သုံးနှစ်အတွင်း နှစ်ဆမီးလင်းမယ့် မြန်မာ့စိတ်ကူး

ရန်ကုန်မြို့ဆင်ခြေဖုန်းနေရာတစ်ခုမှ ဓာတ်အားလိုင်းများ ။

သုံးနှစ်အတွင်း လျှပ်စစ်ဓာတ်အားနှစ်ဆလိုအပ်ချက်ကို မြှင့်တင်ရန် မြန်မာအစိုးရ ကြံစည်နေပြီဖြစ်သည်။

ယင်းအတွက် မဟာဗျူဟာရှိသည်။ မဟာဗျူဟာကို ဦးဆောင်အကောင်အထည်ဖော်မည့်သူက ဦးဝင်းခိုင်ဖြစ်သည်။ ဦးဝင်းခိုင်သည် လျှပ်စစ်နှင့်စွမ်းအင်ဝန်ကြီးဌာန၏ ပြည်ထောင်စုဝန်ကြီးဖြစ်ပြီး မြန်မာနိုင်ငံအင်ဂျင်နီယာအသင်း၏ ယခင်ဥက္ကဋ္ဌအဖြစ် တာဝန်ထမ်းဆောင်ခဲ့သူလည်း ဖြစ်သည်။

မြန်မာနိုင်ငံတစ်ဝန်းသည် လက်ရှိတွင် လျှပ်စစ်ဓာတ်အားမဂ္ဂါဝပ် ၃၀၀၀ ကျော်သုံးစွဲလျက်ရှိသည်။ ပြည်သူများက ယင်းပမာဏထက်မက လိုအပ်လျက်ရှိသော်လည်း ရနိုင်သမျှ သတင်းအချက်အလက်အပေါ် အခြေခံ၍ တွက်ချက်ထားမှုက လာမည့် ၂၀၂၀ – ၂၀၂၁ ခုနှစ်တွင် မဖြစ်မနေ နောက်ထပ်လိုအပ်သည့်လျှပ်စစ်ပမာဏမှာ မဂ္ဂါဝပ် ၃၀၀၀ ဖြစ်သည်။

“ဒါက စိန်ခေါ်မှု ( Challenge ) ပါ”ဟု ပြည်ထောင်စုဝန်ကြီး ဦးဝင်းခိုင်ကဆိုသည်။

အဆိုပါလိုအပ်ချက်တွင် အိမ်သုံးများ၊ စက်မှုလုပ်ငန်းများ၊ စက်မှုဇုန်များ၊ အထူးစီးပွားရေးဇုန်များစသည့် လျှပ်စစ်မဖြစ်မနေအသုံးပြုရသည့် ကိစ္စရပ်များစွာပါဝင်သည်။ လက်ရှိတွင် မြန်မာ့လူဦးရေ ၆၀ ရာခိုင်နှုန်းဖြစ်သော လူဦးရေ သန်း ၃၀ ကျော်သည်ပင် မဟာဓာတ်အားလိုင်းမှ လျှပ်စစ်မရသေးဟု ဝန်ကြီးကိုယ်တိုင်က ဝန်ခံထားရသည့် အခြေအနေဖြစ်သည်။

“ရွာမှာမီးလင်းဖို့ကတော့ အလိုအပ်ဆုံးပဲ”ဟု အစိုးရ၏ လျှပ်စစ်မီးမရရှိသည့် ဧရာဝတီတိုင်းဒေသကြီး၊ ဒေးဒရဲမြို့နယ် သင်ပေါင်းချောင်ကျေးရွာမှ လယ်သမားကိုကျော်ထက်က ကျေးလက်၏လိုအပ်ချက်ကို ဖွင့်ဟသည်။

ထို့ကြောင့် လာမည့်သုံးနှစ်အတွင်း ပြည်သူများလိုအပ်သည့် လျှပ်စစ်မဂ္ဂါဝပ် ၃၀၀၀ အတွက် လက်ရှိအစိုးရက ရှာပုံတော်ဖွင့်ရသည်။

