ဥပဒေလက်ပိုက်ကြည့်နေရသည့် လောဘကစားပွဲများ

မြန်မာနိုင်ငံကဲ့သို့ ဖွံ့ဖြိုးဆဲနိုင်ငံအတွက် အဘက်ဘက်တွင် အားနည်းချက်များစွာ ရှိနေသည်။

အထူးသဖြင့် စီးပွားရေးတွင် အောက်ကျနောက်ကျကျန်ရစ်ခဲ့သည်မှာ ယနေ့အချိန်ထိဖြစ်ပြီး တစ်ဦးချင်းပျမ်းမျှ ဝင်ငွေနည်းပါးသည့် နိုင်ငံများစာရင်းတွင် ပါဝင်နေဆဲ။

ပြည်သူများမှာ ပုံမှန်ဝင်ငွေအပြင် တစ်ဖက်တစ်လမ်းက ရလာမည့် အပိုဝင်ငွေကို အသည်းအသန် ရှာဖွေနေကြရသည်။

ပြည်တွင်းရှိ ကွန်ရက်ဖြန့်ကြက် စီးပွားရေး (Multi-level Marketing -MLM) လုပ်ငန်းအများစုမှာ ဤအချက်ကို အမိ အရဆုပ်ကိုင်ကာ စီးပွားရေးလုပ်နေကြသည်။

အဆိုပါ MLM လုပ်ငန်းများကို ပြည်ထဲရေးဝန်ကြီးဌာနက ဆင့်ပွား ကွန်ရက်ချိတ်ဆက် ရောင်းဝယ်သည့်စနစ် ဟု သုံးနှုန်းခေါ်ဆိုပြီး ပြီးခဲ့သည့် ၂၀၁၇ ခုနှစ် စက်တင်ဘာလတွင် MLM လုပ်ငန်းများနှင့်ပတ်သက်၍ သတင်းထုတ်ပြန် ခဲ့သည်။

ယင်းထုတ်ပြန်ချက်တွင် အများပြည်သူအတွက် အကျိုးမပြုသည့် ဆင့်ပွား ကွန်ရက် ချိတ်ဆက်ရောင်းဝယ်သည့်စနစ် ဟု ခေါင်းစဉ်တပ်ဖော်ပြကာ အများပြည်သူကို အသိပေးကြေညာချက် ထုတ်ပြန်ခဲ့ခြင်းဖြစ်သည်။

သို့သော် ယင်း MLM လုပ်ငန်းများမှာ လက်ရှိအချိန်ထိ ပြည်တွင်းတွင် အရှိန်ကောင်းကောင်းဖြင့် လည်ပတ်နေဆဲ ဖြစ်သည်။

ထိုလုပ်ငန်းများ၏ အဓိကပစ်မှတ် မှာ အိမ်ထောင်တာဝန်ယူထားရသော အိမ်ထောင်ရှင်မများ၊ အပိုဝင်ငွေရလို သော ကျောင်းသူကျောင်းသားလူငယ်များနှင့် ငွေကြေးအရ ကျပ်တည်းနေသော နယ်မြို့၊ ကျေးရွာများရှိ ပြည်သူများဖြစ်ပြီး ယခုအခါ သာသနာ့ဝန်ထမ်း ရဟန်းများပင် ပါဝင်လာသည်။

ထိုလုပ်ငန်းများကြောင့် ထိခိုက်နစ်နာသူ ထောင်နှင့်ချီရှိသော်လည်း အဆိုပါထိခိုက်နစ်နာမှုအတွက် သက်ဆိုင် ရာ တာဝန်ရှိ အစိုးရဌာနများသို့ တရားဝင်တိုင်တန်းသူ တစ်ယောက်မျှပင် ပေါ်ပေါက်မလာသည်မှာလည်း ယင်းလုပ်ငန်းများကို သက်ဆိုးရှည်စေသည်။

