တရားဥပဒေစိုးမိုးရေး ဆိုသည်မှာ …

လောကတွင် ဓမ္မနှင့် အဓမ္မ ဟူသည်ရှိ၏။

ထို့ကြောင့် တရားနှင့် လျော်ညီသော အမှုကိစ္စတို့ရှိကြသလို တရားနှင့်မလျော်ညီသော အမှုကိစ္စတို့လည်း ရှိကြကုန်၏။ မည်သည့်အမှု တို့သည် တရားသောအမှုဖြစ်၍ မည်သည့်အမှုတို့သည် မတရားသောအမှုများ ဖြစ်ကြပါသနည်း။ တရားခြင်း/ မတရားခြင်းကို အများညီပေတံဖြင့် တိုင်းတာခြင်းကသာ လက်တွေ့နှင့် အနီးစပ်ဆုံးဖြစ်ပါလိမ့်မည်။ သို့နှင့် ဒေသတစ်ခုချင်းစီနှင့်ဆိုင်သော တရားမျှတမှုအတွက် အများသဘောညီသည့် စည်းမျဉ်းသတ်မှတ်ချက်များ ပေါ်ပေါက်လာရလေသည်။ ၎င်းကိုပင် ‘ဥပဒေ’ ဟု နာမသမုတ်ကြသည်။

ဥပဒေဆိုသည်မှာ ဒေသတစ်ခု၊ နယ်ပယ်တစ်ခုအတွင်း စုစည်းနေထိုင်ကြသူများအကြားတွင် လူ့အဖွဲ့အစည်း၏ တရားမျှတမှုအတွက် မည်သည့်အချက်တို့ကို လိုက်နာနေထိုင်ကြမည်ဟူသော စုပေါင်းသဘောတူညီထားချက်များသာဖြစ်သည်။ ယင်းမှာ ဥပဒေ၏ စစ်မှန်သော အဓိပ္ပာယ်ဖွင့်ဆိုချက် ဖြစ်ပါသည်။

ဥပဒေ၏ ပင်ကိုစံများမှာ တိကျသည်။ ပြတ်သားသည်။ အများသဘောတူညီချက်ဖြစ်သောကြောင့် တရားဝင်မှုနှင့် မျှတမှုရှိသည်။ မှန်ကန်တည့်မတ်ပြီး စည်းစနစ်ကျသည်။ ထို့ကြောင့် ဥပဒေသည် ကြည်ညိုလေးစားဖွယ်ရာ ဂုဏ်သိက္ခာတို့နှင့်ပြည့်စုံသည်။ သို့တစေ ဆန့်ကျင်ဘက်အရာနှစ်ခု ဒွန်တွဲဖြစ်တည်လေ့ရှိသော လောကနိယာမ သဘောအရကောင်းသောဥပဒေနှင့် ဆိုးသောဥပဒေ၊ တရားသောဥပဒေနှင့် မတရားသောဥပဒေ၊ တရားသောစီရင်မှုနှင့် မတရားသော စီရင်မှုများဟူ၍ ပေါ်ပေါက်လာခဲ့ပါသည်။

တရားဥပဒေစိုးမိုးရေးကိစ္စကို ကျမ်းကြီးကျမ်းငယ်အကိုးအကား အသွယ်သွယ် သီအိုရီအထပ်ထပ်တို့ဖြင့် ဖွင့်ပြလျှင် စာလေးမည်စိုးသဖြင့် ယခုစာစုတွင် အရပ်ဆန်ဆန်အလွတ်သဘောအနေဖြင့်သာ ဆွေးနွေးတင်ပြလိုပါသည်။

တရားဥပဒေစိုးမိုးရေးနှင့် မတရားဥပဒေမစိုးမိုးရေး

တရားဥပဒေစိုးမိုးရေးဆိုသည်မှာ ‘မတရားသောဥပဒေများ’ မစိုးမိုးနိုင်ရေးပင်ဖြစ်သည်။ ‘တရားသောစီရင်မှုများ’ ပေါ်ပေါက်လာပြီး ‘မတရားသော စီရင်မှုများ’ ချုပ်ငြိမ်းရေးပင် ဖြစ်ပါသည်။ ထို့ကြောင့် တရားဥပဒေစိုးမိုးရေးကို ဆောင်ရွက်မည်ဆိုလျှင် ကနဦးအနေဖြင့်
‘မတရားသောဥပဒေများ’ ကို ပယ်ဖျက်ဖို့လိုပါသည်။

