အင်းစိန်အကျဉ်းထောင် ပြုပြင်ပြောင်းလဲချိန်တန်ပြီလား

အင်းစိန်အကျဉ်းထောင်၏ အခြေအနေများ ယခင်ထက်စာလျှင် များစွာပြောင်းလဲသွားခြင်းမှာ အကြောင်းရှိသည်။ ကုလသမဂ္ဂ လက်အောက်ခံ နိုင်ငံတကာလူ့အခွင့်အရေးစောင့်ကြည့်လေ့လာရေးအဖွဲ့အပါအဝင် နိုင်ငံတကာကြက်ခြေနီအဖွဲ့တို့၏ စဉ်ဆက်မပြတ်တောင်းဆိုဆော်ဩမှုများကြောင့်ဟု ယေဘုယျဆိုနိုင်သည်။ သို့သော် ၎င်းတို့၏တောင်းဆိုမှုများ အလိုအလျောက် ပေါ်ပေါက်လာခြင်းတော့ မဟုတ်။ အင်းစိန်အကျဉ်းထောင်အတွင်း လူမဆန်စွာ နှိပ်စက်ညှဉ်းပန်းခံခဲ့ရသော နိုင်ငံရေးအကျဉ်းသားများ၏ ဖော်ထုတ်၊ ပြောဆို၊ ရေးသားမှု တို့ကိုအကြောင်းပြု၍ ပေါ်ပေါက်လာခြင်းဖြစ်သည်။ ထိုနိုင်ငံရေးအကျဉ်း သားများ ထုတ်ဖော်ပြောဆိုလာရန်အတွက်လည်း အရပ်ဘက်လူ့အဖွဲ့ အစည်းအချို့က ကူညီပံ့ပိုးပေးခဲ့သည်။

အဆုံးသတ်တွင် နှစ်ပေါင်းများစွာ လောကလူ့ငရဲပမာ ပုပ်အဲ့နံစော်ညစ်ထေးနေသော အင်းစိန်အကျဉ်းထောင်ကြီး ရေချိုး၊ ချေးတွန်း သန့်စင်ခွင့်ရခဲ့သည်။ အင်္ကျီအသစ်ဝတ်၍ သနပ်ခါးလိမ်း၊ ပန်းပန်လာနိုင်ခဲ့ သည်။ ရုပ်ပိုင်းဆိုင်ရာ အပြောင်းအလဲများက သိသိသာသာ ရှိလှသည်။ သည်အပြောင်းအလဲများ ဖြစ်ပေါ်လာစေရန် အသက်စွန့်သွားခဲ့ရသော နိုင်ငံရေးအကျဉ်းသားများ၊ လွတ်မြောက်သွားသော နိုင်ငံရေးအကျဉ်းသားများနှင့် နိုင်ငံတကာအသိုင်းအဝိုင်းတို့က အဓိကအခန်းကဏ္ဍတွင် ရှိခဲ့သည်။ သို့သော် လက်တွေ့အားဖြင့် ထိပ်ပိုင်းရှိ မူဝါဒရေးရာ ဆုံးဖြတ်ချက်ချသူများ၊ အကျဉ်းထောင်တာဝန်ရှိသူများနှင့် အကျဉ်းထောင် အရာထမ်း၊ ဝန်ထမ်းများ၏ ပူးပေါင်းဆောင်ရွက်မှုမရှိလျှင် မအောင်မြင်နိုင်ပေ။

ပြည်တွင်း၊ ပြည်ပ လှုပ်ရှားတောင်းဆိုမှုများ၊ ဖိအားပေးမှုများကြောင့် မတတ်သာ၍ အခြေအနေများ ပြောင်းလဲသွားရသည်ဆိုသော်ငြား ထိပ်ပိုင်းတာဝန်ရှိသူတွေကိုယ်တိုင် သဘောထားပျော့ပျောင်းလာခြင်းကလည်း အကြောင်းတစ်ချက်ဖြစ်သည်။ လူ့အခွင့်အရေးဆိုင်ရာ သင်တန်းများရရှိခြင်း၊ နိုင်ငံရပ်ခြားသို့ အကျဉ်းထောင်ဆိုင်ရာ လေ့လာရေးခရီးစဉ်များသွားရောက်ခြင်း၊ အခြေခံလူ့အခွင့်အရေးနှင့် အကျဉ်းသား အခွင့်အရေးများကို သိရှိလာခြင်းတို့က အကျဉ်းထောင်အရာထမ်း၊ ဝန်ထမ်းများ၏ စဉ်းစားတွေးခေါ်ပုံနှင့် အပြုအမူ၊ အပြောအဆိုများ အနည်းနှင့်အများ ပြောင်းလဲသွားစေခဲ့သည်။

