လစာလှိုင်းပေါ်မှ ကုန်ဈေးနှုန်း

ဝန်ထမ်းလစာတိုးမြှင့်သည့် သတင်းက အစိုးရဝန်ထမ်းများကို ပျော်ရွှင်မှုထက် ပူပန်မှုကိုသာ ဖြစ်စေသည်။

နိုင်ငံတော်သမ္မတသစ်၏ နှစ်သစ်ကူးမိန့်ခွန်းတွင် ပြည်သူ့ဝန်ထမ်းများကို လစာတိုးမြှင့်သွားမည်ဖြစ်ကြောင်း ထည့်သွင်းပြောကြားခဲ့သော်လည်း အစိုးရဝန်ထမ်းအများစုမှာ ဟက်ဟက်ပက်ပက် မရှိလှပေ။

တစ်နိုင်ငံလုံးတွင် တာဝန်ထမ်းဆောင်နေသော အစိုးရဝန်ထမ်းကိုးသိန်းကျော်၊ တစ်သန်းနီးပါးရှိပြီးအရာထမ်းအဆင့် ဝန်ထမ်းဦးရေခုနှစ်သောင်းကျော်နှင့် အမှုထမ်းအဆင့်ဝန်ထမ်းဦးရေ ကိုးသိန်းနီးပါးရှိကြောင်း ကမ္ဘာဘဏ်နှင့် စီမံ/ဘဏ္ဍာဝန်ကြီးဌာနတို့ မကြာသေး မီက ပူးပေါင်းထုတ်ပြန်ခဲ့သော မြန်မာနိုင်ငံ ၏ နိုင်ငံ့ဝန်ထမ်းလစာ၊ စရိတ်၊ ချီးမြှင့်ငွေ စနစ်နှင့် လူ့စွမ်းအားအရင်းအမြစ်စီမံ ခန့်ခွဲခြင်းအစီရင်ခံစာတွင် ဖော်ပြထားသည်။

လစာတိုးမြှင့်မည့်ပုံစံမှာ ယခင် အစိုးရများကဲ့သို့ လစာပမာဏဖြင့် တိုးပေးခြင်းမဟုတ်ဘဲ အရာထမ်းအဆင့်ကို လက်ရှိလစာ၏ ၁၀ ရာခိုင်နှုန်းနှင့် အမှုထမ်းအဆင့်ကို ၂၀ ရာခိုင်နှုန်း တိုးပေးခြင်းဖြစ်သည်။

သို့သော် လစာတိုးမည့်သတင်းထွက်ပြီး ရက်အနည်းငယ်ကြာတွင် ကုန်ဈေးနှုန်းက တက်နေပြီဖြစ်သည်။

လစားတိုးသတင်းကြောင့် အဓိကစားသောက်ကုန် ဆန်ဈေးများလည်း တက်ရိပ်ပြလာသည်။

 

“တိုးတာက ၁၀ ရာခိုင်နှုန်းရယ်။ တိုးမယ်လို့ပြောပြီး နှစ်ရက်လောက်ကြာတော့ ဈေးထဲမှာ ကြက်ဥ ခုနစ်လုံး ၁၀၀၀ (ကျပ်) ဖြစ်နေပြီ။ လစာတိုးသတင်းမတိုင်မီက ၁၀၀၀ ဖိုး ကြက်ဥ ရှစ်လုံး၊ ကိုးလုံးရတယ်” ဟု နိုင်ငံပိုင်ဘဏ်တစ်ခုတွင် လက်ထောက်မန်နေဂျာအဖြစ် လုပ် ကိုင်နေသူ ဒေါ်ခင်ငြိမ်းချမ်း (အမည်လွှဲ) က ဆိုသည်။