မတရားသောဥပဒေဆိုသည်မှာ …

– လူ့အခွင့်အရေးနှင့် လူသားချင်းစာနာမှုဆိုင်ရာနှုန်းစံများကို ချိုးဖောက်နေသောဥပဒေများ

– လက်ရှိခေတ်စနစ်နှင့် မလျော်ညီတော့သည့် ပြဋ္ဌာန်းချက်များ

– ပြည်သူလူထု၏ နိုင်ငံသားလွတ်လပ်ခွင့်နှင့်ရပိုင်ခွင့်များအပေါ် ကန့်သတ်ချုပ်ချယ်ပိတ်ပင်ထားသော ဥပဒေများ

– အာဏာရှင်စနစ်တွင် ထုတ်ပြန်သော နှုတ်မိန့်ညွှန်ကြားချက်နှင့် ဥပဒေမမည်သော လုပ်ထုံးလုပ်နည်းများ

– အာဏာရှိသူများ ထင်သလို လုပ်ကိုင်ခွင့်ရစေရန်ရေးဆွဲထားသော ဥပဒေများ

– ပြည်သူလူထု၏ အသက်အိုးအိမ်စည်းစိမ်နှင့် နေ့စဉ်လူမှု ဘ၀များကို ခြိမ်းခြောက်နေသော ဥပဒေများ
အစရှိသည့် ဥပဒေများကို ‘မတရားသောဥပဒေများ’ ဟု ခေါ်သည်။

တရားသောဥပဒေဆိုသည်မှာ ပြည်သူလူထုကိုယ်တိုင် သို့မဟုတ် ပြည်သူက ရွေးကောက်တင်မြှောက်ထားသော ကိုယ်စားလှယ်များက ရေးဆွဲသော ဥပဒေဖြစ်ခြင်း၊ ခေတ်စနစ်နှင့် လျော်ညီသောအချက်အလက်နှင့် ပြစ်မှုပြစ်ဒဏ်များ စနစ်တကျပါဝင်ခြင်း၊ ပြည်သူ့အကျိုးစီးပွားနှင့် ဘ၀လုံခြုံမှုကို အမှန်တကယ်အာမခံနိုင်သော ဥပဒေဖြစ်ခြင်း၊ ပြည်သူအတွက် လွတ်လပ်မှုနှင့် လူ့ဂုဏ်သိက္ခာကို ကာကွယ်ပေးနိုင်ခြင်း စသည့် အချက်များနှင့် ပြည့်စုံသောဥပဒေတို့ကို တရားသောဥပဒေဟု ခေါ်ကြသည်။

တရားသောစီရင်မှုနှင့် မတရားသောစီရင်မှု

ပြဋ္ဌာန်းထားသောဥပဒေများ တရားမျှတမှုရှိရုံဖြင့် လုံလောက်မှု မရှိသေးပါ။ ဥပဒေများအတိုင်း မတိမ်းမယွင်း မကွယ်မဖောက် လိုက်နာ စီရင်သော တရားစီရင်ရေးစနစ်များရှိလာမှသာ တရားဥပဒေစိုးမိုးရေး လုပ်ငန်းစဉ်က ပြည့်စုံမည်ဖြစ်သည်။ တရားစီရင်ရေးမှာလည်း နှစ်မျိုးရှိသည်။ ‘တရားမျှတသော စီရင်မှု’ နှင့် ‘တရားမမျှတသော စီရင်မှု’ ဟူ၍ ဖြစ်သည်။