သုံးနှစ်အတွင်း နှစ်ဆမီးလင်းမည့် မြန်မာ့အကြံမှာ သဘာဝဓာတ်ငွေ့အရည် (Liquefied Natural Gas-LNG) ကို ပြည်ပမှဝယ်ယူ၍ ပြည်တွင်း၌ လျှပ်စစ်ပြန်လည်ထုတ်ရန်ဖြစ်သည်။ အချိန်က နည်းသည်။ လိုအပ်သည့် ပမာဏက များသည်။ ထို့ကြောင့် ဤအကြံပေါ်လာခြင်းဖြစ်သည်။

LNG မှ လျှပ်စစ်ထုတ်ယူခြင်းဆိုသည်မှာ သဘာဝဓာတ်ငွေ့ကို ဖိအားဖြင့် အရည်ဖြစ်စေပြီး ပင်လယ်ကူးသဘောင်္များဖြင့်သယ်ဆောင်ကာ ရောက်ရှိလာပါက သဘာဝဓာတ်ငွေ့စက်ရုံတွင် ဓာတ်ငွေ့ပြန်ဖြစ်စေသည်။ ထိုနောက် လောင်ကျွမ်းစေပြီး ထွက်ရှိလာသည့်အပူမှ လျှပ်စစ်ဓာတ်အားထုတ်ယူခြင်းဖြစ်သည်။

LNG ကို အရှေ့တောင်အာရှ၊ တရုတ်နှင့်အိန္ဒိယတို့တွင်လည်းသုံးစွဲသည်။ မြန်မာ့သဘာဝဓာတ်ငွေ့ ၈၀ ရာခိုင်နှုန်းမှာ တရုတ်နှင့်ထိုင်းသို့ရောင်းချပြီးဖြစ်သောကြောင့် ယခုစနစ်ကိုကျင့်သုံးရခြင်းဖြစ်သည်။

ထိုပြင်လည်း ရေအား၊ လေအား၊ ကျောက်မီးသွေး ၊ နေစွမ်းအင် စသည့်အရင်းအမြစ်များမှ လျှပ်စစ်ထုတ်ယူမှုမှန်သမျှတွင် မည်သည့်နည်းလမ်းကို ရွေးချယ်သည်ဖြစ်စေ မြန်မာနိုင်ငံနည်းအမျိုးမျိုးဖြင့် ကန့်ကွက်ခံနေရပြီး LNG သည် ယင်းတို့ကို ရှောင်ကွင်းသွားနိုင်ခဲ့သည့် ပါးနပ်သော ရွေးချယ်မှုလည်းဖြစ်သည်။

“ပြည်တွင်းမှာရှိတဲ့ ရေအားလျှပ်စစ်၊ သဘာဝဓာတ်ငွေ့တွေအားလုံးပေါင်းရင်တောင် မရ(လိုအပ်ချက်မပြည့်) ပါဘူး။ သဘာဝဓာတ်ငွ့က ကျွန်တော်တို့များများလိုချင်ပါတယ်ဆိုမှ အထွက်နှုန်းနည်းလာတယ်။ အဲဒါကြောင့် LNG လုပ်ဖို့ဆုံးဖြတ်တာပါ”ဟု ပြည်ထောင်စုဝန်ကြီး ဦးဝင်းခိုင်က ရှင်းပြသည်။

အစိုးရက LNG တစ်ယူနစ်လျှင် ၁၃၅ ကျပ်ဝန်းကျင် (၈ ဒသမ ၉ ဆင့်) နှုန်းဖြင့် Total ကုမ္ပဏီထံမှ ဝယ်ယူခြင်းဖြစ်ပြီး အချို့သော ကျောက်မီးသွေးမှလျှပ်စစ်ထုတ်ရန် သဘောကျသူများကမူ အဆိုပါနှုန်းထားကို ဈေးများသည်ဟု ဆိုကြသော်လည်း ပြည်ထောင်စုဝန်ကြီးက သဘောမတူ။

“မြန်မာနိုင်ငံလို နိုင်ငံသေးသေးလေးက နည်းနည်းလေးဝယ်တာကို ဒီဈေးနဲ့ (ဘယ်မှာမှ)၀ယ်လို့ မရနိုင်ဘူး”ဟု ဝန်ကြီးက ဆိုသည်။