ထိုအတွက် လက်ရှိအကျဉ်းထောင် တာဝန်ရှိသူများ၊ အရာထမ်း၊ ဝန်ထမ်းများကိုလည်း အသိအမှတ်ပြုရမည်ဖြစ်သည်။ အသိအမှတ်ပြုရာ တွင် ပါးစပ်မှ ချီးကျူးပြောဆိုခြင်းအပြင် အစိုးရအနေနှင့်လည်း လက်တွေ့အားဖြင့် ဝန်ထမ်းများ၏အခြေအနေများ မြင့်မားလာစေရန် ထောက်ကူ ပံ့ပိုးပေးရန် လိုပေမည်။ ဝန်ထမ်းများ သက်သာချောင်ချိရေး၊ အလုပ်ခွင် ပျော်ရွှင်ရေး၊ စိတ်ပါလက်ပါ စွမ်းအားထုတ်အလုပ်လုပ်ရေး၊ အပိုဝင်ငွေ၊ အောက်လမ်းဝင်ငွေ မရှာစေရေး၊ လူယုံမွေး၊ တပည့်မွေး၍ ခွဲခြားဆက်ဆံ၊ အုပ်ချုပ်မှုကင်းစင်ရေး၊ ကျောသားရင်သားမခွဲမခြား ဖြောင့်ဖြောင့်မှန်မှန် ရှိစေရေးတို့ရှိလာစေရန် နည်းလမ်းရှာရမည်ဖြစ်သည်။

ထိုအတွက် ဝန်ထမ်း၊ အရာထမ်းများ အလုပ်ခွင်တွင် နောက်ကျောလုံလုံ၊ စိတ်ပါလက်ပါ၊ မိမိကိုယ်ကိုယ် ယုံကြည်မှုအပြည့် ရှိနေစေရေး အတွက် တတ်နိုင်သည့်နည်းလမ်းများဖြင့် ပံ့ပိုးကူညီပေးသင့်လှသည်။ ဥပမာအားဖြင့် ပညာရေးသည် ဝန်ထမ်း၊ အရာထမ်းများ အလုပ်ခွင်ရာထူးတိုးမြှင့်ရေးအတွက် အခရာကျသော အရည်အချင်းဖြစ်သည်။ ထို့ကြောင့် အလုပ်ခွင်မပျက် ပညာဆည်းပူးလေ့လာနိုင်ခွင့်ကို ဖန်တီးပေးသင့်သည်။ ကျောင်းပညာရေးအတွက် တက္ကသိုလ်ဝင်တန်းနှင့် အဝေးသင်တက္ကသိုလ်တို့တွင် ဖြေဆိုဆဲ၊ တက်ရောက်ဆဲဝန်ထမ်းများအတွက် ပညာဒါနသင်တန်းများနှင့် စာမေးပွဲကာလ၊ အနီးကပ်သင်တန်းကာလတို့တွင် လစာပြည့်ခွင့်ပေးခြင်းတို့ဖြင် အနိမ့်ဆုံးကူညီပေးနိုင်သည်။ ထို့နောက် သီးခြား ဘာသာစကား ကျွမ်းကျင်မှုဆိုင်ရာ အချိန်ပိုင်းသင်တန်းများ ဖွင့်လှစ်ပေးသင့်သည်။ အင်္ဂလိပ်ဘာသာအပြင်၊ ထိုင်း၊ ဘင်္ဂါလီ၊ တရုတ်၊ မလေး၊ အီတလီ၊ ပြင်သစ်၊ ကိုရီးယား၊ ဂျပန် အစရှိသော ဘာသာစကားများကိုလည်း အလုပ်ခွင်မပျက် သင်ကြားနိုင်ရန် စီစဉ်ပေးသင့်သည်။

