သမိုင်းဝင် ခြောက်လဘတ်ဂျက်ကို ဆန်းစစ်ခြင်း

နေပြည်တော်လွှတ်တော် အဆောက်အအုံရှေ့ရှိ အခြခံလုပ်သားတစ်ဦး ။

ခြောက်လဘတ်ဂျက်မှစတင်၍ မြန်မာလုပ်ငန်းရှင်များ၏ အကောင်းမြင်မျှော်လင့်ချက်များ ပြန်လည်ရှင်သန်စပြုလာသည်။

အမျိုးသားဒီမိုကရေစီ အဖွဲ့ချုပ် (NLD) အစိုးရတက်လာချိန်မှ၍ ကျဆင်းလာသော မြန်မာ့စီးပွားရေးတွင် ဆောက်လုပ်ရေးကဏ္ဍလည်း ပါဝင်သည်။ သို့သော်လည်း ယခုအခါဆောက်လုပ်ရေးလုပ်ငန်းရှင်များ၏ မျှော်လင့်ချက်ရောင်နီ ပြန်ပေါ်လာပြီဖြစ်သည်။

ယခင်ဘဏ္ဍာရေးနှစ်အဖြစ် သတ်မှတ်ထားသည့် ဧပြီ ၁ မှ မတ်လ ၃၁ ရက် အစား လာမည့် ၂၀၁၈-၂၀၁၉ ဘဏ္ဍာ နှစ်မှစ၍ အောက်တိုဘာလ ၁ ရက်မှ စက်တင်ဘာလ ၃၀ ရက်အထိ ပြောင်းလဲမည်ဖြစ်သည်။ ဘဏ္ဍာနှစ်မပြောင်းလဲမီ ကြားကာလဖြစ်သည့် ဧပြီလမှ စက်တင်ဘာလအထိ ခြောက်လတာဘတ်ဂျက်ကို ပြင်ဆင်ရေးဆွဲကြရသည်။

အဆိုပါဘတ်ဂျက်သည် မြန်မာ့ သမိုင်းတွင် ခြောက်လဘတ်ဂျက်အဖြစ် အမည်တွင်သွားသည်။

ထို့အပြင် ခြောက်လဘတ်ဂျက်နှင့် ပတ်သက်၍ ထူးခြားမှုများလည်း ပေါ်ထွက်လာသည်။ ပိုမိုစနစ်ကျပြီး အသက်ဝင်စပြုလာသော လွှတ်တော်၊ ဝန်ကြီးဌာနက ပစ္စည်းဝယ်ရန်တောင်းခံငွေပမာဏမှာ ပြင်ပပေါက်ဈေးထက်များနေခြင်းနှင့် ခြောက်လဘတ်ဂျက်အကျိုးဆက် အစရှိသဖြင့် ထူးခြားချက်များ ဖြစ်လာသည်။

ဝန်နှင့်အား မြားနှင့်လေး

ဝန်ကြီးဌာနအသီးသီးက တောင်းခံထားသော ခြောက်လတာအတွက် ဘဏ္ဍာငွေများကို ပြည်ထောင်စုလွှတ်တော်က ဖြတ်တောက် အတည်ပြုခဲ့သည်။ ပြည်ထောင်စု အစိုးရအဖွဲ့၏ ခြောက်လတာ ဘတ်ဂျက်တောင်းခံမှုမှာ ကျပ်ဘီလီယံ တစ်သောင်းကျော် (ကျပ်သန်းပေါင်း ၁၀,၆၇၇,၆၉၈) ရှိသည်။

လျှပ်စစ်နှင့်စွမ်းအင်ဝန်ကြီးဌာနက ကျပ် ၂၃၄၃ ဘီလီယံ၊ စီမံကိန်းနှင့် ဘဏ္ဍာရေးဝန်ကြီးဌာနက ကျပ် ၂၉၁၃ ဘီလီယံနှင့် ကာကွယ်ရေးဝန်ကြီးဌာနက ကျပ် ၁၃၄၀ ဘီလီယံတောင်းခံခဲ့ပြီး ဘတ်ဂျက်အများဆုံး အများဆုံးတောင်းခံခဲ့သည့် ဝန်ကြီးဌာနများ ဖြစ်လာသည်။