သို့သော်လည်း LNG သည် မြန်မာ့လျှပ်စစ်အတွက် ကိုးဆယ့်ခြောက်ပါးရောဂါပျောက်ဆေးမဟုတ်။

LNG ဖြင့်မီးလင်းရေးတွင် အဓိကတွေ့ရမည့်အခက်အခဲမှာ ထုတ်သမျှလျှပ်စစ်ကို အကုန်မသုံးနိုင်ခြင်း ဖြစ်သည်ဟု စိမ်းလန်းအမိမြေဖွံ့ဖြိုးရေးအသင်းတည်ထောင်သူ ဦးဝင်းမျိုးသူက သုံးသပ်သည်။

အကြောင်းမှာ တစ်ရက် ၂၄ နာရီအနက် မနက်၊ည စုစုပေါင်း သုံးစွဲချိန်ခြောက်နာရီခန့်သာ လျှပ်စစ်ကိုများစွာသုံးစွဲကြပြီး ထုတ်လုပ်သမျှ လျှပ်စစ်၏ တစ်ဝက်ခန့်ကိုသာ ရောင်းချရပါက ယင်းသို့အရှုံးပေါ်နိုင်ခြင်းဖြစ်သည်ဟု ၎င်းကဆိုသည်။

“တစ်ဝက်လောက်ဘဲ ရောင်းနေရရင် စီးပွားရေးတွက်ခြေကိုက်မှု အကြီးအကျယ်ထိခိုက်မှာမို့ ဒီအတွက် အစီအမံတွေ ပြင်ဆင်ဖို့လိုပါတယ်”ဟု ၎င်းကဆိုသည်။

LNG ကိုသုံးမည်ဆိုသော်လည်း ယင်းသည် ကာလတိုလျှပ်စစ်လိုအပ်ချက်ကို ကုစားရန်နှင့် ကာလလတ်အတွက်သာ ရည်ရွယ်သည်ဟု ဝန်ကြီးကဆိုသည်။

၂၀၁၆ ခုနှစ် ဇွန်လမှစ၍ LNG တင်သွင်းမည့်ကုမ္ပဏီများကို တင်ဒါခေါ်ခဲ့သည်။ ယခုနှစ် ဇန်နဝါရီလ ၃၀ ရက်တွင် ကုမ္ပဏီလေးခုကို ရွေးချယ်ခဲ့သည်။

ပြည်ထောင်စုအစိုးရ၏ သဘောတူညီချက်ဖြင့် တနင်္သာရီတိုင်း ကန်ပေါက်တွင် TOTAL & SIEMENS ကုမ္ပဏီက ၁၂၃၀ မဂ္ဂါဝပ် ၊ ဧရာဝတီတိုင်း မီးလောင်ချိုင်တွင် Zhefu& Supreme  ကုမ္ပဏီက ၁၃၉၀ မဂ္ဂါဝပ် ၊ ရန်ကုန်တိုင်း အလုံတွင် TTCL Public Company Limited  ကုမ္ပဏီက ၃၅၆ မဂ္ဂါဝပ် နှင့် ရခိုင်ပြည်နယ် ကျောက်ဖြူတွင် Sinohydro& Supreme ကုမ္ပဏီက မဂ္ဂါဝပ် ၁၃၅ ထွက်ရှိမည့် LNG သုံးလျှပ်စစ်ဓာတ် အားပေးစက်ရုံများ တည်ဆောက်မည်ဖြစ်သည်။

အဆိုပါလျှပ်စစ်ဓာတ်အားပေးစက်ရုံများက လာမည့် ၂၀၂၀ ပြည့်နှစ်တွင် မြန်မာအတွက်လိုအပ်သည့် လျှပ်စစ်မဂ္ဂါဝပ် ၃၀၀၀ ကျော်ကို ဖြည့်ဆည်းနိုင်မည်ဖြစ်သည်။ အဆိုပါစက်ရုံများတည်ဆောက်မှုနှင့်အတူ ၅၀၀ KV ဓာတ်အားလိုင်းလည်းတည်ဆောက်မည်ဖြစ်သည်။ ထိုပြင် လျှပ်စစ်ဓာတ်အားရရှိရေး Master Plan ကိုရေးဆွဲထားပြီး အရှေ့၊ အနောက်၊ တောင်၊ မြောက် မဟာလျှပ်စစ်ဓာတ်အားလိုင်းလေးခု သွယ်တန်းရန် စီစဉ်ထားသည်ဟု ပြည်ထောင်စုဝန်ကြီးကဆိုသည်။

