ပြုပြင်ပြောင်းလဲရေး မိန့်ခွန်း

‘ပြုပြင်ပြောင်းလဲမှုနဲ့ အံမဝင် ခွင်မကျတဲ့နေရာတွေမှာ သွက်လက်ထက်မြက်ပြီး အရည်အသွေးရှိတဲ့ လူစားလဲမှုတွေ လုပ်သင့်ရင်လည်း လုပ်ဆောင်ရမှာဖြစ်ပါတယ်’ ဟု သတိပေးလိုက်သည့် နှစ်သစ်ကူးသမ္မတမိန့်ခွန်းတွင် အစိုးရသက်တမ်း လက်ကျန်သုံးနှစ်အတွင်း နိုင်ငံ၏ရည်မှန်းချက်များကို အကောင်အထည်ဖော်မည့်နည်းလမ်းများ ပါဝင်သဖြင့် ပြည်သူအများ စောင့်မျှော်နေသည်မှာ ကြာပြီဖြစ်သောမိန့်ခွန်းမျိုးဖြစ်သည်။

အဂတိလိုက်စားမှုတိုက်ဖျက်ရေး၊ တရားစီရင်ရေးမဏ္ဍိုင် တည့်မတ်ရေး၊ မူးယစ်ဆေးဝါးတိုက်ဖျက်ရေး၊ ပြည်သူ့ဘဏ္ဍာမလေလွင့်အောင် ဆောင်ရွက်ရေး စသည့်နိုင်ငံတွင် ကြုံတွေ့နေရသည့် ပြဿနာကြီးများကို တိုက်ဖျက်မည်ဖြစ်ကြောင်း ပြောကြားသွားသဖြင့် ထိုပြဿနာများကို လက်တွေ့ခါးစည်းခံနေရသည့် ပြည်သူများက ကျေနပ်အားရကြသည်။

ယခု မိန့်ခွန်းပါ မူဝါဒရည်မှန်းချက်များနှင့် နည်းလမ်းများကို အကောင်အထည် အဓိကဖော်ရမည့်သူမှာ ပြည်သူ့ဝန်ထမ်း ယန္တရားဖြစ်သည့်အပြင် တရားစီရင်ရေး၊ အဂတိလိုက်စားမှု တိုက်ဖျက်ရေး၊ ပြည်သူ့ဘဏ္ဍာ မလေလွင့်အောင်ဆောင်ရွက်ရေး စသည်တို့မှာ ကာယကံရှင် ပြည်သူ့ဝန်ထမ်းယန္တရားကိုယ်တိုင်ကို ပြုပြင်ပြောင်းလဲရေးများဖြစ်သည်။ မိန့်ခွန်းကို အကောင်အထည်ဖော်ရမည့်၊ ကိုယ့်ကိုယ်ကိုယ်လည်း ပြုပြင်ပြောင်းလဲသင့်လျှင် ပြောင်းလဲရမည့် ပြည်သူ့ဝန်ထမ်းများ၏ စားဝတ်နေရေးအတွက် နေအိမ်နှင့် လုပ်ခလစာကို ဖြည့်ဆည်းမည်ဖြစ်ကြောင်း မိန့်ခွန်းအစတွင်ပင် ဦးစားပေးပြောကြားခြင်းက အစစအရာရာ တွက်ချက်ထားပြီးဖြစ်ကြောင်း မြင်သာသည်။

မိန့်ခွန်းပါမူဝါဒများကို အကောင်အထည်ဖော်ရာတွင် မီဒီယာ၏အရေးကြီးသော အခန်းကဏ္ဍကို အခါခါ အလေးထားဖော်ပြသွားသည်။ မီဒီယာလွတ်လပ်ခွင့်နှင့်ပတ်သက်ပြီး ပြည်တွင်းပြည်ပတွင် အဝေဖန်ခံနေရသော အစိုးရ၏ သဘော ထားကို ဖော်ပြလိုက်ခြင်းသည် မိန့်ခွန်း၏ ထူးခြားချက်ဖြစ်သည်။

မိန့်ခွန်းကြောင့် သမ္မတဦးဝင်းမြင့်ကို အားပေးကြသူ များပြားသော်လည်း ဦးဝင်းမြင့်ကို ဒေါ်အောင်ဆန်းစုကြည်က ရွေးချယ်ခြင်းဖြစ်သည့်အတွက် ယခုမိန့်ခွန်းပါ မူဝါဒရည်မှန်းချက်များနှင့် နည်းလမ်းများသည် ဒေါ်အောင်ဆန်းစုကြည်၏ သဘောထားဟုလည်း ယူဆရမည်သာ။ ၂ နှစ် အတွေ့အကြုံများအရ သုံးနှစ်ခရီးအတွက် လေ့လာသုံးသပ်ပြီး အပြောင်းအလဲလုပ်ခြင်း ဖြစ်ပေလိမ့်မည်။

မူဝါဒရည်မှန်းချက်၊ နည်းလမ်းတို့ကို ရွေးချယ်နိုင်ခြင်းသည် ပထမအဆင့်ဖြစ်ပြီး အကောင်အထည်ဖော်သည့်အခါတွင် မှန်းထားသော၊ မှန်းမထားသော အခက်အခဲများပေါ်လာမည်။ ထိုအခါ ရည်မှန်းချက်နှင့် နည်းလမ်းတို့ ကိုက်မကိုက်၊ ရှိသည့် လူသူငွေကြေးအချိန်တို့နှင့် လုံလောက်မလောက်တို့ကို သိရပြီး နည်းလမ်းပြင်သင့်သည်ပြင်၊ ဆက်လျှောက်သင့်သည်တို့ကို မလျှော့သောဇွဲနှင့်ဆက်လျှောက်မှသာ မူဝါဒရည်မှန်းချက်များ ပြီးပြည့်အောင်မြင်မည်။ ယခုမိန့်ခွန်းကို အကောင်အထည် စဖော်မည့် တာထွက် ၂၀၁၈ ကျန်လများသည် နောက်သုံးနှစ်သာမက ထို့ထက်ကျော်လွန်သော မြန်မာ့အနာဂတ်အတွက် အရေးကြီးသည်။

နှစ်သစ်ကူးကို မင်္ဂလာအပေါင်းနှင့် ပြည့်စုံစေသော သမ္မတဦးဝင်းမြင့်၏ မိန့်ခွန်း အမြန်အကောင်အထည်ပေါ်လာ အောင် The Voice Journal က မီဒီယာအခန်းကဏ္ဍမှ အစွမ်းကုန်ကူညီသွားမည်ဖြစ်သည်။

အယ်ဒီတာ
၁၈.၄.၂၀၁၈

You may also like...

Leave a Reply

Your email address will not be published. Required fields are marked *