‘တရားသောစီရင်မှု’ ဆိုသည်မှာ ဥပဒေကို မကျော်မခွ၊ လက်တစ်လုံးခြား လှည့်စားခြင်းမပြု၊ လိုအပ်သလို ဆန့်ခြင်း ကျုံ့ခြင်းမလုပ်ဘဲ ဥပဒေ အတိုင်း အတိအကျ စီရင်ခြင်းဖြစ်သည်။ ကျောသားရင်သားမခွဲခြားဘဲ ဥပဒေပြဋ္ဌာန်းချက်များတွင် ပါရှိသော အချက်အလက်များနှင့်အညီ အဆုံးအဖြတ်ပေးခြင်းဖြစ်သည်။ သူတောင်းစားမှ ရှင်ဘုရင်အထိ တရားဥပဒေရှေ့မှောက်တွင် ညီမျှသောအခွင့်အရေးရှိသည်။ တရားစီရင်သူများ အနေဖြင့်လည်း ဘာကိုမှ ကြောက်ရွံ့နေစရာမရှိ ။ ထောက်ထားနေစရာမလို။ ဥပဒေနှင့်အညီ အမှုကိစ္စအားလုံးကို ဆုံးဖြတ်ပေးရန်သာဖြစ်သည်။ ဆိုရလျှင် ဥပဒေ၏အထက်တွင် မည်သည့်အရာကမှ လွှမ်းမိုးချုပ်ကိုင်မှုမရှိဘဲ လွတ်လပ်စွာတရားစီရင်ခြင်းပင် ဖြစ်ပါသည်။ လက်ရှိမြန်မာနိုင်ငံတွင် ထိုသို့သော တရားစီရင်ရေးစနစ် ရှိနေသလားဆိုသည်ကတော့ စာရှုသူများကိုယ်တိုင် မျက်မြင်ပင်ဖြစ်ပေသည်။

‘မတရားသောစီရင်မှု’ ဆိုသည်ကတော့ စစ်အာဏာရှင်စနစ်အောက်တွင် နေခဲ့ဖူးသူများအတွက် အထူးတလည် ရှင်းပြစရာ လိုမည် မထင်။

ကြိုက်တဲ့ရှေ့နေငှား၊ ကြိုက်သလောက်လျှောက်လဲချက်ပေး အချိန်တန်လျှင် အမိန့်က စာအိတ်နှင့်ရောက်လာစမြဲ။ တရားရုံးအလုပ်က စာဖတ်ပြရုံသာ။ တရားစီရင်ရေးကဏ္ဍ၏ တိကျမှု၊ လွတ်လပ်မှု၊ မျှတမှု၊ ဥပဒေနှင့်အညီဖြစ်မှုဟူသော အင်္ဂါရပ်တွေ အားလုံး ပျောက်ကွယ်သွားပြီး အုပ်ချုပ်ရေးကဏ္ဍ၏ အစီအမံအတိုင်း လိုက်နာဆောင်ရွက်ကြရခြင်းဖြစ် သည်။ ထိုမှတစ်ဆင့် အုပ်ချုပ်ရေးကဏ္ဍနှင့် မသက်ဆိုင်သော အမှုကိစ္စများမှာပါ တရာရုံးများ၏ အဆုံးအဖြတ်များက မျှတမှုမရှိတော့ဘဲ အဂတိနွံအတွင်းသို့ သက်ဆင်းနစ်မြုပ်လေတော့သည်။

အဖြေကိုရှာသော် …

ဥပဒေများသည် အားကိုးရာ မဖြစ်။ တရားရုံးများသည် တရားမျှတမှုကို ဆောင်ကြဉ်းမပေးနိုင်ဟု ပြည်သူက ခံစားသိရှိလာချိန်တွင် တရား ဥပဒေစိုးမိုးရေးပျက်စီးလာတတ်သည်။ ထိုအခါ လမ်းပေါ်တွင်ဖြစ်သော ပြဿနာကို လမ်းပေါ်မှာရှင်းကြသည်။ အရပ်ထဲတွင်ဖြစ်သော ပြဿနာကို အရပ်ထဲမှာပဲ ရှင်းလိုက်ကြသည်။ ဥပဒေကား အရာမဝင်တော့။ အဘယ့်ကြောင့်ဆိုသော် ရဲစခန်းနှင့် တရားရုံးများက အမှန်တရားနှင့် တရားမျှတမှုအတွက် ယုံကြည်စရာအခြေအနေမျိုးမရှိတော့သောကြောင့်ပင် ဖြစ်ပါသည်။