လက်ရှိအချိန်ထိ ကွန်ရက်ဖြန့်ကြက် စီးပွားရေးစနစ်ကြောင့် နစ်နာခဲ့ရသည်ဆိုသော တိုင်တန်းချက် တစ်ခုမျှမရှိသေးကြောင်း စားသုံးသူရေးရာဦးစီးဌာနမှ တာဝန်ရှိသူတစ်ဦးက ဖြေကြားသည်။

“စားသုံးသူရေးရာဦးစီးဌာနကို နစ်နာမှုအတွက် တိုင်ကြားနိုင်တယ်ဆိုပေမယ့် နစ်နာခဲ့သူတွေက ပြောရဲဆိုရဲ တိုင်ရဲ ဖို့လိုသေးတယ်” ဟု အလိမ်အညာစီးပွားရေးဖြစ်နိုင်ခြေရှိသော လုပ်ငန်းများကို ဖေ့စ်ဘွတ်ခ်တွင် အစဉ်တစိုက် သတိပေးထောက်ပြမှုပြုလုပ်နေသော Anti -MLM (ကွန်ရက်ဖြန့်ကြက် စီးပွားရေး စနစ် ဆန့်ကျင်သူများ) အဖွဲ့တည်ထောင်သူတစ်ဦးဖြစ်သူ ကိုဇင်ဇေလွင်က ဆိုသည်။

နောက်တစ်ချက်မှာ ထိုလုပ်ငန်းများကို အစိုးရက တိကျသေချာစွာစိစစ်အရေးယူမည့် အစီအစဉ် ယခုထိထွက်ပေါ်မလာသည့်အတွက် မသိနားမလည်သူ ပြည်သူများမှာ ဆုံးရှုံးနစ်နာမှုများသာ ခံစားနေရသည်။

MLM လုပ်ငန်းများနှင့်ပတ်သက်၍ ၂၀၁၆ ခုနှစ် ဒီဇင်ဘာလက ပြုလုပ်ခဲ့သည့် ပြည်သူ့လွှတ်တော် အစည်းအဝေးတွင် လွှတ်တော်ကိုယ်စားလှယ်တစ်ဦးက ကြယ်ပွင့်ပြမေးခွန်းတစ်ခု မေးမြန်းခဲ့သည်။

ယင်းလုပ်ငန်းများကို ကန့်သတ် ပိတ်ပင်ရန် အစီအစဉ် ရှိ မရှိ မေးမြန်း ခဲ့ခြင်းဖြစ်ပြီး ဥပဒေပြဋ္ဌာန်းချက်မရှိသေး သော်လည်း စုံစမ်းဖော်ထုတ်ခြင်း၊ တိုင်တန်း ဖော်ပြခြင်းရှိလာပါက တည်ဆဲ ဥပဒေများအရ အရေးယူသွားမည် ဖြစ်ကြောင်း ပြည်ထဲရေးဝန်ကြီးဌာန ဒုတိယဝန်ကြီးက ပြန်လည်ဖြေကြားခဲ့သည်။

ယင်းသို့ လွှတ်တော်တွင် မေးမြန်းပြီး တစ်နှစ်ခန့်အကြာ ၂၀၁၇ ခုနှစ် စက်တင်ဘာလတွင် ပြည်တွင်းရှိ MLM လုပ်ငန်းများကို ပြည်ထဲရေးဝန်ကြီးဌာန အထူးစုံစမ်းစစ်ဆေးရေးဦးစီးဌာနက ဦးဆောင်ကာ ကုန်သွယ်ရေးဦးစီးဌာန၊ အကောက်ခွန်ဦးစီးဌာန၊ ပြည်တွင်းအခွန် များဦးစီးဌာန၊ ရင်းနှီးမြှုပ်နှံမှုနှင့် ကုမ္ပဏီ များ ညွှန်ကြားမှုဦးစီးဌာနနှင့် အစားအသောက်နှင့် ဆေးဝါးကွပ်ကဲရေးဦးစီး ဌာနတို့ ပူးပေါင်းပါဝင်သော အဖွဲ့က ခေါ်ယူစစ်ဆေးမေးမြန်းခဲ့သည်။