ဦးစီးအရာရှိ သို့မဟုတ် လက်ထောက်မန်နေဂျာရာထူးမှာ အရာထမ်းအဆင့်တွင် အောက်ဆုံးအဆင့်ဖြစ်ပြီး လက်ရှိ ခံစားလစာမှာ တစ်လကျပ်နှစ်သိန်းခွဲဖြစ်ရာ ထပ်တိုးခံစားရမည့်ပမာဏမှာ ကျပ်နှစ်သောင်းခွဲဖြစ်သည်။

ယင်းပမာဏမှာ ရုံးအကူ၊ စာပို့ အဆင့်ဝန်ထမ်းထပ်တိုးခံစားရမည့် လစာ ၂၄,၀၀၀ ကျပ်ပြီးလျှင် ဒုတိယအနည်းဆုံး တိုးသည့်ပမာဏ ဖြစ်သည်။

“အရာထမ်းအဆင့်မှာမှ ကိုယ်က အောက်ဆုံးအဆင့်ဆိုတော့ တိုးသာ တိုးတယ်၊ ဘာမှမထူးဘူး။ အမှုထမ်းအဆင့်ကမှ လစာတိုးတာ ကိုယ့်ထက် ပိုများသေးတယ်။ ပိုများပေမယ့် ဈေးတက်တာနဲ့ သူတို့လည်း ဘာမှမထူးပါဘူး” ဟု လစာတိုးခြင်းနှင့်ပတ်သက်၍ ဒေါ်ခင် ငြိမ်းချမ်းက မှတ်ချက်ပေးသည်။

အစိုးရဝန်ထမ်း လစာတိုးသည့် သမိုင်းကြောင်းကို ကြည့်လျှင် ၁၉၇၂ ခုနှစ်မှ လက်ရှိဘဏ္ဍာနှစ်အထိ နှစ်ပေါင်း ၄၆ နှစ်အတွင်းလစာ ဆယ်ကြိမ်တိုးသည့်အနက် ယခုနောက်ဆုံးဆယ်နှစ်အတွင်း အစိုးရဝန်ထမ်းလစာ ငါးကြိမ်အထိ တိုးမြှင့်ခဲ့သည်။

လစာတိုးမြှင့်သည့် အကြိမ်ရေ ပိုစိပ်လာသော်လည်း လစာတိုးခြင်းကို ဝန်ထမ်းများ မပျော်မွေ့နိုင်တော့ပေ။

တရားခံက တဒိုင်းဒိုင်းထိုးတက်နေသောကုန်ဈေးနှုန်း ဖြစ်သည်။

လစာ၏ ရှေ့ကပြေးနှင့်သော ကုန်ဈေးနှုန်းကို အမီလိုက်နိုင်ရန် ယခင် အစိုးရလက်ထက်တွင် ၂၀၁၃ – ၂၀၁၄ ဘဏ္ဍာနှစ်မှ စတင်ကာ ဘဏ္ဍာနှစ် သုံးနှစ် ဆက်တိုက် လစာတိုးမြှင့်ခဲ့သည်။

သို့သော် ကုန်ဈေးနှုန်းက ရှေ့မှ ဦးဆောင်နေဆဲ။

“အရင်အစိုးရတုန်းကလည်း ကုန်ဈေးနှုန်းကို လိုက်မီအောင်ဆိုပြီး သုံးနှစ်ဆက်တိုက်တိုးခဲ့တယ်။ အဲဒီအချိန်တုန်းက စီးပွားရေးက နည်းနည်းကောင်းနေသေးတာပေါ့လေ။ ဒါပေမဲ့ ကုန်ဈေးနှုန်းတက်တိုင်း လစာလိုက်တိုးနေလို့ကတော့ ဘယ်တော့မှပြီးမှာ မဟုတ်ဘူး။ ဒါက နည်းလမ်းကောင်းတော့ မဟုတ်ဘူး” ဟု ယခင်အစိုးရလက်ထက် ဘဏ္ဍာရေးဝန်ကြီးဌာနတွင် အကြီးတန်းအရာရှိတာဝန်ယူခဲ့သူ စီးပွားရေးပညာရှင် က ဆိုသည်။