သို့သော်လည်း ဖေဖော်ဝါရီလ ၂၈ ရက်က ကျင်းပသည့် ပြည်ထောင်စုလွှတ်တော်တွင် အဆိုပါတောင်းခံငွေများအနက် ကျပ်ဘီလီယံ ၁၀၀ ကျော် (ကျပ်သန်းပေါင်း ၁၀၀,၇၀၇) ကို ဖြတ်တောက်ခဲ့သည်။

လယ်/ဆည်ဝန်ကြီးဌာနထံမှ ကျပ်ဘီလီယံ ၂၀ နီးပါး၊ ဆောက်လုပ်ရေး ဝန်ကြီးဌာနထံမှ ကျပ် ၁၉ ဘီလီယံခွဲနီးပါးနှင့် နိုင်ငံခြားရေးဝန်ကြီးဌာနထံမှ ကျပ် ရှစ်ဘီလီယံခွဲနီးပါး ဖြတ်တောက်ခဲ့သည်။

“လွှတ်တော်က တော်တော်လေး စိစစ်တယ်။ ဌာနတွေက လျှော့လို့ရတဲ့ အပိုင်းတွေ လျှော့တယ်။ အခုအတည်ပြုလိုက်တာပေါ့” ဟု ဘတ်ဂျက်ရေးရာ ကျွမ်းကျင်သူ ဦးဇော်ဖေဝင်းက ဆိုသည်။

ခြောက်လတာ ဘတ်ဂျက်ရေးဆွဲရမည့် အခြေခံမူများကို နိုင်ငံတော်သမ္မတ ဦးထင်ကျော်က ဘဏ္ဍာရေးကော်မရှင်အစည်းအဝေးတွင် ယခုကဲ့သို့လမ်းညွှန်ခဲ့သည်။

“၂၀၁၈ ခုနှစ် ဧပြီလကနေ စက်တင်ဘာလအထိ ခြောက်လတာကာလဟာ မိုးရာသီဖြစ်တဲ့အတွက် လယ်ယာကဏ္ဍမှာ မိုးသီးနှံများစိုက်ပျိုးချိန် ဖြစ်ပါတယ်။ ဒါကြောင့် စက်မှုကဏ္ဍမှာလည်း လယ်ယာထွက်ပစ္စည်း ကြိတ်ခွဲ မွမ်းမံမှုနည်းပါးမှာ ဖြစ်ပါတယ်။ ဒါ့အပြင် ဆောက်လုပ်ရေးလုပ်ငန်းတွေကို အရှိန်အဟုန်နဲ့ ဆောင်ရွက်ဖို့ အကန့်အသတ် တွေလည်း ဖြစ်ပေါ်နိုင်ပါတယ်”

သို့သော်လည်း အထက်ပါ ဘတ်ဂျက်တောင်းခံမှုနှင့် ဖြတ်တောက်မှုကို ကြည့်လျှင် လယ်/ဆည်ဝန်ကြီးဌာနနှင့် ဆောက်လုပ်ရေးဝန်ကြီးဌာနတို့သည် ဘတ်ဂျက်အများဆုံး ဖြတ်တောက်ခံခဲ့ရသည့် ဝန်ကြီးဌာနဖြစ်လာသည်။

ယခုခြောက်လဘတ်ဂျက်၌ လွှတ်တော်တွင် ပြည်ထောင်စုအဆင့်ဝန်ကြီး ဌာနများ၏ ဘတ်ဂျက်တောင်းခံမှုသည် ရလျှင် အမြတ်၊ မရလျှင်အရင်းဟု သဘောထား၍ တောင်းခံနေမှုများကိုတွေ့ရှိရပြီး ဘတ်ဂျက်ကို ဈေးသည်များကဲ့သို့ အလျှော့အတင်း လုပ်ရသည်မှာလည်း ရှက်ဖွယ်ဖြစ်ကြောင်း အောင်မြေသာစံ မြို့နယ်မှ ပြည်သူ့လွှတ်တော်ကိုယ်စားလှယ် ဒေါက်တာလှမိုးက ပြောကြားသည်။