ထိုသို့ခေါ်ယူစစ်ဆေးပြီး မကြာမီတွင် MLM နှင့်ပတ်သက်၍ တရားစွဲဆိုမှုတစ်ခု ပေါ်ပေါက်ခဲ့သည်။

သို့သော် MLM လုပ်ငန်းကို တရားစွဲဆိုခြင်းမဟုတ်ဘဲ MLM စနစ် အကြောင်း အသိပညာပေးစာများ ရေးသားနေသူ ဦးရဲမျိုးသန့်ကိုပြည်တွင်းရှိ MLM လုပ်ငန်းတစ်ခုက ပုဒ်မနှစ်ခုဖြင့် တရားစွဲဆိုလိုက်ခြင်း ဖြစ်သည်။

“တခြားကုမ္ပဏီက လိမ်တဲ့ဖြစ်စဉ်ကို ကျွန်မတို့ Successmore ကုမ္ပဏီ သူဌေးကြီးတွေရဲ့ ဓာတ်ပုံနဲ့ ဖြတ်ညှပ်ကပ်လုပ်ပြီး Successmore ကုမ္ပဏီ လူလိမ်ဘာညာ စသဖြင့် ရေးတင်တယ်၊ တခြားပေ့ခ်ျတွေမှာ ရှယ်တယ်။ ဒါက သတင်းမှားဖြစ်နေတယ်၊ မလုပ်ဖို့ ကျွန်မတို့ သူ့ကိုတောင်းဆိုပေမယ့် သူက လက်မခံဘူး။ ဒါနဲ့ ကုမ္ပဏီရဲ့ ဒါရိုက်တာအဖွဲ့ဝင် ဆုံးဖြတ်ချက်အရ သူ့ကို တရားစွဲလိုက်တာပါ” ဟု Successmore Being Yangon ကုမ္ပဏီ၏ ဒါရိုက်တာ ဒေါ်နန်းကေဇင်လှက တရားစွဲရခြင်းအကြောင်းရင်းကို ပြန်လည်ဖြေကြားသည်။

အဆိုပါကုမ္ပဏီသည် လက်ရှိတွင် အဖွဲ့ဝင်ပေါင်း နှစ်သိန်းဝန်းကျင်ရှိပြီး ထိုင်းနိုင်ငံသားများနှင့် ဖက်စပ်တည် ထောင်ထားသော ကုမ္ပဏီကိုဖျက်သိမ်းကာ မြန်မာနိုင်ငံသားများကျန်ရှိသည့် ကုမ္ပဏီဖြင့် လုပ်ငန်းလည်ပတ်နေခြင်း ဖြစ်သည်။

ဥပဒေပြဋ္ဌာန်းချက်မရှိသေးသော၊ အများပြည်သူအတွက် အကျိုးမပြုသော စီးပွားရေးစနစ်တစ်ခုကို ထောက်ပြ ရေးသားနေသူအတွက် အကျိုးရလဒ်ကမူ တရားစွဲဆိုခံလိုက်ရခြင်းဖြစ်သည်။

“အစိုးရပြောင်းတာ ၂ နှစ်ကျော်သွားပြီ။ အုပ်ချုပ်ရေးပိုင်းနဲ့ တာဝန်ရှိသူတွေကို MLM နဲ့ပတ်သက်လို့ ဥပဒေ၊ စည်းကမ်းတွေ ထွက်လာဖို့ အတတ်နိုင်ဆုံး တောင်းဆိုကြည့်တယ်။ ဘာမှဖြစ်မလာတဲ့အချိန်မှာ အားမလိုအားမရဖြစ်ပေမယ့် ကိုယ်နိုင်သလောက်တော့ ဆက်လုပ်နေမှာပါ” ဟု Anti -MLM အဖွဲ့တွင်ပါဝင်သူ ဦးရဲမျိုးသန့်က ဆိုသည်။