ကုန်ဈေးနှုန်းကို လိုက်မီရန်၊ ကာမိရန် လစာတိုးပေးသည်မှာ ရောဂါရှိ သူကို ဝေဒနာသက်သာရန် သောက်ဆေးပေးရုံလုပ်ခြင်းဖြစ်ပြီး ရောဂါပျောက်ကင်းအောင် ကုသခြင်းမဟုတ်ကြောင်း ၎င်းက ဆိုသည်။

လစာတိုးမြှင့်မည့် နိုင်ငံတော်သမ္မတ၏ မိန့်ခွန်းပြီးရက်ပိုင်းအကြာတွင် ဈေးကွက်အတွင်းရိုက်ခတ်မှုများရှိပြီး အခြေခံစားသောက်ကုန်ဈေးနှုန်းအချို့ မြင့်တက်လာသည်။

“အခုကို ဈေးနှုန်းစစ်တမ်းကောက်တာမှာ ဈေးတက်တာတွေ တွေ့ရတယ်။ အထူးသဖြင့်တော့ အစားအစာအုပ်စုမှာ ရိုက်ခတ်မှုတွေရှိတယ်” ဟု ဗဟိုစာရင်း အင်းဦးစီးဌာန၏ ညွှန်ကြားရေးမှူးချုပ် ဒေါက်တာဝါဝါမောင်က ဖြေကြားသည်။

ဗဟိုစာရင်းအင်းဦးစီးဌာနသည် တိုင်းပြည်၏ ငွေကြေးဖောင်းပွမှုနှုန်းကို လစဉ် စစ်တမ်းကောက်ခြင်းနှင့် စားသုံးသူအညွှန်းကိန်း (ကုန်ဈေးနှုန်း) တွက်ချက်ထုတ်ပြန်ပေးရသည့် အဖွဲ့အစည်း ဖြစ်သည်။

လစာတိုးခြင်းနှင့် ကုန်ဈေးနှုန်းတက်ခြင်းမှာ တိုက်ရိုက်အချိုးကျနေပြီးကုန်ဈေးနှုန်းကို ကာမိရန် လစာတိုး၊ လစာတိုးသည့် ကုန်ဈေးနှုန်းတက်၊ တက်လာသည့် ကုန်ဈေးနှုန်းကို လစာကမမီ၊ လစာ ထပ်တိုး၊ ကုန်ဈေးနှုန်းထပ်တက်ဆိုသည့် အဆိုးသံသရာစက်ဝန်းထဲမှ ရုန်းထွက်မရ ဖြစ်နေသည်။

လက်လုပ်လက်စားအခြေခံလုပ်သားများအတွက် ပိုမိုအကြပ်ရိုက်စေခဲ့သည်။

နောက်တစ်ချက်မှာ လစာတိုးချိန်နှင့် ကုန်ဈေးနှုန်းမြင့်တက်ချိန်သည် မြန်မာ့နှစ်သစ်ကူးသင်္ကြန်ကာလနှင့်လည်း ဆက်စပ်နေသည်။

နှစ်စဉ် သင်္ကြန်ကာလကျော်လွန်ပါက ကုန်ဈေးနှုန်းများ မြင့်တက်လေ့ရှိသည်မှာ ပုံမှန်ရာသီချိန်ဖြစ်ပြီး အစိုးရဝန်ထမ်း လစာတိုးသည့်နှစ်များတွင်မူ ကုန်ဈေးနှုန်းက ခုန်ပျံကျော်လွှား စွမ်းပကားဖြင့် မြင့်တက်လေ့ရှိသည်။