အကျဉ်းထောင် အရာထမ်း၊ ဝန်ထမ်းများအတွက် ဗြိတိသျှကိုလိုနီခေတ်က ရရှိခဲ့သော အဆောင်အယောင်၊ ခံစားခွင့်များ ခေတ်နှင့် အညီ ပြန်လည်ရရှိလျှင်ပင် ၎င်းတို့အတွက် များစွာတန်ဖိုးရှိပေမည်။ အကျဉ်းထောင်ပရဝုဏ်အတွင်း ရာထူးအဆင့်အတန်းအလိုက် သန့်ရှင်း၊ သပ်ရပ်၊ ခန့်ငြားသော အိမ်ရာများ၊ အကျဉ်းထောင်၏အရွယ်အစားနှင့် ဝန်ထမ်း၊ ဝန်ထမ်းမိသားစုပမာဏ၊ တည်နေရာအကျယ်အဝန်းတို့အပေါ် မူတည်ကာ ဆေးပေးခန်း၊ မူကြို၊ မူလတန်း၊ အလယ်တန်း စသည့်အခြေခံပညာကျောင်းများ၊ အခွန်လွတ်ဈေး၊ သက်သာချောင်ချိရေး စားသောက်ဆိုင်များ ထားရှိပေးသင့်သည်။ အကြောင်းမှာ အကျဉ်းထောင် ဝန်ထမ်းများသည် အကျဉ်းထောင် ပရဝုဏ်နှင့် များစွာဝေးကွာ၍ မရဘဲ လိုအပ်၍ ဆင့်ခေါ်ပါက ၂၄ နာရီ အချိန်ပြည့်နီးပါး တာဝန်အပြည့်ရှိနေသူများ ဖြစ်သောကြောင့်ပင်။

ထိုသို့သော ပံ့ပိုးထောက်ကူမှုများ ရရှိလာစေရန် အရေးအကြီးဆုံးမှာ အကျဉ်းထောင်များနှင့် အကျဉ်းထောင်ဝန်ထမ်းများသည် အကျင့် စာရိတ္တဖောက်ပြန်ကာ ပြစ်မှုကြီးငယ်ကျူးလွန်သူများကို ကိုင်တွယ်ထိန်းသိမ်း၍ သွန်သင်ပဲ့ပြင်ပေးရမည့်သူများဖြစ်နေသောကြောင့် ပိုကောင်းသော လူ့အဖွဲ့အစည်းအဖြစ် တည်ဆောက်ရန် အရေးပါသော နေရာတွင်ရှိနေကြောင်း ဥပဒေပြုလွှတ်တော်နှင့် အစိုးရခေါင်းဆောင်များ သိရှိလာစေရေးဖြစ်သည်။ ထိုသို့ သိရှိလာစေရန်အတွက် သက်ဆိုင်ရာ အကျဉ်းထောင်အသီးသီးမှ တာဝန်ရှိသူ အရာထမ်း၊ ဝန်ထမ်းများက မိမိတို့ အကျဉ်းထောင်အသီးသီး၏ အခြေအနေ၊ အချက်အလက်၊ ကိန်းဂဏန်းများကို သုတေသနပြုနိုင်သည်အထိ စနစ်တကျ စစ်တမ်း ကောက်၊ စုဆောင်းထားရန် လိုပေသည်။ မိမိတို့ အကျဉ်းထောင်အသီးသီး၏ အားနည်းချက်၊ အားသာချက်၊ လိုအပ်ချက်၊ ပြုပြင်ရမည့်အချက်၊ ပိုကောင်း စေရန် ကြိုးစားရမည့်အချက်၊ လက်ရှိအတိုင်း ထိန်းသိမ်းထားရမည့် အခြေအနေများကို မိမိတို့သာ အသိဆုံးဖြစ်သည့်အတွက် အခြေအနေများကို အမှန်အတိုင်း ပွင့်လင်းစွာ မခြွင်းမချန်တင်ပြရန် တာဝန်ရှိသည်။

