာသူက တရားလွှတ်တော်ရှေ့နေ ဦးတင်အောင် ဖြစ်သည်။

အစိုးရမြေဖြစ်သည့် သံလမ်းဘေး၊ တာဝါတိုင်အောက်၊ ချောင်းဘေး မည်သည့်နေရာတွင်ဖြစ်စေ အချိန်မရွေး နို့တစ်စာ ထုတ်၍ နှင်ထုတ်ခွင့်ရှိသည်ဟု ၎င်းက ဆိုသည်။

နှင်ထုတ်သော်လည်း မဖယ်ရှားပါက အထက်မြန်မာပြည် မြေနှင့် အခွန်တော် စည်းမျဉ်းဥပဒေပုဒ်မ ၆၉(၂) အရ တရား စွဲဆို၍ရနိုင်ပြီး ပြစ်မှုထင်ရှားလျှင် ထောင်ဒဏ် တစ်လအထိကျခံရမည်ဖြစ်သည်။

“ဒါပေမဲ့ မန္တလေးတိုင်းဒေသကြီး အနေနဲ့ မြို့တော်စည်ပင်သာယာရေးဥပဒေမှာ ပြဋ္ဌာန်းပြီးသားဖြစ်လို့ အဲဒီဥပဒေနဲ့ အရေးယူလို့ရပါတယ်။ ဒါပေမဲ့ အရမ်းပြင်းထန်တယ်။ ထောင်ဒဏ်တစ်နှစ်အထိ ချနိုင်တဲ့အပြင် ဒဏ်ငွေကျပ်ငါးသောင်းကနေ တစ်သိန်းအထိ ချလို့ရတယ်။ ဆက်ပြီး ကျူးကျော်နေရင်၊ နေ့တိုင်းကျူးရင် နေ့တိုင်း ဒဏ်ငွေသတ်မှတ်လို့ ရတဲ့အနေအထား ဖြစ်ပါတယ်” ဟု ဦးတင်အောင်က ရှင်းပြသည်။

သို့သော် ယင်းဥပဒေဖြင့် အရေးယူခံရသူ တစ်ဦးတလေမှ မရှိသေးပေ။

ကျူးကျော်နေထိုင်သူများသည် တစ်နေရာတွင် ဖယ်ရှားရှင်းလင်းပါက အခြားနေရာသို့ ပြောင်းရွှေ့ကျူးကျော်နေထိုင်ကြပြီး အလုပ်အကိုင်အခွင့်အလမ်းနှင့် အခွင့်အရေးရလိုသည့် ကျူးများ၊ မြို့ပေါ် ပြောင်းရွှေ့နေထိုင်လုပ်ကိုင်စားသောက်ရန် ရောက်လာမှုများက ကျူးများ တိုးပွားလာသည့် အကြောင်းရင်းဟု မန္တလေး မြို့တော်ဝန် ဒေါက်တာရဲလွင်က ညည်းတွား ပြောဆိုသည်။

” ကျူးအစစ် ဟုတ် မဟုတ် သေချာ စိစစ်ပြီးမှ ဖယ်ရှားရှင်းလင်းရမယ်။ ရှင်းလင်းရာမှာလည်း သင့်တင့်တဲ့နှုန်းထားများနဲ့ နေထိုင်နိုင်ရေး မဆောင်ရွက်ပေးဘူးဆိုရင် မလိုလားအပ်တဲ့ ပြဿနာတွေ ဖြစ်ပေါ်လာနိုင်တဲ့အပြင် နယ်မြေသစ်တွေမှာ ထပ်ကျူးနေကြဦးမှာပဲ”ဟု ၎င်းက ဆိုသည်။

ကျူးများစွာထဲမှ ငွေကြေးကိစ္စအတွက် ကျူးကျော်သည့် စီးပွားဖြစ်ကျူးများကို ထိထိရောက်ရောက် အရေးယူနိုင် ရန်နှင့် ထောင်ဒဏ်ချမှတ်နိုင်ရန် လိုအပ်သည်ဟု ဒေါက်တာရဲလွင်က ပြောသည်။

” အသစ် တိုးလာမယ့်သူတွေကိုလည်း ပြင်းထန်စွာအရေးယူဖို့ လိုအပ်ပါတယ်” ဟု ၎င်းကဆိုသည်။

သို့သော် အထက်တွင် ဖော်ပြခဲ့သည့် စည်ပင်နယ်နိမိတ်အတွင်း ငွေပေး၍ တရားဝင်ကျူးသည့် သူဌေးကျူးများကို ဖယ်ရှားရှင်းလင်းရန် ပြင်ဆင်ထားပုံ မရသေး။

၂၀၁၈ ခုနှစ်အတွင်းတွင် စီးပွားဖြစ် ကျူးနှင့် အခြေခံကျူးတို့ကို စိစစ်ကောက်ယူ၍ ဖယ်ရှားရှင်းလင်းနိုင်ရန် လုပ်ဆောင်မည်ဟု မန္တလေးမြို့တော် စည်ပင်သာယာရေးကော်မတီက ကတိပြု ပြောဆိုထားပြီး ဖြစ်သည်။

ကျူးရှင်းလင်းရေးကို စည်ပင်တစ်ဦးတည်းက မတတ်နိုင်သဖြင့် လွှတ်တော်ကိုယ်စားလှယ်နှင့် ဌာနပေါင်းစုံ ပါဝင်သည့် ကျူးရှင်းလင်းရေးကော်မတီကိုလည်း ထပ်မံဖွဲ့စည်းရန် လိုအပ်မည်ဖြစ်သလို Finger နှင့် Face Detector ဟု ခေါ်သည့် လက်ဗွေနှင့် မျက်နှာဖတ်သည့် စနစ်တို့ဖြင့် ကျူးမှတ်ပုံတင်များ ပြုလုပ်သွားမည် ဆိုသည်။

” ကျူးဆိုတာက အရင်အစိုးရ အဆက်ဆက်ရဲ့ အမွေဆိုးဖြစ်တယ်။ ဒီလို ခေတ်မီနည်းစနစ်တွေနဲ့ လုပ်မယ်ဆိုရင်တော့ ကျူးရှင်းလင်းရေး အောင်မြင်နိုင်မယ်။ အခုချိန်ထိ လုပ်နေတာကတော့ လျော့ရဲမှုတွေ ရှိနေလို့ မအောင်မြင်နိုင်သေးဘူး” ဟု ပြည်ကြီးတံခွန်မြို့နယ်တိုင်းဒေသကြီး လွှတ်တော်ကိုယ်စားလှယ် ဦးဇော်မောင်မောင်က သုံးသပ်ပြောဆိုလေသည်။

တိုင်းဒေသကြီး အစိုးရအဖွဲ့ကတော့ဖြင့် ယခုနှစ်အတွင်း ကျူးရှင်းလင်းရေး စစ်မျက်နှာအသစ်ကို ထပ်မံဖွင့်လှစ်မည်ဟု ကျုံးဝါးထားသည်။ ယခင်အစိုးရများနည်းတူ လက်ပန်းကျမည်လော၊ ကျူးများ အမှန်တကယ်ပပျောက်ကာ အလံဖြူ ပြသွားမည်လားဆိုသည်ကိုတော့ အချိန်ပိတ်ကားထက်မှသာ စောင့်ကြည့်ရမည် ဖြစ်သည်။

မြတ်(ကလေး)

You may also like...

Leave a Reply

Your email address will not be published. Required fields are marked *