ဝန်ကြီးဦးဝင်းခိုင်ပြောစကားအရဆိုလျှင် မြန်မာနိုင်ငံသည် သုံးနှစ်အတွင်း လျှပ်စစ်ဓာတ်အားယခုထက် နှစ်ဆပိုရမည်ဖြစ်သည်။ ထိုပြင် မဟာဓာတ်အားလိုင်းမှ လျှပ်စစ်မရသူများလည်း မီးရလာမည်ဖြစ်သည်။

သို့သော်…

အစိုးရသည် လျှပ်စစ်နှင့်ပတ်သက်လျှင် အရှုံးပေါ်လျက်ရှိသည်။ လျှပ်စစ်တစ်ယူနစ်လျှင် ၂၀ ဒသမ ၂၂ ကျပ် အရှုံးပေါ်လျှက်ရှိပြီး ယခု ၂၀၁၇-၂၀၁၈ ဘဏ္ဍာနှစ်အတွက် ကျပ် ၃၃၃ ဘီလီယံ အရှုံးပေါ်နိုင်ခြေရှိသည်ဟု အစိုးရကတွက်ချက်ထားသည်။ စီးပွားရေးလုပ်ငန်းရှင်ဘဝမှလာသည့် ဝန်ကြီးဦးဝင်းခိုင်ကမူ ရှုံးလျှင် ရေရှည်တွက်ခြေမကိုက်မှန်း ကောင်းစွာသိမြင်သည်။

ထို့ကြောင့်ပင် လျှပ်စစ်မရသည့် ပြည်သူများကို လျှပ်စစ်ပေးရာတွင် မီတာစနစ်လေးမျိုး (4Meters)ဖြင့် မီတာခ ကောက်ခံရန်စီစဉ်နေပြီဖြစ်သည်။ အမျိုးသားလျှပ်စစ်ဓာတ်အားရရှိရေးစီမံကိန်း (National Electricity Project-NEP) ၏ ကမ္ဘာ့ဘဏ်ချေးငွေ အမေရိကန်ဒေါ်လာ သန်း ၃၁၀ ဖြင့် အဆိုပါစနစ်ကို လာမည့် ဧပြီလ ၁ ရက်မှစ၍ အကောင်အထည်ဖော်မည် ဖြစ်သည်။

မီတာစနစ်လေးမျိုးဆိုသည်မှာ လျှပ်စစ်ဓာတ်အားခကောက်ခံမှု ပုံစံလေးမျိုးဖြစ်ပြီး မီတာ ၅၀ ဝန်းကျင်အတွက် ကျေးလက်မီတာ၊ မီတာ ၁၀၀ ဝန်းကျင်အတွက် မြို့ပြ မီတာ၊ ပုံမှန်မီတာနှင့် စက်မှုသုံးမီတာဟူ၍ဖြစ်သည်။ အသေးစိတ်ကိုမူ မထုတ်ပြန်သေးပေ။ ပြည်သူများက ကြိက်ရာမီတာကို ရွေးချယ်တပ်ဆင်နိုင်ပြီး ကျပ်လေးသောင်း ပေးဆောင်ရမည်ဖြစ်သည်။ မီတာလေးမျိုးအတွက် ကျသင့်မည့် မီတာခနှုန်းထားမှာလည်း မတူညီပေ။

“ဘယ်မီတာကို သုံးရမယ်လို့ မသတ်မှတ်ဘူး။ ဘယ်မီတာတပ်ချင်တယ်ဆိုတာ စိတ်ကြိုက်တပ်ဆင်ပေးမှာပါ။ အရင်လို ပြည်သူလူထုက ဘာစိတ်ကြိုက်မှ ရွေးချယ်ခွင့်မရှိပါဘူး။ အခုဘယ်မီတာသုံးမယ်ဆိုတာ မေးပိုင်ခွင့်ပြောပိုင်ခွင့်ရှိပါတယ်”ဟု ဝန်ကြီးကဆိုသည်။