ကုန်ပစ္စည်းအခြေခံ MLM စနစ် သုံးလုပ်ငန်းများအပြင် ယခုနောက်ပိုင်း ရှယ်ယာငွေကြေးများကို MLM စနစ်ဖြင့် ထည့်ဝင်စေကာ လိမ်လည်ခဲ့သည့်ဖြစ်စဉ်များလည်း ပေါ်ပေါက်ခဲ့ပြီး ဖြစ်သော်လည်း အရေးယူနိုင်မှု မရှိခဲ့ပေ။

အဘယ့်ကြောင့်ဆိုသော် ယင်းဖြစ်စဉ်များကို အရေးယူနိုင်မည့် အရေးပေါ် စီမံမှုအက်ဥပဒေကို ၂၀၁၆ ခုနှစ် အောက်တိုဘာလတွင် ရုပ်သိမ်းခဲ့ခြင်းနှင့် လက်ရှိအချိန်ထိ MLM စနစ်ဖြင့် လုပ်ငန်းဆောင်ရွက်ခြင်းကို တားမြစ်ကန့်သတ်နိုင်သော ဥပဒေတစ်ရပ်ပေါ်ထွက်လာခြင်း မရှိသောကြောင့်ဖြစ်သည်။

ဥပဒေအရ အရေးယူနိုင်ခြင်းမရှိဘဲ အများပြည်သူနစ်နာဆုံးရှုံးနေသည့် ဖြစ်ရပ်များမှာ MLM စနစ်တွင်သာမက အခြားနယ်ပယ်များတွင် ပေါ်ပေါက်လျက် ရှိသည်။

ယခုနောက်ပိုင်း ပေါ်ပေါက်လာသော ငွေကြေးလိမ်လည်မှုအရှုပ်အထွေးများတွင် သိန်းပေါင်းသောင်းနှင့်ချီကာ ငွေကြေးဆုံးရှုံးမှုများဖြစ်နေသော်လည်း တရားဥပဒေအရ အရေးယူနိုင်ခြင်း မရှိသည်ကို တွေ့ရသည်။

လက်ရှိရေပန်းစားနေသည်မှာ ယခုလပိုင်းအတွင်း ပေါ်ပေါက်ခဲ့သော သိန်းနှစ်သောင်းကျော် ငွေကြေးရယူ တိမ်းရှောင်မှုနှင့် သိန်းရှစ်သောင်းကျော် ငွေကြေးအရှုပ်တော်ပုံတို့ဖြစ်သည်။

ယင်းငွေကြေးအရှုပ်တော်ပုံ မြစ်ဖျားခံရာမှာ ဖေ့စ်ဘွတ်ခ်တွင် ချေးငွေ၊ စုမဲ၊ လေလံမဲ စသည်တို့ကို ရောင်းဝယ် လျက်ရှိသော ချေးငွေလုပ်ငန်းဂရုအဖွဲ့ ဖြစ်သည်။

မဲဝယ်ရောင်းလုပ်နေသူအများစုမှာ အမျိုးသမီးများဖြစ်ကြပြီး ရေတိုငွေ လိုအပ်ချက်ကို ဖြည့်ဆည်းရန် အဆိုပါ ဂရုကို စတင်ခဲ့ခြင်းဖြစ်သော်လည်း ယခုနောက်ပိုင်းတွင် ငွေကြေးပမာဏများပြားစွာ မဲအရောင်းအဝယ်များ ပြုလုပ်လာခြင်းဖြစ်သည်။

ယခုနောက်ဆုံးဖြစ်ရပ်တွင်သရုပ်ဆောင်လောကမှ မျက်နှာသစ်သရုပ် ဆောင်နှစ်ဦးပါ ပါဝင်ပတ်သက်နေပြီး သိန်းပေါင်းရှစ်သောင်းကျော် ပြန်လည်ပေးလျော်ခြင်းမရှိဘဲ တိမ်းရှောင်နေဆဲ ဖြစ်သည်။