လိုအပ်ပါက လူ့အခွင့်အရေးကော်မရှင်နှင့် ဥပဒေပြုလွှတ်တော်ရှိ လူ့အခွင့်အရေးနှင့် သက်ဆိုင်သော ရေးရာကော်မတီများကို ဖိတ်ကြား၍ အခြေအနေမှန်ကို အသိပေးသင့်သည်။ အဆိုပါ ကော်မရှင်၊ ကော်မတီများကလည်း အကျဉ်းထောင်အသီးသီးကို သွားရောက် လေ့လာစစ်ဆေးကာ အကျဉ်းသားများအတွက်သာမက အကျဉ်းထောင်တာဝန်ရှိသူများအတွက်ပါ ထည့်သွင်းစဉ်းစားကာ သက်ဆိုင်ရာဌာနနှင့် အစိုးရကို တိုက်တွန်းနိုင်သည်။ အကျဉ်းထောင်ဆိုင်ရာ ဥပဒေများကို ခေတ်နှင့်အညီ ဖြုတ်ပယ်၊ ပြင်ဆင်၊ ဖြည့်စွက်ခြင်းနှင့် လိုအပ်ပါက အသစ်ရေးဆွဲခြင်းတို့ ဆောင်ရွက်နိုင်သည်။

အနိမ့်ဆုံးအဆင့် အကျဉ်းထောင်များတွင် မဖြစ်မနေ ပြင်ဆင်၊ ပြောင်းလဲ၊ မြှင့်တင်၊ တည်ဆောက်သင့်သည့် ရုပ်ပိုင်းဆိုင်ရာများ၊ စီမံခန့်ခွဲမှုများ၊ အရည်အချင်းမြှင့်တင်ခြင်းဆိုင်ရာလုပ်ငန်းများ လက်တွေ့အကောင်အထည်ဖော်ရန် ယခုပင်စတင်၍ နည်းလမ်းရှာသင့်သည်။ နည်းလမ်းရှာရာတွင် အစိုးရ၏ နှစ်စဉ်ဘတ်ဂျက်ခွဲတမ်းတွင် ပမာဏတိုးရရှိရန် အချက်အလက်၊ အခြေအနေနှင့်တကွ စနစ်တကျ တောင်းခံခြင်း၊ တစ်သီးပုဂ္ဂလ အလှူရှင်များထံမှ တရားဝင်အလှူခံရရှိငွေတို့ဖြင့် ရန်ပုံငွေထူထောင်ခြင်း၊ နိုင်ငံတကာအဖွဲ့အစည်းများထံမှ အထောက် အပံ့အကူအညီ တောင်းခံခြင်း၊ နိုင်ငံတကာငွေကြေးအဖွဲ့အစည်းအချို့ထံမှ လူ့အခွင့်အရေးခေါင်းစဉ်အောက်မှ အတိုးနှုန်းသက်သာသော ချေးငွေရယူခြင်း စသည့်နည်းလမ်းများဖြင့် အသုံးစရိတ်ရှာဖွေနိုင်သည်။ 

အင်းစိန်အကျဉ်းထောင်ကဲ့သို့ သမိုင်းဝင်အဆောက်အအုံမျိုးကို ပြတိုက်အသွင်သို့ ပြောင်း၍သော်လည်းကောင်း၊ အကျဉ်းထောင်တွင် နေထိုင်ရသကဲ့သို့ ခံစားမှုမျိုးပေးသည့် ဟိုတယ်အသွင်အဖြစ်လည်းကောင်း၊ ယင်းနှစ်ခုစလုံး တစ်ပိုင်းစီပါဝင်သော နေရာအဖြစ်လည်းကောင်း ပြောင်းလဲ လိုက်ခြင်းဖြင့်လည်း ကမ္ဘာအရပ်ရပ်မှ ခရီးသွားများသာမက ပြည်တွင်းရှိ နိုင်ငံသားများပင် စိတ်ဝင်တစား လာရောက်လေ့လာတည်းခိုနိုင်သည်။ ထိုနည်းလမ်းဖြင့် ဝင်ငွေရရှိနိုင်မည်မှာ သေချာသည်။ ထိုအတွက် လက်ရှိ အင်းစိန်အကျဉ်းထောင်ထက် ပိုကျယ်၊ ပိုကြီး၊ ပိုခိုင်ခံ့၊ ပိုခေတ်မီ၊ ပိုလုံခြုံ၊ ပိုအဆင့်အတန်းမြင့်သော အကျဉ်းထောင်အသစ်တစ်ခု ဆောက်လုပ်ရန်လိုပေမည်။ 

(ဆက်လက်ဖော်ပြပါမည်)

ကျော်မင်းဆွေ

You may also like...

Leave a Reply

Your email address will not be published. Required fields are marked *