မီတာခနှုန်းထား မည်ရွေ့မည်မျှဆိုသည်ကို ဝန်ကြီးက မပြောပေ။ သို့သော်လည်း အရင်းမရှုံးသည့် နှုန်းထားများ ဖြစ်မည်ကိုကား ဝန်ကြီး၏ ပြောစကားများက သက်သေခံလျက်ရှိသည်။

“မီတာခတိုးကောက်တယ်ဆိုတာ အားလုံးသဘောပါ။ ကိုယ့်ဝင်ငွေနဲ့ ထွက်ငွေမမျှရင်တော့ ဘယ်လိုလုပ်ရမလဲဆိုတာ။ ခင်ဗျားဆိုင်လေးတစ်ဆိုင်ဖွင့်ကြည့်ရင် ဒီဈေးနဲ့ရောင်းတယ်။  ရှုံးနေရင်တော့ဒီဈေးနဲ့သွားနေရင် ရေရှည်မခံဘူးဆိုတာ လူတိုင်းသိတယ်။ အခုရှိနေတဲ့မီတာက ထုတ်တဲ့စရိတ်မကာမိတာ အားလုံးသိတယ်။ တစ်နေ့တော့တင်ရမှာပါ။ မနက်ဖြန်ဖြစ်မလား။ သဘက်ခါဖြစ်မလားပဲ”ဟု ဝန်ကြီးကဆိုသည်။

မည်သို့ဆိုစေ လှိုင်သာယာမြို့နယ်၊ စက်မှုဇုန် ၅ မှ ရေခဲစက်ပိုင်ရှင် ဦးသိန်းဟန် (အမည်လွှဲ)မှာမူ နွေရာသီရောက်လျှင် မကြာခဏပျက်သည့် မီးကြောင့် စိတ်ညစ်နေရသည်ဟု ဆို၏။ ရေခဲစက်မှာ ကောင်းစွာမလည်ပတ်ရ။ နွေရာသီ ရေခဲရောင်းရချိန်တွင် မီးပျက်ခြင်းက ဝယ်သူရှိပါလျက် မရောင်းရသည်ကို စီးပွားရေးသမားဖြစ်သည့် သူက မကျေနပ်။

“ကျွန်တော်တို့ကတော့ မီးအရင်ပေးပါ။ နောက်မှ မီတာခအကြောင်းပြောပါလို့ ပြောချင်တာ”ဟု ၎င်းကဆိုသည်။

လျှပ်စစ်သည် ခေတ်သစ်ကမ္ဘာတွင် မရှိမဖြစ် လိုအပ်ချက်ဖြစ်သည်။ လျှပ်စစ်အပါအဝင် အခြေခံအဆောက်အဦ မပြည့်စုံမှုကြောင့် SAMSUNG သည်ပင် မြန်မာ့မြေကို ကျောခိုင်းသွားပြီဖြစ်သည်။ မြန်မာ့မြေတွင် ၎င်းတို့စက်ရုံ တည်ဆောက်မည့်အစီအစဉ်ကို သမ္မတဦးသိန်းစိန်အစိုးရလက်ထက်အတွင်း ဖျက်သိမ်းလိုက်ခြင်းကြောင့် နိုင်ငံတော်မှရရှိမည့် အခွန်အခများနှင့် ပြည်သူများရရှိမည့် အလုပ်အကိုင်အခွင့်အလမ်းများဆုံးရှုံးသွားသည်။

လက်ရှိတွင်လည်း ရန်ကုန်တိုင်းအတွင်းရှိ လှိုင်သာယာမြို့နယ် အမှတ် ၁၈ ရပ်ကွက်တွင်ပင် လျှပ်စစ်မီးမရသည့် အခက်အခဲရှိသည်။ အကြောင်းမှာ ပြီးခဲ့သည့် ဖေဖော်ဝါရီလကပင် မြေကွက်ဝယ်ပြီး အိမ်အသစ်ဆောက်ရာတွင် လျှပ်စစ်မီးလျှောက်ခဲ့သော်လည်း မီးမရခဲ့ကြောင်း ကိုယ်တွေ့ကြုံခဲ့သူတစ်ဦးက ပြောပြသည်။