ဘတ်ဂျက်တင်ပြမှုကို ဖြတ်တောက်ခြင်းသာမက ဝန်ကြီးဌာနများသည် ဘဏ္ဍာရေးစည်းမျဉ်းနှင့်အညီ ဘတ်ဂျက် တောင်းခံတတ်ရန် လိုအပ်ကြောင်း ပြည်သူ့လွှတ်တော် ကိုယ်စားလှယ် ဒေါ်ခင်စန်းလှိုင်က ဆိုသည်။

ထို့ပြင် ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီ ဒုတိယဥက္ကဋ္ဌ ဦးအောင်မင်းကလည်း လွှတ်တော်သို့ လာရောက်ဖြေရှင်းသည့် ဝန်ကြီးဌာနတာဝန်ရှိသူများ၏ ဖြေကြားချက်မှာ ယေဘုယျဆန်လွန်းနေကြောင်း ဖေဖော်ဝါရီ ၂၆ ရက်က လွှတ်တော်တွင် မှတ်ချက်ပြုသည်။

မည်သို့ဆိုစေ ခြောက်လဘတ်ဂျက် တောင်းခံပွဲကြီးတွင် ရလိုသူနှင့် ပေးသူတို့ကြား စေ့စေ့စပ်စပ်ရှိသည့် လွှတ်တော် ကိုယ်စားလှယ်များကြောင့် ပြည်သူ့ဘဏ္ဍာငွေများစွာ လေလွင့်မည့်အခြေအနေမှ လျော့ပါးခဲ့ရသည်။

ဆီးသီးတောင်း

ခြောက်လတာ ဘတ်ဂျက်တောင်းခံမှုတွင် လူပြောခံရမှုအများဆုံးသော ဝန်ကြီးဌာနမှာ ပညာရေးဝန်ကြီးဌာန ဖြစ်သည်။ အကြောင်းမှာ ပညာရေးဝန်ကြီးဌာနက ဝယ်ယူမည့် Desktop ကွန်ပျူတာ ၁၂၅၆ လုံးအတွက် တစ်လုံးလျှင် ၁၁ သိန်းမှ ၁၃ သိန်းခွဲအထိ တောင်းခံခဲ့ခြင်းကြောင့် ဖြစ်သည်။

ကွန်ပျူတာအမျိုးအစားအလိုက် ဈေးနှုန်းကွာခြားမည်ဖြစ်သော်လည်း ရုံးသုံး စာစီစာရိုက်မျှသာ သုံးစွဲမည်ဆိုပါက အဆိုပါငွေကြေးမှာ လွန်စွာများပြားသည့်ပမာဏဖြစ်ပြီး ပညာရေးဝန်ကြီးဌာနသည် နည်းပညာရပ်ဆိုင်ရာပစ္စည်းများဝယ်ယူရန် ကျွမ်းကျင်မှုမရှိလျှင် မြန်မာနိုင်ငံကွန်ပျူတာပညာရှင်အသင်းထံ အကြံတောင်းနိုင်ကြောင်း အဆိုပါအသင်း၏ အကြီးတန်းတာဝန်ရှိသူတစ်ဦးက ပြောဆိုသည်။

ပြင်ပဈေးကွက်တွင် ကျပ် ၁၁ သိန်း မှ ၁၃ သိန်းခွဲကြား Desktop ကွန်ပျူတာများသည် ဂိမ်းကစားနိုင်သည်အထိ အဆင့်မြင့်သော ကွန်ပျူတာများ ဖြစ်သည်။