ထွက်ပြေးတိမ်းရှောင်သူထံမှ မဲဝယ်ယူထားသော မဲသားများအနက်အချို့မှာ အမြတ်ယူကာ တစ်ဆင့်ပြန်လည် ရောင်းချမှုများပြုလုပ်ထားပြီး ယခုအခါ ၎င်းတို့ကိုယ်တိုင် ပြန်လည်ပေးလျော်ရန် အခက်တွေ့လျက်ရှိကြသည်။

“ညီမက စုစန္ဒီထွန်းဆီက ဝယ်ထားတာ။ သူများကို တစ်ဆင့်ပြန်ရောင်းထားတော့ အခုသိန်းနှစ်ရာလောက် စိုက်လျော်ထားရတယ” ဟု သိန်းပေါင်းနှစ်သောင်းကျော် မလျော်ဘဲတိမ်းရှောင်နေသူထံတွင် မဲဝယ်ယူထားသူ မဆွေလင်း (အမည်လွှဲ) က ဆိုသည်။

စိုက်လျော်ရမည့် ငွေကြေးသုံးပုံ နှစ်ပုံလျော်ပေးပြီးဖြစ်ကာ အပြီးအပြတ်ပေးလျော်ပြီးပါက ယင်းမဲဝယ်ရောင်း လုပ်ခြင်းကို စွန့်လွှတ်ရန်ဆုံးဖြတ်ထားကြောင်း ၎င်းက ဆိုသည်။

ယခုလို လေလံမဲ ငွေကြေးအရှုပ်အထွေးကိစ္စများအတွက် သက်ဆိုင်ရာတာဝန်ရှိသူများထံမှ သတိပေးတားမြစ်ချက် ထုတ်ပြန်ခြင်း၊ စိစစ်မေးမြန်းခြင်း၊ အရေးယူဆောင်ရွက်ခြင်း တစ်စုံတစ်ရာ မတွေ့မြင်ရသေးကြောင်း Anti-MLM အဖွဲ့မှ ကိုဇင်ဇေလွင်က ဆိုသည်။

အလိမ်အညာစီးပွားရေးလုပ်ငန်းပုံစံများကို ဖော်ထုတ်ထောက်ပြနေသော Anti-MLM အဖွဲ့ဝင်အများစုမှာ ထိုချေးငွေလုပ်ငန်းဂရုတွင် ဝင်ရောက်သတိပေးမှုများပြုလုပ်နေသော်လည်း ပြန်လည်တုံ့ပြန်မှုများကို ကြုံတွေ့နေရဆဲဖြစ်သည်။

ယခုလတ်တလောဖြစ်သွားသည့် ငွေကြေးလိမ်လည်မှုနှစ်ခုတွင် သိန်းပေါင်း တစ်သိန်းခန့် (ကျပ် ၁၀ ဘီလီယံ) ရှိနေပြီး ယင်းပမာဏမှာ ၂၀၁၇-၂၀၁၈ ဘဏ္ဍာနှစ် ဟိုတယ်နှင့်ခရီးသွားလာရေးဝန်ကြီး ဌာန၏ အသုံးစရိတ်ထက် ၂ ဒသမ ၅ ဘီလီယံခန့်ပိုများကာ စီးပွားရေးနှင့် ကူးသန်းရောင်းဝယ်ဝန်ကြီးဌာန၏ အသုံး စရိတ် ၁၃ ဘီလီယံထက် အနည်းငယ်သာ လျော့နည်းသည်။

ပြီးခဲ့သည့် ၂၀၁၇-၂၀၁၈ ဘဏ္ဍာနှစ်တွင် နိုင်ငံတော်သမ္မတရုံး၏ အသုံးစရိတ်မှာ ကျပ် ကိုးဘီလီယံခန့်၊ ပြည်သူ့ လွှတ်တော်ရုံးအသုံးစရိတ်မှာ ကျပ် ၁၀ ဒမသ ၇ ဘီလီယံ၊ ပြည်ထောင်စုရွေးကောက်ပွဲကော်မရှင်ရုံး အသုံးစရိတ်မှာ ကျပ် ၁၀ ဒသမ ၆ ဘီလီယံသာရှိခဲ့သည်။