“သင်္ကြန်နားနီးရင် ဈေးပိတ်၊ ကျောင်းပိတ်၊ အလုပ်တွေပိတ်ကြတယ်။ သင်္ကြန်တွင်းမှာ အလှူအတန်းလုပ်တာလည်းများတော့ ဈေးတွေ ဝယ်ကြတယ်။ ဒီတော့ ဈေးတက်တာက ထုံးစံပဲ။ အခုလည်းလစာ ၁၀ ရာခိုင်နှုန်း၊ ၂၀ ရာခိုင်နှုန်း တိုးတဲ့အပေါ်မှာ ဈေးနှုန်းက ပိုဆောင်းပြီး တက်ချင်တဲ့ပုံစံ ဖြစ်နေတယ်” ဟု ဒေါက်တာဝါဝါမောင်က သုံးသပ်သည်။

ဝန်ထမ်းလစာတိုးသည်နှင့် ကုန်ဈေးနှုန်းမြင့်တက်မည်ဆိုသည့်အချက်ကို အမှီပြုကာ ဈေးတင်ရောင်းခြင်းဖြင့် ဈေးနှုန်းမြင့်တက်သည့် လမ်းကြောင်းပေါ်လာရန် ပုံဖော်လေ့ရှိကြောင်း ၎င်းက ဆိုသည်။

“ဈေးတက်ဖို့ဆိုတဲ့ လမ်းကြောင်းကို မှန်းပြီးတော့ ဈေးတက်ရောင်းတဲ့အခါကျတော့ ဈေးကတက်လာတော့တာပေါ့”

သာဓကအနေဖြင့် ၂၀၀၅ – ၂၀၀၆ ဘဏ္ဍာနှစ်တွင် စားသုံးသူအညွှန်းကိန်း ၄၆၃ ဒသမ ၂၆ ရှိရာမှ အစိုးရဝန်ထမ်းလစာတိုးမြှင့်လိုက်သည့် နောက်ဘဏ္ဍာနှစ်တွင် စားသုံးသူအညွှန်းကိန်း ၅၈၅ ဒသမ ၂၃၊ ရာခိုင်နှုန်းအားဖြင့် ၂၆ ရာခိုင်နှုန်းကျော် မြင့်တက်ခဲ့သည်။

ထို့အတူ ၂၀၀၈ – ၂၀၀၉ ဘဏ္ဍာ နှစ်တွင် အစိုးရဝန်ထမ်းလစာတိုးမြှင့်ခဲ့ပြီးစားသုံးသူ အညွှန်းကိန်းမှာ ယခင် ဘဏ္ဍာနှစ်ထက် ၂၂ ဒသမ ၅ ရာခိုင်နှုန်း မြင့်တက်ခဲ့သည်။

ဈေးကွက်တွင် ကုန်ဈေးနှုန်းက တက်နေပြီဖြစ်သော်လည်း လက်ရှိအချိန်ထိ လစာတိုးမည့် တရားဝင်ညွှန်ကြားစာပင် ထွက်မလာသေးပေ။

လစာတိုးမြှင့်မည့်သတင်းမထွက်ခင် ယခုနှစ်မတ်လအတွက် စားသုံးသူ အညွှန်းကိန်းမှာ ၁၃၉ ဒသမ ၁၁ တွင် ရှိပြီး ယခင်နှစ် အလားတူကာလနှင့် နှိုင်းယှဉ်ပါက ၅ ဒသမ ၄၂ ရာခိုင်နှုန်း မြင့်တက်လာကြောင်း ဗဟိုစာရင်းအင်းဦးစီး ဌာန၏ စာရင်းအရသိရသည်။

“ဆီဈေးကမတက်သေးဘူး။ ဈေးတက်ဖို့တော့ ရှိတယ်လို့ ဈေးသည်တွေက ပြောတယ်။ ဆန်ဈေးကတော့ ဆန်အမျိုးအစား ၁၅ မျိုးလောက်ရှိရင် ခုနစ်မျိုးလောက်ပဲ တက်တာ။ အရင်က ၁၉၀၀ က အခု ၂၀၀၀ ဖြစ်သွားတယ်။ တခြားစားသောက်ကုန်တွေလည်း တက်တဲ့ဟာလည်း ရှိတာပေါ့”ဟုကျောက်တံတားမြို့နယ်တွင် နေထိုင်သည့် ဒေါ်ခင်စန်းက ဆိုသည်။