သင်တန်းတစ်ခုတွင် ကွန်ပျူတာအသုံးပြုနေသော ပညာရေးဝန်ထမ်းများ

“အကောင်းဆုံးဆိုတဲ့ အမှတ်တံဆိပ်ပဲ တောင်းတယ်။ ဈေးအမြင့်ဆုံးဆိုတာကိုပဲ ရွေးချယ်တင်ပြတယ်။ အမှန်တကယ် မရှိမဖြစ်လိုအပ်တဲ့ အရေအတွက်ထက် ပိုပြီးတောင်းတယ်”ဟု အောင်မြေ သာစံမြို့နယ်မှ ပြည်သူ့လွှတ်တော်ကိုယ်စားလှယ် ဒေါက်တာလှမိုးက လွှတ်တော်တွင် ပြောဆိုသည်။

“နံပါတ်သုံးအချက်က တင်ပြသမျှ ပစ္စည်းတိုင်းရဲ့ ဈေးနှုန်းက ပြင်ပပေါက်ဈေးထက် နှစ်ဆ၊သုံးဆများတယ်”

သမ္မတဦးသိန်းစိန်လက်ထက် လွှတ်တော်တွင် ပြည်သူ့ဘဏ္ဍာငွေများ ဆီးသီးဗန်းမှောက်သည်ဟူသည့် စကားကြောင့် ပြည်သူအကြား ထင်ရှားခဲ့ပြီး ယခုအခါ ဆီးသီးတောင်းစောင်းသကဲ့သို့ဖြစ်နေရာမှ လွှတ်တော်ကိုယ်စားလှယ်များ၏ တည့်မတ်မှုကြောင့် ပြည်သူ့ဘဏ္ဍာငွေများ လေလွင့်မှုကို ထိန်းနိုင်ခဲ့သည်။

“အစိုးရသစ်လက်ထက်မှာတော့ ဘတ်ဂျက်က ပိုပြီး စနစ်ကျလာပါတယ်” ဟု ကြံ့ခိုင်ရေးပါတီဝင် သမ္မတရုံးဝန်ကြီးဟောင်းလည်းဖြစ်၊ အမျိုးသားလွှတ်တော် ကိုယ်စားလှယ်လည်းဖြစ်သူ ဦးစိုးသိန်းက မှတ်ချက်ပြုသည်။

ဆောက်လုပ်ရေးရောင်နီ

မည်သို့ဆိုစေ ခြောက်လဘတ်ဂျက်တွင် ဝန်ကြီးဌာနများနှင့် လွှတ်တော်ကိုယ်စားလှယ်များ၏ အပြန်အလှန် ထိန်းညှိမှုများကြောင့် ပွဲဆူခဲ့သော်လည်း အကောင်းမြင်စရာများရှိနေသည်။

ယခင်ကမူ ဧပြီလဘတ်ဂျက်အစ ရာသီသည် မိုးတွင်းသို့ ရောက်ရှိရန် မဝေးသောကာလ ဖြစ်သည်။ ထို့ကြောင့် ဆောက်လုပ်ရေး လုပ်ငန်းရှင်များ အကျပ်တွေ့ရသည်ဟု တက်လမ်းဆောက်လုပ်ရေး လုပ်ငန်းရှင် ဦးရှိန်ဝင်းက ရှင်းပြသည်။

“ဘက်ဂျက်ကျတာနဲ့ မိုးကရွာပြီ။ ဖောင်ဒေးရှင်းတွေလုပ်တာနဲ့ တချို့ဆိုရင် ကုန်ကျစရိတ်နှစ်ဆဖြစ်တယ်။ အစိုးရက ချပေးတဲ့အပေါ်မှာ ကန်ထရိုက်တာကုမ္ပဏီတွေကလည်း ရသင့်သလောက်မရဘဲ အမြတ်တွေ ဖောင်ဒေးရှင်းတွေက မိုးထဲ ရေထဲပါသွားတော့ နှစ်ခါကုန်တော့ ဘယ်သူမှအကျိုးမရှိဘူးလေ” ဟု ၎င်းက ဆိုသည်။