အကြောင်းမှာ ထရန်စဖော်မာတွင် မီးမနိုင်သောကြောင့် မီးလျှောက်သူများကို လက်ရှိတွင်ဆိုင်းငံ့ထားရသည်ဟု မြို့နယ်လျှပ်စစ်ဓာတ်အားရုံး၏ ဖြေကြားချက်ကို အဆိုပါကိုယ်တွေ့ကြုံခဲ့သူက ပြန်လည်ပြောပြသည်။

မည်သို့ဆိုစေ ယခုအခါ လျှပ်စစ်အတွက် မြန်မာတို့ တစ်မျိုးကြံနေပြီဖြစ်သည်။

LNG သည် မြန်မာ့လျှပ်စစ်ငတ်မွတ်မှုအတွက် အသင့်စားအစားအသောက်ပေလား။ မီတာစနစ် လေးမျိုးသည်လည်း အလုပ်ဖြစ်မည်လား။ မည်သို့ဆိုစေ လက်ရှိတွင်မူ မြန်မာ့လူဦးရေ သန်း ၃၀ သည် အစိုးရပေးသည့် လျှပ်စစ်မီးနှင့် တစိမ်းပြင်ပြင်ဖြစ်လျက်ရှိသည်။

မီးမရသည့် လူဦးရေသန်း ၃၀ ထဲတွင် ဧရာဝတီတိုင်း၊ ဒေးဒရဲမြို့နယ်၊ သင်ပေါင်းချောင်ကျေးရွာမှ လယ်သမားကိုကျော်ထက်တို့ မိသားစုလည်းပါဝင်သည်။ ဘိုးစဉ်ဘောင်ဆက်နေထိုင်ခဲ့သည့် အဆိုပါကျေးရွာတွင် အိမ်ခြေ ၂၂၅ ရှိပြီး အများစုမှာ လယ်သမားများသာဖြစ်သည်။ မီးမရှိ။ အားကိုးရာက ဘတ်ထရီနှင့် ဆိုလာ။

“တို့ကျေးလက်နေလယ်သမားထုအနေနဲ့ကတော့ မီတာခဘယ်လောက်ပေးရမလဲဆိုတာထက် တို့ကျေးရွာ မီးလင်းအောင် အစိုးရက ဘယ်လိုမြန်မြန်ဆန်ဆန်လုပ်ပေးမလဲဆိုတာကိုပဲ စိတ်ဝင်စားတယ်”ဟု ကိုကျော်ထက်က ဆိုသည်။

ပြည်ထောင်စုဝန်ကြီး၏ စကားများကို ထောက်ချင့်လျှင် မကြာမီကာလများတွင် လျှပ်စစ်အတွက် ပြည်သူများ တန်ရာတန်ကြေးပေးရတော့မည့် အရိပ်အယောင်များ တွေ့မြင်နေရပြီဖြစ်သည်။ လာမည့်သုံးနှစ်အတွက် LNG တန်ခိုးဖြင့် နှစ်ဆတိုး၍ မြန်မာ့မီးလင်းရေးအကြံ အဟုတ်ပင်အလုပ်ဖြစ်လေမည်လား။

ဝန်ကြီးဦးဝင်းခိုင်က ဤသို့ဆိုသည်။

“ကိုယ့်ရဲ့ လျှပ်စစ် Quality တက်အောင်လုပ်ရမယ်။ ကောင်းရင် ဒီလောက်လေးတင်တာ ပြည်သူကတော့ မပေးနိုင်စရာ အကြောင်းမရှိဘူး။ အရင်ကောင်းအောင်လုပ်မယ်။ သင့်တင့်မျှတဲ့ဈေးနဲ့ဝယ်ကြပါ”

The Voice

You may also like...

Leave a Reply

Your email address will not be published. Required fields are marked *