တရားဥပဒေစိုးမိုးရေးအတွက် ပထမဆုံးအနေနှင့် ဥပဒေတွေ တရားမျှမှုရှိလာအောင် လုပ်ရမည်။ ဒုတိယအဆင့်မှာ တရားစီရင်ရေး ကဏ္ဍကို အုပ်ချုပ်ရေးနယ်ပယ်အပါအဝင် မည်သည့်အရာကမှ ချုပ်ကိုင်လွှမ်းမိုးမှုမရှိဘဲ လွတ်လပ်စွာစီရင်ခွင့်ရှိလာအောင် လုပ်ဆောင် ပေးရမည်။ တရားစီရင်ရေးမဏ္ဍိုင်ကို အဂတိတိုက်ဖျက်ရေးလို အဖွဲ့အစည်းများဖြင့် ထိထိရောက်ရောက် စိစစ်ကြပ်မတ် ထိန်းကျောင်းပေးရမည်။ တရားရုံးနှင့် ရဲတပ်ဖွဲ့အပါအဝင် ဥပဒေကို ကိုင်တွယ်အသုံးပြုနေကြသော ဝန်ထမ်းများအားလုံးကို အရည်အသွေးပိုင်းမြှင့်တင်ပေးခြင်းနှင့် လိုအပ်သလို စစ်ဆေးအရေးယူခြင်းများ ပြုလုပ်သင့်သည်။

ဤနေရာတွင် အရေးကြီးဆုံးသော အချက်တစ်ခုရှိပါသည်။ ပြည်သူနှင့် တရားရေးမဏ္ဍိုင်တို့ကိုသာကွက်ပြီး ဥပဒေလိုက်နာခိုင်း နေရုံဖြင့်မရ။ အုပ်ချုပ်ရေးမဏ္ဍိုင်နှင့် ဥပဒေပြုရေးမဏ္ဍိုင်တို့မှ ပုဂ္ဂိုလ်များအနေဖြင့်လည်း မိမိတို့၏ သက်ဆိုင်ရာဥပဒေများကို လိုက်နာကြဖို့ လိုသည်။ ခေါင်ကစပြီး မိုးလုံရပါမည်။ သို့မှသာ ပြည်သူကို ဥပဒေလိုက်နာကြဖို့ တိုက်တွန်းနိုင်မည်ဖြစ်သည်။

မြန်မာနိုင်ငံ၏ တရားဥပဒေစိုးမိုးရေးအခြေအနေမှာ အားရစရာ တစ်ကွက်မှ မရှိသေးပါ။ တရားစီရင်ရေးမဏ္ဍိုင်၏ ခေါင်းပေါ်တွင် လက်တွေက ရှုပ်နေကြဆဲ။ ဟိုက သည်က ‘ပြ’ နေကြသော အာဏာပါဝါတွေအောက်မှာ တရားရေးမဏ္ဍိုင်ကား ပြိုလဲရုံမက ပြားပြားပင် ဝပ်နေရလေသည်။ တကယ်ဆိုလျှင် တရားဥပဒေစိုးမိုးခြင်းသည် တိုင်းပြည်၏ ဂုဏ်သိက္ခာဖြစ်သည်။ လူ့အဖွဲ့အစည်း၏ အဆင့်အတန်းပင် ဖြစ်သည်။ သို့သော်လည်း တရားဥပဒေစိုးမိုးရေးအတွက် မျှော်လင့်ချက်ကတော့ နည်းလွန်းပါသည်။ သို့အတွက် ဥပဒေနယ်ပယ်မှလာသော သမ္မတအသစ်ကို အားကိုးဖို့သာရှိတော့သည်။

သမ္မတကြီးအနေနှင့် မြန်မာနိုင်ငံ၏ စိတ်ပျက်ဖွယ်ရာဖြစ်နေသော တရားဥပဒေစိုးမိုးရေးကိစ္စကို ထိထိရောက်ရောက် ကိုင်တွယ်ဖြေရှင်း ပေးနိုင်ပါစေကြောင်း ဆုမွန်ကောင်းတောင်းပေးလိုက်ရပါသည် …။

ဝင်းကို

You may also like...

Leave a Reply

Your email address will not be published. Required fields are marked *