လက်ရှိခြောက်လဘတ်ဂျက်တွင် ဆောက်လုပ်ရေးဝန်ကြီးဌာနကတင်ပြသည့် ဘတ်ဂျက်ရရှိမှုနည်းပါးခဲ့ခြင်းမှာလည်း မိုးတွင်းကာလနှင့် သက်ဆိုင်သည်။ မိုးတွင်း၌ လုပ်ငန်းများကောင်းစွာ မလည်ပတ်နိုင်။

“ခြောက်လဘက်ဂျက်မှာတော့ နည်းမှာပေါ့။ မိုးတွင်းဆိုတော့လေ။ ဟိုဘက် အောက်တိုဘာကျမှ ဆောက်လုပ်ရေးလုပ်ငန်းတွေကို အရှိန်အဟုန်မြှင့် လုပ်မှာ”ဟု ရန်ကုန်တိုင်းဒေသကြီး မြို့ပြ နှင့်အိမ်ရာ ဖွံ့ဖြိုးရေးဦးစီးဌာန ညွှန်ကြားရေးမှူး ဦးယုခိုင်က ရှင်းပြသည်။

ဘတ်ဂျက်ကာလပြောင်းလဲသတ်မှတ်ခြင်းသည် ဆောက်လုပ်ရေးလုပ်ငန်းများအတွက် မျှော်လင့်ချက်ဖြစ်လာသည်။ လက်ရှိတွင် အခွန်မဆောင်ခဲ့မှုများကို ၂၀၁၈ ခုနှစ် ပြည်ထောင်စု၏ အခွန်အကောက်ဥပဒေအရ ပထမခြောက်လ အခွန် ၃ ရာခိုင်နှုန်း သို့မဟုတ် ဒုတိယ ခြောက်လ အခွန် ၅ ရာခိုင်နှုန်းဆောင်ခြင်းဖြင့် ငွေဖြူဖြစ်မည့် အခွင့်အလမ်းများမှာလည်း လက်တစ်ကမ်းအကွာသို့ ရောက်ရှိနေပြီဖြစ်သည်။

“အခွန်ကတော့ အဆင်ပြေဖို့လမ်းကြောင်းဖွင့်ပေးတဲ့သဘောပဲ။ ဘာဖြစ်လို့လဲဆိုတော့ အဖတ်ဆယ်ရမယ့်အချိန် ဖြစ်နေတဲ့အတွက် ချက်ချင်းတော့ ခြောက်လအတွင်းမှာတော့ မလုံလောက်ဘူး” ဟု မဟာန၀ရတ်မြေ ဆောက်လုပ်ရေး လုပ်ငန်းရှင် ဦးနိုင်ဝင်းကဆိုသည်။

ရန်ကုန်တွင် အထပ်မြင့်တိုက်များ တည်ဆောက်မှုကို တားမြစ်လိုက်ပြီး နောက်ပိုင်း ဦးနိုင်ဝင်းကဲ့သို့ အထပ်မြင့်ဆောက်သည့် လုပ်ငန်းရှင်များ အရူးမီးဝိုင်း ဖြစ်ခဲ့ရသည်။

ထို့ကြောင့် ဘတ်ဂျက်နှစ်ပြောင်းမည့် ရှေ့ပြေးကာလဖြစ်သော ခြောက်လဘတ်ဂျက်ကို အခွင့်အလမ်းကောင်းများအဖြစ် ဆုပ်ကိုင်နိုင်ရန် လုပ်ငန်းရှင်များ က မျှော်လင့်ကြသည်။ ခြောက်လဘတ်ဂျက်မှသည် လာမည့်ဘဏ္ဍနှစ်ပြောင်းလဲမည့် အောက်တိုဘာ-စက်တင်ဘာ ဘတ်ဂျက်တွင် လုပ်ငန်းများ ပိုမိုကောင်းမွန်လာမည်ဟု လုပ်ငန်းရှင်များက ယူဆကြသည်။