ယခုတစ်ကြိမ် လစာတိုးသည့် ပမာဏမှာ အစိုးရဝန်ထမ်းများအတွက် ထူးခြားပြောင်းလဲမှုမရှိသလောက် နည်းပါးသည့်အတွက် ကုန်ဈေးနှုန်းတက်သည့်ဒဏ် ပိုခံရသည်သာ အဖတ်တင်ကြောင်း ဒေါ်ခင်ငြိမ်းချမ်းကရင်ဖွင့်သည်။

“ရုံးတက်ရုံးဆင်း ခရီးစရိတ်တင် ခြောက်သောင်းကုန်တယ်။ မီးဖိုချောင်စရိတ်ကို အောက်ဆုံးအဆင့် ခြိုးခြံစားမယ်ဆိုရင်တောင် တစ်သိန်းကုန်တယ်။ ဒါ ကလေးစရိတ်၊ သာရေးနာရေး၊ ဗာဟီရ ကုန်တာတွေမပါသေးဘူး”ဟု ၎င်းက ဆိုသည်။

ရန်ကုန်မြို့ရှိ အစိုးရရုံးတစ်ခုမှ ၀န်ထမ်းများကို တွေ့ရစဉ် ။

လစာတိုးမြှင့်သည့် သမိုင်းတစ်လျှောက်တွင် ၂၀၀၆ – ၂၀၀၇ ဘဏ္ဍာနှစ် တွင် စံချိန်တင်လစာတိုးမြှင့်ပေးခဲ့ပြီး ယခင်ခံစားနေရသည့်လစာထက် ငါးဆမှ ဆယ်ဆကျော်အထိ (၅၀၀ ရာခိုင်နှုန်းမှ ၁၀၀၀ ရာခိုင်နှုန်း) လစာတိုးခဲ့သည်။

အဆိုပါဘဏ္ဍာနှစ်တွင် ညွှန်ကြား ရေးမှူးချုပ်လစာမှာ ကျပ်တစ်သောင်းခွဲမှ ကျပ်တစ်သိန်းကိုးသောင်း၊ ရုံးအကူ၊ စာပို့ဝန်ထမ်းလစာမှာ ကျပ်သုံးထောင်မှ ကျပ်တစ်သောင်းခွဲသို့ တိုးမြှင့်ပေးခဲ့သည်။

လစာတိုးပမာဏဒုတိယအများဆုံးမှာယခင်အစိုးရလက်ထက် ၂၀၁၅ – ၂၀၁၆ ဘဏ္ဍာနှစ်တွင်ဖြစ်ပြီး ယခင် လစာထက် ၆၀ ရာခိုင်နှုန်းမှ ၁၀၀ ရာခိုင်နှုန်းအထိတိုးမြင့်ခဲ့သည်။

“ကုန်ဈေးနှုန်းက လစာတိုးရင် တက်နေမှာပဲ။ လစာတိုးတယ်ဆိုတာ အပေါစား လူကြိုက်အောင်လုပ်နည်းပဲ။ အရင်အစိုးရတုန်းကလည်း လုပ်ခဲ့တယ်။ တကယ်လုပ်ရမှာက တက်နေတဲ့ ကုန်ဈေးနှုန်းတန့်သွားအောင်၊ ကုန်ဈေးနှုန်းတည်ငြိမ်အောင်လုပ်ရမှာ” ဟု စီးပွားရေး ပညာရှင်တစ်ဦးက မှတ်ချက်ပေးသည်။