“ဒီလောက် ပမာဏများများနဲ့ လည်ပတ်နေတာကို မြင်နိုင်သိနိုင်တာပဲ။ ဒါတွေကို ပြည်ထဲရေးနဲ့ တခြားတာဝန်ရှိသူတွေက မေးမြန်းတာမျိုးရှိရင်ကောင်းမယ်။ လွှတ်တော်ဘက်ကလည်း ဒါနဲ့ ပတ်သက်လို့ သတိပေးတာမျိုး လုပ်နိုင်ရင် ဆုံးရှုံးနစ်နာမှုနည်းနိုင်တာပေါ့” ဟု ကိုဇင်ဇေလွင်က မှတ်ချက်ပေးသည်။

စုမဲ၊ လေလံမဲဆိုသော်လည်း အများစုမှာ အမှန်တကယ်မရှိသော မဲများ ဖြစ်ပြီး တစ်ဖက်တွင် ရောင်းရသော မဲကြေးဖြင့် ကျန်တစ်ဖက်တွင် အမြတ်ပိုများသော မဲကို ပြန်လည်ဝယ်ယူကာ ငွေကြေးရှာဖွေနေကြခြင်း ဖြစ်သည်။

“မဲအရောင်းအဝယ်ဆိုတာဟာ ဝှက်ဖဲပါ။ တကယ်က ငွေချေးငှားခြင်းပါ” ဟု ကျပ်သိန်းပေါင်းရှစ်သောင်းကျော် ယူဆောင်တိမ်းရှောင်နေသော ဖြိုးသီရီထွန်း၏ ဖေ့စ်ဘွတ်ခ်အကောင့်ကို ရယူထားသော MHAအဖွဲ့ဝင်တစ်ဦးက The Voice Weekly ၏ မေးမြန်းမှုကို ဖြေကြားသည်။

ယခုငွေကြေးလိမ်လည်မှုတွင် ငွေချေးငှားခြင်း စာချုပ်စာတမ်းချုပ်ဆို ထားမှုရှိပါက တရားဝင်လမ်းကြောင်းနှင့် ပြန်လည်ပေးလျော်ခြင်းမရှိပါက လိမ်လည်မှုမြောက်ကြောင်း ဖြိုးသီရိထွန်း ဖေ့စ်ဘွတ်ခ်အကောင့်ကို ရယူထားသော MHA အဖွဲ့ဝင်က ဆိုသည်။

ထူးခြားချက်မှာ အဆိုပါ MHA အဖွဲ့ဝင်သည် ရှေ့နေတစ်ဦးဖြစ်နေခြင်းပင်။

အွန်လိုင်းတွင် မကြာခဏ လိမ်လည်မှုဖြစ်နေသော စုမဲ၊ လေလံမဲကိစ္စများနှင့် ပတ်သက်၍ လက်ရှိအချိန်ထိ တရားဝင်အရေးယူဆောင်ရွက်သည့် လုပ်ဆောင်ချက် တစ်စုံတစ်ရာမရှိသည့်အတွက် အသိပညာပေး လုပ်ဆောင်ရန် ခက်ခဲလာကြောင်း ကိုဇင်ဇေလွင်က ဆိုသည်။

“ဥပဒေအရလုပ်ဖို့ အချိန်ကြာဦးမယ်ဆိုရင် ဒီကြားကာလမှာ အသိပညာပေးတော့ လုပ်ရမှာပေါ့။ လုပ်လို့ရတဲ့ အနေအထားမှလည်းရှိနေရဲ့နဲ့ ဘာကြောင့် နှောင့်နှေးနေသလဲဆိုတာကို ကျွန်တော်လည်း သိပ်နားမလည်ဘူး” ဟု ၎င်းက အားမလိုအားမရဆိုသည်။

စစ်ငြိမ်းသူ

You may also like...

Leave a Reply

Your email address will not be published. Required fields are marked *