အထူးသဖြင့် ခြောက်လဘတ်ဂျက်ဖြင့် အဆင်ပြေမည့်သူများမှာ ဆောက်လုပ်ရေးလုပ်ငန်းငယ်များ ဖြစ်သည်။ အဆောက်အအုံတစ်ခုကို နှစ်လသုံးလဖြင့်ဆောက်ကြသည့် လုပ်ငန်းရှင်များကမူ အဆင်ပြေသည်။ အထပ်မြင့်လုပ်ငန်းကြီးများကမူ ပိတ်ရက်များခြင်း၊ ပြန်လည် ရောင်းချရန် အချိန်များစွာယူရခြင်းကြောင့် အဆင်မပြေလှ။

“ကျွန်တော်တို့ အထပ်မြင့်တွေက အဆင်မပြေဘူး။ တစ်နှစ်ခွဲလောက်ရမှ အဆင်ပြေတယ်။ ခြောက်လက အသေးတွေအတွက်ပဲ အဆင်ပြေတယ်”ဟု ဆောက်လုပ်ရေးလုပ်ငန်းရှင် ဦးနိုင်ဝင်းက ဆိုသည်။

မြန်မာ့စီးပွားအရွေ့

ခြောက်လဘတ်ဂျက်သည် မြန်မာ့စီးပွားရေးအတွက် ပြီးပြည့်စုံသော အခွင့်အလမ်းကောင်းများကို ဖန်တီးပေးနိုင်ခြင်းတော့ မဟုတ်ပေ။ သို့သော်လည်း ခြောက်လဘတ်ဂျက်တွင် ကုန်သင့်ကုန်ထိုက်သည့် ဘဏ္ဍာငွေများကိုသာ ကုန်ကျစေရန် လွှတ်တော်က စွမ်းဆောင်နိုင်ခဲ့သည်။

တစ်ဖက်တွင်လည်း ဝန်ကြီးဌာနများ၏ ဘတ်ဂျက်တောင်းခံမှုများကို အချက်အလက်ဖြင့် အကောင်းဆုံး ထိန်းကျောင်းနိုင်ခဲ့ပြီး ပြည်သူဘဏ္ဍာငွေပြုန်းတီးမှုမရှိစေရန် စွမ်းဆောင်နိုင်ခဲ့သည်။

အခြားတစ်ဖက်ခြမ်း၌မူ NLD အစိုးရ၏ စီးပွားရေးအပေါ်အာရုံစိုက်မှုကို ပြန်လည်တွေ့မြင်ရစပြုလာသည်။ ပြည်သူများ၏ ညည်းတွားသံကြောင့် ဆောက်လုပ်ရေးနှင့် စိုက်ပျိုးရေးကဲ့သို့သော လုပ်ငန်းများတွင် အစိုးရက စိတ်ဝင်စားစပြုလာသည်။

မည်သို့ဆိုစေ မြန်မာ့စီးပွားရေးတွင် ကြီးကြီးမားမားပတ်သက်နေသည့် ဆောက်လုပ်ရေးကဏ္ဍကမူ ခြောက်လဘတ်ဂျက် အလွန်တွင် ပိုမိုကောင်းမွန်လိမ့်မည်ဟု မျှော်လင့်ကြောင်း မဟာန၀ရတ်မြေ ဆောက်လုပ်ရေးကုမ္ပဏီ ဥက္ကဋ္ဌ ဦးနိုင်ဝင်းက ယခုလိုဆိုသည်။

“အကောင်းဘက်ကပဲ ရှုမြင်တယ်။ ကျိုးသွားတဲ့အထပ်မြင့်လေးတွေ ပြန်ဦးမော့ဖို့ စောင့်နေတာပေါ့”

ပို့ပို့

You may also like...

Leave a Reply

Your email address will not be published. Required fields are marked *