ကုန်ဈေးနှုန်းမြင့်တက်မှုကို ထိန်းကျောင်းရန်၊ ကုန်ဈေးနှုန်းတည်ငြိမ်ရန် စားသုံးသူများအမှန်တကယ် သုံးစွဲသည့် ကုန်စည်များ ထုတ်လုပ်ခြင်း၊ ထုတ်လုပ်မှု ပိုမိုတိုးတက်ရန်လုပ်ဆောင်ခြင်းဖြင့် ကုန်ဈေးနှုန်းတက်ခြင်းကို ထိန်းကျောင်းနိုင်ကြောင်း ဒေါက်တာဝါဝါမောင်က ဆိုသည်။

“ကုန်ဈေးနှုန်းကျဖို့၊ တည်ငြိမ်ဖို့က ဝယ်လိုအားများတဲ့ ကုန်စည်တွေ ထုတ်လုပ်မှုများလာရင် ဈေးတက်မလာတော့ဘူး။ ရောင်းလိုအားဘက်က စဉ်းစားလည်း ရတယ်။ အမျိုးမျိုးစဉ်းစားပြီး လုပ်လို့ ရတယ်” ဟု ၎င်းက ပြောသည်။

ကုန်ဈေးနှုန်း ကြီးမြင့်ခြင်း၏ အကြောင်းတစ်ချက်မှာ သယ်ယူပို့ဆောင်စရိတ်မြင့်မားခြင်း၊ စက်သုံးဆီဈေးနှုန်း မြင့်တက်ခြင်းတို့ကြောင့် ဖြစ်ပြီး ကုန်ထုတ်လုပ်မှုအတွက် လိုအပ်သော သွင်းအားစုဈေးနှုန်းများတည်ငြိမ်ရန် ဆောင်ရွက်သင့်ကြောင်း ဘဏ္ဍာရေးဒုတိယ ဝန်ကြီးဟောင်း ဒေါက်တာမောင်မောင်သိမ်းက မှတ်ချက်ပေးသည်။

“သွင်းအားစုဈေးနှုန်းတွေ တည်ငြိမ်အောင်လုပ်ရမယ်၊ နောက် မတရား အမြတ်ကြီးစားသူတွေကို ကြီးကြပ်ရမယ်။ ဒါတွေကို ကြိုးစားလုပ်ဖို့ လိုတယ်” ဟု ၎င်းက ဆိုသည်။

ကုန်ဈေးနှုန်းတည်ငြိမ်၊ ကျဆင်းရန် မလုပ်ဆောင်နိုင်ပါက လစာတိုးခြင်းကြောင့် နောက်ဆက်တွဲဆိုးကျိုးများ ဖြစ်ပေါ်လာနိုင်သည်။

အစိုးရဝန်ထမ်းလစာတိုးသည့်အတွက် ဝန်ထမ်းတစ်ဦးချင်းတွင် ပမာဏ နည်းသော်လည်း နိုင်ငံတော်အနေနှင့် အလုံးအရင်း သုံးစွဲရသောကြောင့် ဘတ်ဂျက်လိုငွေပြမှုပိုများကာ ငွေကြေး ဖောင်းပွမှုသို့ ဦးတည်မည်ဖြစ်ကြောင်း ဒေါက်တာမောင်မောင်သိမ်းက ဆိုသည်။

“ဘယ်အစိုးရပဲတက်တက် တစ်နိုင်ငံလုံးရဲ့ စီးပွားရေးကောင်းလာဖို့၊ ပြည်သူတွေဝင်ငွေတက်လာဖို့ အရေးကြီးတာက ခံယူချက်နဲ့ တကယ် ထိထိရောက်ရောက် စိုက်လိုက်မတ်တတ်လုပ်တဲ့ အဖွဲ့အစည်းတွေ၊ ပုဂ္ဂိုလ်တွေလိုတယ်။ အပေါ်ယံလုပ်ပြနေလို့တော့မရဘူး”

စစ်ငြိမ်းသူ

You may also like...

Leave a Reply

Your email address will not be published. Required fields are marked *